БӨГҮН делегейде демдеглеп турар шажынчы болгаш шажынчы эвес байырлалдар Библияга үндезилеттинмээн. Ынчаарга оларны чүге байырлап эгелээнил? Ол айтырыгны энциклопедиялар болгаш тайылбыр үндүрүглер дузазы-биле шинчилээри сеңээ солун боор чадавас. Каш чижектен сайгарып көрээлем.

Пасха. «Британ энциклопедияда» чугаалаан: «Чаа дугуржулга–чагыгда Иисустуң диргизиишкинин байырлаарынче чүү-даа айытпайн турар». Пасханы Иисустуң диргизиишкининге тураскаадып, демдеглеп турар-даа болза, ооң ёзулалдары хөй бурганныг шажындан укталган. Чижээ, Пасхада  тоолай — «хөй бурганныг шажынга хамаарылгалыг дүжүткүр болурунуң символ-демдээ» деп «Католиктиг энциклопедияда» чугаалаан. А «Улуг совет энциклопедияда» бижээн: «Хөй бурганныг шажынның часкы байырлалы христиан П[асхага] янзы-бүрү ёзулалдарны берген. Чижээ: куличти ыдыкшыдарын, пасха быштаан кылырын база чуургаларны өңнеп-будуурун болгаш оон-даа өске» (2-ги үндүрүлге, том 32, 1955 чыл).

Чаа чыл. Чылдың эгези янзы-бүрү чоннарда аңгы-аңгы үеде эгелеп турар, ынчангаш чурт бүрүзү Чаа чылды бодунуң аайы-биле байырлап турар. «Уорлд бук» энциклопедияда ол байырлалдың кайыын укталганының дугайында мынча деп бижээн: «Чылдың эгези январь 1-ден эгелээрин римниң чагырыкчызы Юлий Цезарь б.э. чедир 46 чылда доктааткан. Римчилер ол хүннү Янус дээр — эрткен биле келир үениң база шупту эгелээшкиннерниң бурганынга тураскааткан. Январь айны ийи арынныг: бирээзи бурунгаар, а өскези дедир көрүнген, Янус деп бурганга тураскаадып адаан». Ынчаарга Чаа чыл байырлалы хөй бурганныг шажынның ёзулалдарындан укталган деп көскү-дүр.

Хеллоуин. «Американ энциклопедияда» бижип турар: «Хеллоуинниң ёзулалдары христиан эпоха үнмээнде-ле тыптып келген, ынчангаш друидтерниң [бурунгу кельт чоннуң хамнарының] ёзулалдары болгаш чүдүлгези-биле холумактыг турган. Кельттер байырлалдарны ийи кол бурганнарга — хүн бурганынга база өлүглерниң бурганынга тураскаадып, эрттирип чораан. Олар өлүглерниң бурганын ноябрь 1-де (ол хүн кельттерде чаа чылдың эгези турган) алдаржыдып чораан. Сөөлзүредир ол байырлал христиан байырлалдарның аразынче кире берген».

Өске байырлалдар. Делегейде демдеглеп турар шупту байырлалдарны бо номга сайгарып-шинчилээри болдунмас. Ынчалзажок кижилерни азы организацияларны алдаржыдып турар байырлалдар Иеговага таарымчалыг эвес деп билдингир (Иеремия 17:5—7; Ажыл-чорудулга 10:25, 26). Шажынга хамаарылгалыг байырлалдар Иеговага таарымчалыг бе деп чүвени тодарадып алырынга, оларның укталганы дузалаар деп, утпас болза эки (Исаия 52:11; Ажыдыышкын 18:4). Янзы-бүрү байырлалдарга киржиринге Бурган кандыг хамаарылгалыг деп чүвени билип алырынга, бо номнуң 16-гы эгеде сайгарып каан библейжи дүрүмнер сеңээ дузалаар.