IA HIˈOHIA, e mea faufaa ore te taoˈa e horoahia ra i roto i te rima o Jordan. Tera râ te tahi ô faufaa roa ˈˈe no ˈna. Te faataa ra Jordan: “Ua horoa mai Russell, te tahi hoa paari o to matou utuafare, i te reira i to ˈu tamariiraa.” I muri aˈe i te pohe o Russell, ua faaitehia ia Jordan, e hoa piri roa oia o tei tamahanahana i to ˈna na metua e to ˈna papa ruau i roto i te fifi. Te na ô ra Jordan: “I to ˈu iteraa i te reira, ua haafaufaa roa ˈtu â vau i teie taoˈa iti o tei horoahia mai.”

Mai i roto i te tupuraa o Jordan, e nehenehe te tahi taoˈa iti e riro ei mea faufaa ore no te taata. Area no tei fanaˈo i te reira, e mea taoˈa rahi ïa. Te faataa ra te Bibilia i te ô faufaa roa ˈˈe na roto i teie mau parau: “I aroha mai te Atua i to te ao, e ua tae roa i te horoa mai i ta ˈna Tamaiti fanau tahi, ia ore ia pohe te faaroo ia ˈna ra, ia roaa râ te ora mure ore.”—Ioane 3:16.

Te feia o te fanaˈo i tera ô, e noaa ia ratou te ora mure ore! Te vai ra anei te tahi ô o tei faito i tera? No vetahi, e ere paha tera ô i te mea faufaa roa, area no te mau Kerisetiano mau, oia ïa. (Salamo 49:8; Petero 1, 1:18, 19) No te aha râ te Atua i horoa ˈi i te ora o ta ˈna Tamaiti i to te ao?

Teie te faataaraa a te aposetolo Paulo: “No te taata hoê ra i ô mai ai te ino i te ao nei, e no te ino hoi te pohe; e ua taea-atoa-hia te taata atoa e te pohe.” (Roma 5:12) Noa ˈtu ua ite te taata matamua ra o Adamu i te utua e topa i nia ia ˈna, ua faaroo ore oia i te Atua. Eaha tei itehia i muri aˈe? Ua naeahia to ˈna huaai, te taata atoa ïa, i te utua o te pohe.

No te faatiamâ i te taata i te utua o te pohe, ua tono te Atua i ta ˈna Tamaiti o Iesu Mesia i nia i  te fenua no te horoa i to ˈna ora tia roa no te ao. No reira te Bibilia e na ô ai: “E utua te pohe no te hara, area te ora mure ore ra, e mea horoa-noa-hia mai ïa e te Atua i roto i to tatou ra Fatu ia Iesu Mesia.” (Roma 6:23) Maoti tera hoo, te tusia taraehara ïa, e fanaˈo te feia atoa o te faatupu i te faaroo ia Iesu i te ora mure ore.—Ephesia 1:7.

Na roto ia Iesu Mesia, e fanaˈo te feia e haamori i te Atua i te mau haamaitairaa rahi. No reira Paulo i na ô ai: “Ia haamaitaihia te Atua i to ˈna ra horoa eita e tia ia parau.” (Korinetia 2, 9:15) No te faahiahia o te tusia taraehara, eita e tia ia faataa i te faufaa rahi o te reira. No te aha o te hoo te ô faufaa roa ˈˈe o ta te Atua i horoa noa i te taata? Eaha te tumu i taa ê roa ˈi te reira i te tahi atu mau ô no ǒ mai i te Atua? a E nafea ia faaite i to tatou mauruuru? A hiˈo na i te pahonoraa a te Bibilia i tera mau uiraa i roto i na tuhaa e piti i mua ˈtu.