E buka taa ê roa te Bibilia. No ǒ mai i te Atua poiete te mau aˈoraa i roto. (Timoteo 2, 3:16) E nehenehe ta ˈna poroi e taui i to tatou oraraa. No reira te Bibilia e nâ o ai: “E mea ora hoi te parau a te Atua, e te puai rahi.” (Hebera 4:12) E mana to te Bibilia no te haamaitai i to tatou oraraa, e horoa mai hoi i te aratairaa e faufaahia ˈi tatou i teie nei â i te mau mahana atoa e e tauturu mai atoa ia ite o vai te Atua e eaha ta ˈna e fafau mai ra.—Timoteo 1, 4:8; Iakobo 4:8.

E maitaihia to oe oraraa i teie nei â. E tauturu mai te Bibilia i roto i to tatou oraraa taatoa. E horoa  atoa mai i te mau aˈoraa maitai i roto i teie mau tuhaa:

• Te huru e tia ia faaite i nia ia vetahi ê.—Ephesia 4:31, 32; 5:22, 25, 28, 33.

• Te mau huru au ore e tia ia haapae e eaha te rave ia maitai to tatou ea.—Salamo 37:8; Maseli 17:22.

• Te mau peu iino.—Korinetia 1, 6:9, 10.

• Te ohipa.—Maseli 10:4; 28:19; Ephesia 4:28. a

Ua ite te tahi na hoa faaipoipo no Asia i te maitai o te mau aˈoraa paari a te Bibilia. Mai te feia faaipoipo apî atoa, e ere i te mea ohie ia faaau i te huru o te tahi e te tahi e ia faatupu i te aparauraa. Ua haamata râ raua i te haapao i ta raua i taio i roto i te Bibilia. Eaha tei itehia? Te na ô ra te tane o Vicent te iˈoa: “Ua tauturu mai ta ˈu i taio i roto i te Bibilia ia faaafaro i to mâua mau fifi ma te here. I to mâua vaiihoraa i te Bibilia ia aratai i to mâua oraraa, ua oaoa mâua toopiti.” Te tu ra te manaˈo o ta ˈna vahine o Annalou te iˈoa: “Ua tauturu mai te aamu o te mau taata i roto i te Bibilia. Te oaoa nei au i teie nei e te mauruuru atoa ra i to mâua faaipoiporaa e ta mâua mau fa.”

E ite oe o vai te Atua. Taa ê atu i te mau maitai ta ˈna i ite i roto i to ˈna faaipoiporaa, ua na ô atoa Vicent: “Ma te taio i te Bibilia, ua piri atu â vau ia Iehova ia faaauhia i na mua ˈˈe.” Mea faufaa roa ta Vicent e parau ra, e nehenehe te Bibilia e faaite atu o vai te Atua. Eita ïa oe e maitai-noa-hia i ta ˈna mau aˈoraa, e tauturu-atoa-hia râ ia haafatata i te Atua! Te faataa atoa ra te Bibilia e oraraa maitai aˈe te tiai mai ra ia tatou, “te ora mure ore.” (Timoteo 1, 6:19) Tera te mea eita e itehia i roto i te tahi atu mau buka!

Ia haamata oe i te taio i te Bibilia e ia tamau i te na reira, e ite atoa oe i na maitai e piti i faahitihia. E maitaihia to oe oraraa e e ite oe o vai te Atua. I roto râ i ta oe taioraa, e rave rahi paha uiraa te hiti mai i roto i to feruriraa. A haamanaˈo ïa i tera taime i te hiˈoraa maitai o te tahi taata rahi no Etiopia o tei ora a 2 000 matahiti i teie nei. Mea rahi ta ˈna uiraa no nia i te Bibilia. I te aniraahia ia ˈna te taa ra anei oia i ta ˈna e taio ra, teie ta ˈna i pahono: “Eaha vau e ite ai, ahiri e taata te faaite mai ia ˈu ra?” b Farii ihora oia i te tauturu a Philipa o tei riro ê na ei pîpî na Iesu e ei taata aravihi i te haapii ia vetahi ê no nia i te Bibilia. (Ohipa 8:30, 31, 34) Oia atoa oe, ia hinaaro oe ia ite atu â no nia i te Bibilia, te faaitoito atu nei matou ia faaî i te hoê aniraa i nia i te reni Internet jw.org. Aore ra, e ite oe i roto i teie vea e nafea ia papai mai. E tia atoa ia oe ia farerei i te mau Ite no Iehova o to oe oire aore ra ia haere i te tahi o ta ratou mau piha putuputuraa piri i ǒ oe. No te aha e ore ai e tii atu i te hoê Bibilia i teie mahana e e haapao i ta ˈna mau aratairaa ia oaoa ˈtu â oe?