Иаковтуң өг-бүлезин Египетке израильчилер деп адап эгелээн. Иаков биле Иосиф чок апаарга, Египетке өске фараон чагырып эгелээн. Израильчилер египетчилерден артык күштүг апаар деп бодааш, ол коргуп турган. Ынчангаш фараон оларга тууйбулар кылдыртып, шөлге хөй ажылдадып, кулдары кылып алган. Израильчилер хөй ажылдаан тудум, дам-на өзүп-көвүдеп, күштүг апарган. Фараон аңаа таарзынмайн, чаа төрүттүнген израиль оолдарны өлүрерин дужааган. Израильчилер кайы хире корткан деп бодаар сен?

Иохаведа дээр израиль кижи аажок чараш оол божуп алган. Оглун камгалаар дээш, ол ону кулузун хааржакка суккаш, Нил хемниң эриинге кулузун аразынга чажырып каан. Оолдуң угбазы Мариам ырак эвеске туруп алгаш, чүү болурун көрүп турган.

Хемге фараоннуң уруу эштир дээш чедип келгеш, ол хааржакты көрүп каан. Ооң  иштинде чаш төл аажок ыглап турар боорга, ол ону кээргей берген. Мариам аңаа чеде бергеш: «Силерге чаш төлдү өстүржүп бээр кижини тып бээйн бе?» — деп айтырган. Фараоннуң уруу чөпшээрежирге, Мариам авазы Иохаведаны эккелген. Фараоннуң уруу аңаа: «Бо оолду өстүржүп берип көр, сеңээ төлеп бээр мен» — дээн.

Ол төл өзүп кээрге, Иохаведа ону фараоннуң уруунга эккелген. Ол оолду Моисей деп адап алгаш, бодунуң оглу дег азырап турган. Моисей фараоннуң уруунуң оглу болгаш, күзээн-не чүүлүн ап болур турган. Ынчалза-даа Моисей Иегованы кажан-даа утпайн чораан. Ол ёзулуг ада-иезин египетчилер эвес, а израильчилер деп билир турган. Ынчангаш ол Иеговага бараалгаар деп бодап алган.

Моисей 40 харлыг тургаш, чонунга дузалажыксай берген. Бир катап египетчи кижи израиль кулду эттеп турар боорга, Моисей египетчини күштүг шанчыптарга, оозу өлүп калган. Ол ооң мага-бодун элезинге хөөп каан. Ооң дугайында фараон билип кааш, Моисейни өлүрерин дужааган. А Моисей Мадиан деп черже дезе берген. Аңаа ооң дугайында Иегова сагыш човап турган.