“A ara ïa, aita hoi outou i ite i te mahana e te hora.”​—MATAIO 25:13.

“A haapao maitai, a ara, aita hoi outou i ite afea teie mau mea e tupu ai.”​—MAREKO 13:33.

Aita ïa e taata i te fenua i ite afea te hopea o teie faanahoraa o te ao e tae mai ai. Ua faataa râ te Atua i te taime, te hoê “mahana” e te hoê “hora” taa maitai, no te hopea o teie nei ao. (Mataio 24:36) Aita anei ïa e ravea no te ite ua piri anei tatou i te hopea? Oia, ua parau Iesu i ta ˈna mau pǐpǐ ia hiˈo i te mau tupuraa o te faaite ua piri roa te hopea.

Tera mau tupuraa, o te tapao ïa o “te anotau hopea o te ao nei.” Ua parau Iesu: “E aro hoi te tahi nunaa i te tahi atu nunaa e te tahi faatereraa i te tahi atu faatereraa, e e tupu te oˈe e te aueueraa fenua i tera e tera vahi.” (Mataio 24:3, 7) Ua parau atoa o ˈna e tupu “te maˈi pee.” (Luka 21:11) Tera iho â te mau tupuraa ta Iesu i tohu ta oe e ite ra.

Mea rahi te tamaˈi, te oˈe, te aueueraa fenua e te maˈi ino mau tei tupu. Ei hiˈoraa, i 2004, ua tupu te hoê aueueraa fenua e te hoê miti faaî na te pae o te miti Initia. E 225 000 taata tei pohe. I roto e toru matahiti, fatata 6,9 mirioni taata tei pohe i te maˈi COVID-19. Ua parau Iesu e na tera mau huru tupuraa e faaite mai ua piri roa te hopea o te faanahoraa o teie ao.

I roto i te Bibilia, e parauhia te tau hou te hopea a tae mai ai “te mau mahana hopea.” (Petero 2, 3:3, 4) Te na ô ra te Timoteo 2, 3:1-5, e fariu ê te taata i te mau peu maitai. (A hiˈo i te tumu parau “ Hou te hopea o teie ao e tae mai.”) Aita anei oe e ite ra i te feia miimii, te nounou, te iria e te ino i teie mahana? E tapao atoa tera e ua piri roa mai te hopea o teie nei ao.

Ehia maororaa te mau mahana hopea? Te parau ra te Bibilia “e taime poto” e e haamou te Atua “i te feia e tuino ra i te fenua.”—Apokalupo 11:15-18, nota; 12:12.

Ua faataa aˈena te Atua i te mahana e te hora e haamou ai o ˈna i te faanahoraa o teie ao. (Mataio 24:36) Mea rahi atu â râ te parau apî oaoa! Aita te Atua “e hinaaro ra ia haamouhia te hoê.” (Petero 2, 3:9) Te titau manihini nei ïa o ˈna i te taata atoa ia haapii eaha to ˈna hinaaro e ia faaroo ia ˈna. No te aha? Te hinaaro ra o ˈna ia ora ˈtu tatou i te hopea o teie ao e ia fanaˈo tatou i te hoê oraraa maitai roa i roto i te ao apî, ia faariro o ˈna i te fenua ei paradaiso.

E faanahoraa ta te Atua i haamau no te haapii i te taata eaha te mau titauraa no te ora i roto i te ao apî, i raro aˈe i ta ˈna Faatereraa arii. Ua parau Iesu e porohia te parau apî oaoa no nia i te Faatereraa arii a te Atua “e ati aˈe te fenua.” (Mataio 24:14) E rave rahi hora ta te mau Ite no Iehova ati aˈe te ao nei i faataa no te poro e no te haapii i te taata eaha te tiaturiraa ta te Bibilia e faaite mai ra. Ua parau Iesu e poro-haere-hia te reira na te fenua taatoa hou te hopea e tae mai ai.

Fatata roa te hopea o te faatereraa a te taata. Te parau oaoa râ, e nehenehe oe e ora mai i te hopea o teie ao a fanaˈo atu ai i te hoê oraraa maitai roa i nia i te fenua paradaiso ta te Atua i fafau. E faataa mai to muri mai tumu parau e nafea oe e nehenehe ai e ora i roto i te ao apî.