Һәзрити Әйса төләм сүпитидә җенини пида қилип, Худаға садақәтмән кишиләрни қутқузған (Мәтта 20:28). Шуңа, у Муқәддәс китапта «дунияниң ниҗаткари» яки қутқазғучиси дәп аталған (Йоһанниң 1-хети 4:14). Шуниңдәк Язмиларда: «Башқа һечкимдә қутқузулуш йоқ, чүнки ниҗат тепишимиз үчүн, асман астида адәмләргә берилгән башқа һеч исим йоқтур»,— дәп йезилған (Әлчиләр 4:12).

 Әйса Мәсиһ өзигә ишәнгән һәрбир киши үчүн өлүмниң тәмини тетиған (Ибранийларға 2:9; Йоһан 3:16). Кейинирәк, Худа уни өлүмдин тирилдүргән. Һәзрити Әйса роһий шәхс сүпитидә асманға қайтқан еди (Әлчиләр 3:15). У йәрдә Мәсиһ Әйса «өзи арқилиқ Худаға йеқинлишиватқанларни пүтүнләй қутқузушқа қадир. Чүнки у мәңгү яшиғачқа, дайим улар үчүн васитичиси сүпитидә хизмәт қилиду» (Ибранийларға 7:25, ЙД).

Немә үчүн биз Әйса Мәсиһниң васитичилик қилишиға муһтаҗ?

 Һәммимиз гунакар бәндиләр (Римлиқларға 3:23). Гуна Худа билән бизниң оттуримизда тосалғу болуп өлүмгә йетәкләйду (Римлиқларға 6:23). Бирақ Әйса Мәсиһ өзиниң төләм қурбанлиғиға ишинидиған кишиләр үчүн васитичиси сүпитидә хизмәт қилиду (Йоһанниң 1-хети 2:1). У васитичилик қилип, Худадин бу кишиләрниң дуалириға қулақ селишини вә өзиниң төләм қурбанлиғиға асасида гуналирини кәчүрүшини сорайду (Мәтта 1:21; Римлиқларға 8:34). Худа Әйса Мәсиһ арқилиқ шу кишиләрниң дуалириға җавап бериду. Чүнки улар Униң ирадисигә уйғун. Тәңри Йәһва «дунияни... қутулдуруш үчүн» Әйсани йәр йүзигә әвәткән (Йоһан 3:17).

Қутқузулуш үчүн һәзрити Әйсаға ишинишниң өзила йетәрликму?

 Яқ. Гәрчә қутқузулуш үчүн Әйса Мәсиһкә ишинишимиз керәк болсиму, биз башқа ишларни қилишимиз зөрүр (Әлчиләр 16:30, 31). Муқәддәс китапта: «Роһсиз тән өлүк болғандәк, иш-һәрикәтсиз иманму өлүктур»,— дәп йезилған (Яқуп 2:26, ЙД). Қутқузулуш үчүн төвәндики ишларни қилишимиз лазим:

•   Әйса Мәсиһ вә униң Атиси Йәһва һәққидә үгиниш (Йоһан 17:3).

•   Уларға болған ишәнчимизни күчәйтиш (Йоһан 12:44; 14:1).

•   Уларниң буйруқлириға бойсунуш арқилиқ иман-етиқадимизни көрситиш (Луқа 6:46; Йоһанниң 1-хети 2:17). Һәзрити Әйса «“мән Мәсиһ үчүн хизмәт қиливатимән” дегәнләрниң һәммисила» әмәс, «пәқәт асмандики Атамниң ирадисини орунливатқанлар» қутқузулиду дәп тәлим бәргән (Мәтта 7:21, ЙД).

•   Қийинчилиқларға бәрдашлиқ берип, иман-етиқадимизни давамлиқ көрситиш. Чүнки һәзрити Әйса: «Ахирғичә бәрдашлиқ бәргәнләр қутқузулиду»,— дегән (Мәтта 24:13, ЙД).