ONEPA YAKUÃLA
Oku Livetela Evelo—“Njelise Ekandu Liange”
“Upange wange wokaliye wa pongolola ekalo liomuenyo wepata liange, kuenda wa ndi kokela oku linga ovina viosi ka via sungulukile. Nda fetika oku sambiliya oloneke vioku citiwa, oku enda kovipito viatiamẽla kopulitika, loku endaenda konembele. Nda kala Ombangi ya Yehova, pole, nda liwekapo oku endaenda kolohongele kuenda kupange woku kunda vokuenda kueci ci soka 40 kanyamo. Osimbu otembo ya kala oku pita, nda simĩle okuti Yehova ka ngecela. Nda simĩlevo okuti si pondola oku liecela ame muẽle. Noke nda limbuka okuti nda kũlĩhĩle ocili osimbu sia nõlele onjila ka ya sungulukile.”—Martha.
OKU LIVETELA EVELO ci pondola oku kala ocilemo cinene. Soma Daviti wa soneha hati: “Ovakandu ange a pitahãla utue wange, a nema enene ndocitele ci lema.” (Osamo 38:4) Akristão vamue va sumuile calua omo lioku sima okuti Yehova lalimue eteke a va ecela. (2 Va Korindo 2:7) Anga ocisimĩlo eci cocili? Ndaño okuti wa linga ekandu linene, anga Yehova wa ku ivalako okuti lalimue eteke a ku ecela vali? Sio, hacoko!
“Tu Lisunguluisi”
Yehova ka ivala vakuakandu va likekembela. Eye o va sandiliya! Yesu volusapo luomõla ocisandui, wa sokisa Yehova la isia umue ukuacisola okuti omõlaye wa siapo epata kuenje wambata omuenyo umue ũvi. Vokuenda kuotembo omõla wa nõlapo oku tiuka. Embimbiliya li popia hati: “Osimbu [omõla] a kasi handi kupala, isiaye wo mola, kuenje wo kuatela ohenda, wa lupuka, wo limbila posingo, yu wo sipula.” (Luka 15:11-20) Anga hẽ o yongola oku amela ku Yehova, pole, o sima okuti ‘handi o kasi ocipãla’ laye? Ndeci isia wa tukuiwa volusapo lua Yesu, Yehova o ku kuetelevo ohenda. Eye o yongola okuti ove o tiuka kokuaye.
Nye ci lingiwa nda wa sima okuti akandu ove alua enene kuenje Yehova ka ku ecela? Konomuisa elaleko lia Yehova li sangiwa kelivulu lia Isaya 1:18, li popia hati: “‘Ca popia Yehova ceci, hati, Enjui, tu lisunguluisi.’ ‘Ndaño akandu ene a kusuka ngẽ ndonanga yohusu, a yela ndocikokoto.’” Ocili, ndaño akandu ana a kasi ndetota li kusuka kuwalo u yela, Yehova o pondola oku a ecela.
Yehova ka yongola okuti ove amamako oku tala ohali omo lioku livetela evelo. O pondola oku sanga ndati elembeleko li tunda kongecelo ya Suku kuenda koku kuata utima wa yela? Kũlĩhĩsa ovina vivali Soma Daviti a linga. Catete eye wa popia hati: “Ndi likekembela ku Yehova okulueya kuange.” (Osamo 32:5) Ivaluka okuti Yehova wa ku laleka ale oku amela kokuaye omo liohutililo kuenda oku ‘lisunguluisa’ laye. Tava kelaleko liaco. Likekembela akandu ove ku Yehova, kuenda u sapuila ovisimĩlo viove. Omo liovina a linga, Daviti wa likutilila hati: “Sukule ciwa ciwa evĩho liange. ... A Suku, ove ku timi utima wa teka.”—Osamo 51:2, 17.
Cavali, Daviti wa tambula ekuatiso konumiwa ya Suku okuti uprofeto Natana. (2 Samuele 12:13) Koloneke vilo, Yehova wa sokiya akulu vekongelo va pindisiwa okuti va kuatisa vakuakandu vana va likekembela oco va tumbulule ukamba wavo la Yehova. Nda wa sandiliya akulu vekongelo, ovo va ku lekisa ovinimbu vimue Viovisonehua, loku linga olohutililo oco va lembeleke utima wove, kuenje eci ci ku kuatisa oku yuvula ovisimĩlo ka via sungulukile, kuenda o pama vali kespiritu.—Tiago 5:14-16.
Yehova o yongola okuti ove o sanga elembeleko li tunda koku kuata utima wa yela
“Wa Sumũlũha u Okulueya Kuaye Kua Eceliwa”
Ove pamue o sima okuti oku litavela akandu ove ku Yehova Suku kuenda oku sandiliya akulu vekongelo ca tĩla calua kokuove. Daviti wa kuatele ovisimĩlo vimuamue. Eye ‘ka litavelele akandu aye’ okatembo kamue. (Osamo 32:3) Noke wa limbuka esilivilo lioku litavela akandu aye kuenda oku pongolola ekalo liaye.
Esilivilo lia velapo lieli liokuti Daviti wa kuata vali esanju. Eye wa soneha hati: “Wa sumũlũha u okulueya kuaye kua eceliwa kuenda ekandu liaye lia tuvikiwa la Suku.” (Osamo 32:1) Eye wa likutililavo hati: “A Yehova, situlula omela yange, kuenje mu tunda esivayo liove.” (Osamo 51:15) Omo lioku yuvula oku livetela evelo kuenda omo lioku tambula ongecelo ya Suku, Daviti wa vetiyiwa oku sapela la vakuavo catiamẽla ku Yehova.
Yehova o yongola okuti ove o sanga elembeleko li tunda koku kuata utima u yela. Eye o yongolavo okuti ove o sapuila vakuene catiamẽla kokuaye kuenda kocipango caye, loku yuvula oku livetela evelo, kuenje o kuata esanju lialua. (Osamo 65:1-4) Ivaluka elaleko eye a linga liokuti, ‘akandu ene a ecelua, kuenda okuti kuiya oloneke viekavuluko vi tunda ku Yehova.’—Ovilinga 3:19.
Eci oco ca pita la Martha. Eye wa popia hati: “Omõlange wamamako oku ndi tumisa Utala Wondavululi kuenda o Despertai! Nda fetika oku amela vali ku Yehova kamue kamue. Eci ca tĩlilepo vali, oku tiuka loku pinga ongecelo yakandu osi nda linga. Pole, noke nda amela ku Suku vohutililo kuenda nda pinga oco eye a ecele akandu ange. Sia tavele okuti pa pita ale 40 kanyamo osimbu sia tiukile ku Yehova. Ulandu wange weca uvangi wokuti ndaño pa pita anyamo alua, omunu o pondola oku kuata vali epuluvi lioku vumba Suku kuenda oku tiuka kocisola caye.”
Ove o ka ci Sola
UTALA WONDAVULULI WELILONGISO
Ongecelo Ya Yehova Yi Lomboloka Nye Kokuove?
Onjila ndomo Yehova a tata vana va lueya kosimbu ci tu longisa calua catiamẽla konjongole yaye yoku ecela.
Kuata Ukamba Wocili la Yehova
