E nafea ia faaite i te here i to tatou taata tupu?
Ei huaai na te taata matamua ra o Adamu, hoê noa utuafare fetii to tatou. Noa ˈtu e titauhia i te mau mero o te utuafare ia here e ia faatura te tahi i te tahi, mea fifi ia ite i taua huru here ra i teie mahana. E ere tera ta to tatou Atua here e hinaaro ra.
TA TE BIBILIA E PARAU RA NO NIA I TE HERE
“E aroha [aore ra here] râ oe i te taata tupu mai to aroha ia oe iho na.”—LEVITIKO 19:18.
“A here noa i to outou mau enemi.”—MATAIO 5:44.
EAHA TE AURAA IA HERE I TO TAATA TUPU?
A tapao na mea nafea te Atua e faataa ˈi i te here i roto i te Korinetia 1, 13:4-7:
“E faaoromai e e hamani maitai te here.”
A tapao na: Eaha to oe huru ia faaite atu vetahi i te faaoromai e te hamani maitai ia oe e eita râ e riri oioi i ta oe mau hapa?
“Eita te here e pohehae.”
A tapao na: Eaha to oe huru ia manaˈo ino mai aore ra ia pohehae mai vetahi ia oe?
“Eita e imi i to ˈna iho maitai.”
A tapao na: Eaha to oe huru ia faatura vetahi i to oe manaˈo e eita râ e mârô ia farii oe i to ˈna manaˈo?
“Eita te here e tapea i te ino.”
A tapao na: Te ineine nei te Atua i te faaore i te hapa a te taata o tei hara e o tei tatarahapa. ‘E ore oia e tamau i te aˈo mai ia tatou, e ore hoi e tapea i to ˈna riri.’ (Salamo 103:9) Mea au na tatou ia faaore mai te tahi taata i te hapa ta tatou i rave i nia ia ˈna. Ia ineine noa ïa tatou i te faaore i ta ratou hapa noa ˈtu ua haamauiui ratou ia tatou.—Salamo 86:5.
“Eita te here e oaoa i te parau-tia ore.”
A tapao na: Ia faaruru tatou i te ati, eita tatou e au ia oaoa vetahi i to tatou mauiui. Eita atoa ïa tatou e oaoa ia faaruru ratou i te ati, noa ˈtu ua rave ino mai ratou ia tatou.
No te fanaˈo i te haamaitairaa a te Atua, e titauhia ia here ia vetahi ê noa ˈtu eaha to ratou faito matahiti, nunaa aore ra ta ratou haapaoraa. Te hoê ravea, o te tautururaa ïa i te feia e hinaaro ra i te tauturu.
