КЫЗЬЫ Иегова юрттӥз адямиослы сӥзем Мессияез тодманы? Ойдолэ учкомы, мар луиз, Еврей Гожтэмъёсты гожъянэз йылпумъям бере ог 400 ар ортчыса. Мария нылмурт доры, кудӥз Галилеялэн уйпалысьтыз Назарет карын улэ вал, аспӧртэмлыко куно лыктӥз, Гавриил нимо кылчин. Со вераз, Мария вылэ святой дух, яке Инмарлэн кужымез, васькоз но, Мария пи ваёз шуыса, пиосмуртэн кӧламын ӧй вал на ке но. Солэн пиналыз сӥзем Эксэй луоз но пумтэм вапумъёс ӵоже кивалтоз. Инмар Пиезлэсь улонзэ инмысен Мариялэн пушказ выжтоз.

Мария сётэм косонэз быдэстыны данэн лыдъяз. Солэн Иосиф нимо вуоно картэз доры, кудӥз тӥрен ужась вал, Инмар кылчинэз ыстӥз валэктыны, малы Мария секытэн луиз. Со бере соос кузпалъяськизы. Нош кызьы быдэсмиз Мессия Вифлеемын вордӥськоз шуыса азьпалзэ верам? (Михей 5:2). Та пичи кар Назарет дорысь 140 иськемын вал ук!

Рим кивалтӥсь калыкез гожъян сярысь косон поттӥз. Адямиос ас каразы гожтӥськыны кулэ вал. Иосиф но Мария, кудӥз секытэн вал, Вифлееме мынӥзы, малы ке шуоно соослэн выжызы отысь вал, лэся (Лука 2:3). Мария гидын нылпи вайиз но сое пудо сюдон тусе понӥз. Инмар трос кылчинъёсты бусыысь пудо возьмасьёслы ивортыны ыстӥз, вордӥськем пинал — со сӥзем Мессия, яке Христос, шуыса.

Берлогес мукет сямен но возьматэмын вал, Иисус — сӥзем Мессия шуыса. Исаия пророк азьло ик вераз, адями вордскоз шуыса, кудӥз Мессиялы сюрес дасялоз (Исаия 40:3). Со адями Иоанн Пылатӥсь вал. Иисусэз адӟыса, Иоанн шуиз: «Тани Инмарлэн Ыжпиез, Со Ас вылаз дуннелэсь сьӧлыксэ басьтэ». Иоаннлэн куд-ог дышетскисьёсыз соку ик Иисус сьӧры мынӥзы. Одӥгез соос пӧлысь шуиз: «Ми Мессияез шедьтӥмы» (Иоанн 1:29, 36, 41).

Инмар ачиз но возьматӥз, со зэм шуыса. Куке Иоанн Иисусэз пылатӥз, инмысь Иеговалэн куараез кылӥськиз. Иисусэз святой духен зырӟыса, Инмар сое Мессияе пуктӥз но вераз: «Та Мынам Яратоно Пие, Со бордын Мынам ӟеч эрике» (Матфей 3:16, 17). Тани, кема возьмам сӥзем Мессия!

Ку со луиз? Со луиз а. э. 29-тӥ арын — ӵапак соку йылпумъяськизы Даниилэн верам 483 аръёс. Ми юн оскыны быгатӥськомы, Иисус, зэмзэ но, Мессия, яке Христос, луэ шуыса! Мар сярысь тодытӥз Иисус, музъем вылын улыкуз?

Пыкиськемын: Матфей, 1—3-тӥ люкетъёс; Марк, 1-тӥ люкет; Лука, 2-тӥ люкет; Иоанн, 1-тӥ люкет.