No te aha e fifi ai?

“Ua haere maira te mau Pharisea ia [Iesu] ra, ua na ô maira, i te râmâraa mai ia ˈna, E au anei i te ture ia haapae noa te tane i ta ˈna vahine i te mau hapa rii atoa nei?”—Mataio 19:3.

I UIUI na vetahi i te tau o Iesu e e nehenehe aore ra e titauhia anei ia vai maoro te faaipoiporaa. Ua parau atu Iesu: “Aita outou i taio e o tei hamani i te taata i te matamua ra, i hamani ïa i te tane hoê e te vahine hoê, e ua na ô aˈera, E faarue ai te taata i tana metua tane e tana metua vahine a ati atu ai i tana vahine; e riro hoi raua ei hoê? E teie nei, e ere atura raua i te toopiti, hoê râ. E ta te Atua i taati ra, eiaha te taata e faataa ê atu.” * (Mataio 19:4-6) Ta te Atua opuaraa, ia vai maoro ïa te faaipoiporaa.

I te fenua e rave rahi, fatata e 40 % faaipoiporaa aore ra hau atu e “faataa ê” nei a taa roa ˈtu ai. Ua hope anei te tau o te mau aˈoraa Bibilia no nia i te faaipoiporaa? No ǒ mai anei te fifi i te faanahoraa o te faaipoiporaa?

Ei hiˈoraa: E hoo mai e piti nau hoa faaipoipo i te hoê â huru pereoo. E atuatu e e faahoro maitai noa na hoa faaipoipo matamua. Eita to raua pereoo e ino. Area te tahi atu na hoa faaipoipo, eita ïa e haapao i to raua pereoo e ta raua huru faahoro. Ino aˈera te pereoo e faaruehia ˈtura. O te pereoo anei te fifi aore ra na te fatu pereoo te hape? E tuhaa rahi ta te fatu.

Oia atoa, mea rahi te faaipoiporaa aita e manuïa ra. E ere râ o te faanahoraa o te faaipoiporaa te fifi. Te manuïa nei hoi e mirioni faaipoiporaa. Maoti te reira e fanaˈo ai te taata, te utuafare, e te totaiete i te hoê oraraa oaoa e te papu. Mai te hoê râ pereoo, e titauhia ia atuatu tamau i te faaipoiporaa ia vai maoro te reira.

Tau mahana noa anei to orua faaipoiporaa aore ra ua ahuru matahiti? E maitai orua i te mau aˈoraa Bibilia e nafea ia atuatu e ia haapaari i te reira. Teie te tahi mau hiˈoraa i te mau api i muri nei.

[Nota i raro i te api]