Te hauti ra ta oe tamarii e pae matahiti i roto i te piha. Faaroo ˈtura oe ua topa te tahi mea. Haere aˈera oe e hiˈo e te itehia ra te mau huˈahuˈa o te tahi farii tiare i pihai iho ia ˈna. Na to ˈna noa hohoˈa e faaite atu no ˈna te hape.

Ma te riri, na ô atura oe, “ua parari anei tera farii tiare ia oe?”

Oioi oia i te pahono, “aita mama!”

E ere a tahi ra to tamarii e pae matahiti e haavare ai. Mea tia anei ia haapeapea?

Mea ino te mau parau haavare atoa. Te faaite ra te Bibilia mea au ore na te Atua ra o Iehova i “te arero haavare.” (Maseli 6:16, 17) I roto i te ture i horoahia ia Iseraela, e faautua-etaeta-roa-hia te feia e haavare ia vetahi ê.—Levitiko 19:11, 12.

Mea taa ê râ te mau parau haavare atoa. Mea ino roa vetahi haavare, e parauhia hoi te reira no te haamauiui i te taata. No te haama aore ra no te tahi faautuaraa, e haavare paha vetahi i mua i te faaheporaa. (Genese 18:12-15) Mea ino te mau haavare atoa, mea taa ê râ vetahi. Ia haavare to tamarii, a haapao i to ˈna faito matahiti e te tumu e huna ˈi oia i te parau mau.

A faaafaro i tera fifi i te tamariiraa. Ua papai te taote David Walsh, “e haapiiraa faufaa roa no te mau tamarii ia faaite i te parau mau noa ˈtu e ere te mea ohie. E maitai te taairaa e vetahi ê ia tiaturi te tahi i te tahi e e ore tera tiaturi no te haavare.” a

Eiaha e haapeapea roa ino. Ua haavare ta oe tamarii, e ere râ te auraa e riro iho â oia ei taata ino. A haamanaˈo, te parau ra te Bibilia: “Ua mau roa te maamaa i roto i te aau o te tamarii.” (Maseli 22:15) E faaite vetahi tamarii i te haerea maamaa ma te haavare. Peneiaˈe te manaˈo ra ratou tera te ravea ohie aˈe ia ore ratou ia faautuahia. Mea faufaa roa râ to huru ia tupu te reira.

A feruri no te aha to tamarii i haavare ai. Ua mǎtaˈu anei ia faautua ˈtu oe? Ua hinaaro anei ia inoino oe? Ua hamani anei oia i te manaˈo ia au atu vetahi ê ia ˈna? No to ˈna faito matahiti, aita anei oia i na reira no te mea aita o ˈna i taa ˈtura mea taa ê te tupuraa mau e te aamu hamanihia? Ia ite oe no te aha to tamarii i haavare ai, e aˈo maitai aˈe oe ia ˈna.—Aratairaa Bibilia: Korinetia 1, 13:11.

I te tahi taime, eiaha e ui. I roto i te tupuraa i te omuaraa, noa ˈtu ua ite te mama eaha tei tupu, ma te riri ua ui oia i ta ˈna tamarii: “Ua parari anei tera farii tiare ia oe?” Ua haavare te tamarii peneiaˈe no te mea ua riri to ˈna mama. A feruri na râ ahiri te mama i parau noa: “Auê hoi e, ua parari te farii tiare ia oe!” Ma te ore e ui, eita te tamarii e turaihia ia haavare e e tauturuhia oia ia faaite i te parau mau.—Aratairaa Bibilia: Kolosa 3:9.

A haapopou atu. Mea ohie aˈe ia haapii i te tamarii no to ratou hinaaro e faaoaoa i to ratou na metua. Ia ite ïa to tamarii mea faufaa no to outou utuafare ia faaite i te parau mau e tera te tumu e ani ai oe eiaha ia haavare.—Aratairaa Bibilia: Hebera 13:18.

A faataa maitai i te tamarii mai te peu e haavare te tahi taata, eita oia e tiaturi-faahou-hia e mea fifi roa no vetahi ê ia tiaturi faahou ia ˈna. A faaitoito ia ˈna ia faaite i te haerea maitai ma te haapopou atu ia faaite oia i te parau mau. E nehenehe oe e na ô, “ua oaoa roa vau i to oe faaiteraa i te parau mau.”

A horoa i te hiˈoraa. Papu maitai, eita te tamarii e faaite i te parau mau ia faaroo oia ia oe ia na ô, “a parau atu aita vau i te fare” no te mea aita oe e hinaaro e paraparau i te taata i niuniu atu. Aore ra, “e faaea noa vau i te fare, e maˈi to ˈu,” no te mea e hinaaro noa oe e tamǎrû ia oe.—Aratairaa Bibilia: Iakobo 3:17.

A haafaufaa i te Bibilia. E faaitoito te mau aratairaa e aamu Bibilia ia faaite i te parau mau. E nehenehe te buka Écoute le grand Enseignant piahia e te mau Ite no Iehova e tauturu i to tamarii ia farii i te mau aratairaa Bibilia. E ite oe i te pene 22 “Pourquoi nous ne devons pas mentir” o (A hiˈo te tahi tuhaa o te reira i roto i te tumu parau tarenihia “Te tahi buka e tauturu i to tamarii.”)