Ua fanauhia vau i 1960, 17 matahiti noa to to ˈu mama. Ua faarue to ˈu papa ia mâua hou to ˈu fanauraa. I ora na mâua e to ˈu na papa e mama ruau i Burg, te hoê oire iti i Heremani hitia o te râ. No te taata e rave rahi, aita e Atua e hoê â manaˈo to to ˈu utuafare.

Ua aupuru to ˈu papa ruau ia ˈu. Ua tia atoa ia ˈu ia tauturu ia ˈna i roto i te ohipa e rave rahi mai te haereraa i nia i te mau tumu raau no te tâpû i te mau raau. Ei tamarii, ua au mau vau i te reira. E oraraa oaoa to ˈu e aita e haapeapearaa.

E ohipa riaria mau tei tupu i te hituraa o to ˈu matahiti. No haamata noa ˈtura vau i te pitiraa o te matahiti haapiiraa. A hoˈi ai i te fare, ua paiuma vau i nia i te hoê pou uira. Taeraa vau i te 8 metera, ua haruhia vau i te uira. I to ˈu araraa mai i te fare maˈi, e au ra e aita ta ˈu e rima faahou. Ua paapaa e ua pêpê mau iho â to ˈu na rima, mea riaria ia hiˈo atu. I titauhia ïa ia tâpû ia ore to ˈu toto ia taero. Ua oti roa to ˈu mama, papa ruau e mama ruau. Ei tamarii râ, aita vau i taa maitai e e taui roa te reira i to ˈu oraraa.

I to ˈu matararaa mai i te fare maˈi, ua hoˈi au i te fare haapiiraa. Ua faaooo noa mai te mau tamarii ia ˈu, ua turai mai e ua taora mai i te tahi mau mea no te mea aita ta ˈu e nehenehe e paruru ia ˈu. Ua mauiui roa vau i ta ratou mau parau faaino e faahaama. I muri iho, ua afaihia vau i te hoê fare haapiiraa taa ê i Birkenwerder no te mau tamarii huma. No te atea râ, aita to ˈu utuafare i nehenehe e haere mai e hiˈo ia ˈu. E ite noa vau ia ratou i te taime faafaaearaa haapiiraa. I na ahuru matahiti i muri iho, ua paari ïa vau o vau anaˈe.

Ua haapii au i te rave i te ohipa e rave rahi maoti to ˈu avae. A feruri na mai te aha te huru ia tamaa e te hoê punu taipu ma te faaohipa i to avae! Ua tae ia ˈu. Ua haapii atoa vau ia purumu i to ˈu niho e ia pahere i to ˈu rouru maoti to ˈu avae. E ia faaohipa atoa i te avae a paraparau ai. Ua riro iho â to ˈu avae ei rima no ˈu.

 A taurearea ˈi, mea au na ˈu te mau buka no nia i te mau taoˈa feruri-noa-hia. I te tahi taime, i feruri na vau e fanaˈo i te rima matini no te rave i te mau mea atoa. I te 14raa o to ˈu matahiti, ua haamata vau i te puhipuhi i te avaava. No ˈu, e horoa mai te reira i te tahi tiaturi ia ˈu iho. E ere ïa vau i te hoê taata taa ê i te tahi atu. Mai te huru ra e e parau vau: ‘E tae atoa ia ˈu ia na reira. E taata paari te feia puhipuhi avaava, e rima to ratou aore ra aita.’

Mea rahi te ohipa ta ˈu i rave. Ua apiti au i te hoê taatiraa no te feia apî Heremani tiamâ tei turuhia e te faatereraa. O vau ïa te papai parau, e tiaraa fanaˈo te reira i roto i te taatiraa. Ua apiti atoa vau i te hoê pǔpǔ himene, te rururaa no te mau pehepehe e te mau ohipa tuaro no te mau huma. I muri iho i te haapiiraa i te hoê toroa, ua haamata vau i te ohipa i roto i to ˈu oire. A paari mai ai, ua tuu pinepine aˈe au i to ˈu rima haavare no to ˈu hinaaro e riro mai te tahi atu mau taata.

I te hoê mahana a tiai ai i te pereoo auahi no te haere i te ohipa, ua piri mai te hoê taata. Ua ani mai o ˈna ia feruri e fanaˈo faahou i to ˈu na rima maoti te Atua. Ua huru ê au. Ua hinaaro iho â vau i to ˈu na rima, eita râ e haere, e moemoeâ noa tera! Ua papu hoi ia ˈu e aita e Atua. Mai tera taime, ua ape au i tera taata.

Tau taime i muri iho, ua titau manihini mai te hoê hoa ohipa ia haere i roto i to ˈna utuafare. A inu ai i te taofe, paraparau mai nei to ˈna na metua no nia i te Atua, Iehova. A tahi ra vau e faaroo ai e e iˈoa to te Atua. (Salamo 83:18) Ua manaˈo noa râ vau, ‘Aita e Atua, noa ˈtu o vai to ˈna iˈoa. E faaite au i tera mau taata e ua hape ratou.’ Ua farii ïa vau ia tauaparau no nia i te Bibilia. I to ˈu maere rahi, aita ta ˈu e nehenehe e haapapu e aita e Atua.

Ua taui mǎrû noa râ to ˈu manaˈo no nia i te Atua a hiˈopoa ˈi matou i te mau parau tohu Bibilia. Mea rahi tei tupu noa ˈtu ua papaihia te reira hau atu i te hanere aore ra tausani matahiti na mua ˈˈe. I roto i te hoê tauaparauraa, ua faaau matou i te mau tupuraa itehia na te ao e te mau parau tohu i roto i te Mataio pene 24, Luka pene 21 e Timoteo 2 pene 3. Mai te anairaa o te mau tapao taa ê o te tauturu i te taote ia ite i te maˈi o te hoê taata, ua tauturu mai te anairaa o te mau tupuraa faahitihia i roto i teie mau parau tohu ia taa e te ora nei tatou i ta te Bibilia e parau ra te “anotau hopea.” a Maere roa vau. Te tupu ra teie mau parau tohu i mua noa i to ˈu mata.

Ua papu ia ˈu e o te parau mau ta ˈu e haapii ra. Ua haamata vau i te pure i te Atua ra o Iehova. Ua faaea vau i te avaava o ta ˈu i puhipuhi rahi na a hau atu ahuru matahiti i te maoro. E ua tamau noa vau i te haapii i te Bibilia hoê matahiti. Ua bapetizohia vau i te 27 no Eperera 1986 i roto i te hoê vahi hopuraa pape taa ê. Ua na reirahia ma te  huna, ua opanihia hoi te mau Ite no Iehova i tera tau i Heremani hitia o te râ.

No te opaniraa, i putuputu na matou ei pǔpǔ nainai i roto i te mau fare e o te tahi noa mau hoa haamori ta ˈu i matau. Ma te maere, ua faatia te feia mana ia ˈu ia haere i Heremani tooa o te râ. Aita te mau Ite i opanihia i ǒ. No te taime matamua, ua tia ia ˈu ia apiti i te mau tairururaa Bibilia e ia ite e tausani o to ˈu mau taeae e tuahine. Auê ïa tupuraa taa ê mau!

I te toparaa te patu o Berlin, ua faatiahia te mau Ite no Iehova. E nehenehe ïa matou e haamori ia Iehova ma te tiamâ. Ua hinaaro vau e poro atu â, ua mǎtaˈu râ vau i te paraparau i te taata ta ˈu i ore i matau. E manaˈo haihai roa to ˈu ia ˈu iho no to ˈu tupuraa e no te mea ua faaea vau i to ˈu tamariiraa i roto i te hoê fare no te mau huma. I 1992 râ, i te hoê avaˈe, ua tamata vau i te poro 60 hora. Ua tae ia ˈu e ua oaoa mau vau. Ua faaoti ïa vau e na reira i te mau avaˈe atoa e ua tia ia ˈu e toru matahiti.

Haamanaˈo noa vau i te mau parau i roto i te Bibilia: “O vai tei paruparu e aore au i paruparu?” (Korinetia 2, 11:29) Aita to ˈu e rima faahou, te tere maitai ra râ to ˈu feruriraa e e reo atoa hoi. E faaitoito ïa vau i te tauturu ia vetahi ê noa ˈtu to ˈu fifi. E taa ohie ia ˈu i te feia e taotiaraa to ratou. Ua ite au eaha te huru ia hinaaro oe e rave i te tahi ohipa aita râ e haere. E tutava ïa vau i te faaitoito i te feia e ite ra i tera huru aau. Oaoa vau i te tauturu ia vetahi ê mai tera.

E taime iho â, e hepohepo vau. E hinaaro noa vau e riro mai te tahi atu. E nehenehe ta ˈu e rave i ta ˈu ohipa o te mau mahana atoa. Ia faaauhia râ i te tahi atu, e titauhia hau atu â taime, tutavaraa e itoito. Teie ta ˈu e haamanaˈo i te mahana taitahi: “E tia ia ˈu te mau mea atoa nei i . . . tei tauturu mai ia ˈu ra.” (Philipi 4:13) I te mau mahana atoa, e horoa mai Iehova i te puai ta ˈu e hinaaro no te rave i te mau ohipa atoa. Aita Iehova i faaea noa ˈˈe i te tauturu mai. Eita atoa ïa vau e hinaaro e faaea i te tavini ia ˈna.

Ua haamaitai mai Iehova, e utuafare to ˈu. O ta ˈu iho â i mihi noa i to ˈu tamariiraa e a paari mai ai. Mea maitai roa ta ˈu vahine o Elke, î i te here e te aumihi. Hau atu â, e mirioni Ite no Iehova tei riro mai ei taeae e tuahine, te hoê utuafare ïa na te ao atoa nei.

Te tamahanahana atoa mai ra te parau fafau a te Atua no nia i te paradaiso i reira ‘e faaapî ai o ˈna i te mau mea atoa nei,’ oia atoa to ˈu na rima. (Apokalupo 21:5) E taa maitai atu â ia ˈu teie parau fafau a feruri maite ai i ta Iesu i rave i nia i te fenua. I reira noa, ua faaora o ˈna i te taata hapepa e ua faahoˈi atoa i te tariˈa tâpûhia o te hoê taata i to ˈna vairaa. (Mataio 12:13; Luka 22:50, 51) Ua haapapu mai te mau parau fafau a Iehova e te mau semeio a Iesu e fatata roa vau i te fanaˈo faahou i to ˈu na rima.

Te haamaitairaa rahi aˈe râ, o te iteraa ïa o vai te Atua ra o Iehova. Ua riro mai o ˈna ei metua no ˈu, ei hoa, ei tamahanahana e ei puai. Hoê â manaˈo to ˈu i to te arii Davida o tei papai: “O Iehova tau puai . . . e ua turuhia mai au; i rahi ai te oaoa o to ˈu nei aau.” (Salamo 28:7) Hinaaro vau e tapea i tera parau mau faahiahia no te toea o to ˈu oraraa. Ua farii au i te reira noa ˈtu aita to ˈu na rima.