Ondaka antikristu, yopiwa kondaka yo Helasi yi lomboloka okuti “o likala (ale o li kapa pocitumãlo ca) Kristu. Ondaka yaco ka yi tiamisiwila komunu umosi lika ale kocisoko cimue, momo Embimbiliya li popia okuti, kuli “va antikristu valua.” (1 Yoano 2:18) Omo liaco, “antikristu” omunu wosi:

•   O likala okuti Yesu eye Kristu (Mesiya), ale eye Omõla a Suku.—1 Yoano 2:22.

•   O katukila Kristu, Ombuavekua ya Suku.—Olosamo 2:1, 2; Luka 11:23.

•   O liviaviaya okuti, eye Kristu.—Mateo 24:24.

•   O lambala olondonge via Kristu, momo ndomo Yesu a ci popia, wosi o lambalala olondonge viaye o kasi oku u lambalala eye.—Ovilinga 9:5.

•   O li tukula okuti Ukristão, pole, o linga eci ka ca sungulukile kuenda o kemba vakuavo.—Mateo 7:22, 23; 2 Va Korindo 11:13.

 Ndaño Embimbiliya li tukula omanu va lekisa ovilinga ndolo antikristu, olio li va tukulavo ndocimunga ca va “antikristu.” (2 Yoano 7) Antikristu wa molẽha kotembo yovapostolo kuenda o kasi oku amamako toke cilo. Embimbiliya lia popele ale okuti, eci oco ca laikele oku pita.—1 Yoano 4:3.

•   Ovo va sandeka ovisimĩlo viesanda viatiamẽla ku Yesu. (Mateo 24:9, 11) Ndeci, ovo va longisa okuti, Suku Umosi Muvatatu, ale Yesu eye Suku Ukuonene Wosi. Pole, va kasi oku longisa ovina via litepa levi Yesu a longisa, momo eye wa popia hati: “Tate wa mbelapo, ame ndi sule.”—Yoano 14:28.

•   Va antikristu ka va tava kueci Yesu a popia ndomo Usoma wa Suku wa laikele oku talavaya. Asongui vamue vetavo va popia okuti, Kristu o viala pocakati colombiali viomanu. Pole, eci ci li patãla leci Yesu a popia hati: “Usoma wange ka u pangi onepa koluali lulo.”—Yoano 18:36.

•   Ovo va popia okuti Yesu eye Ñala, pole, ka va pokola kolonumbi viaye, ndeci yoku kunda olondaka viwa Viusoma.—Mateo 28:19, 20; Luka 6:46; Ovilinga 10:42.