Yovi 1:1-22
1 Vofeka yo Usi mua kala ulume umue o tukuiwa hati, Yovi.*+ Eye wa kala ukuesunga kuenda ukuacili;*+ eye wa sumbilile Suku kuenda wa enda oku yuvula eci cĩvi.+
2 Eye wa linga isia yomãla epanduvali valume kuenda omãla vatatu vakãi.
3 Voviunda viaye mua kala 7.000 kolomeme, 3.000 kolongamelo, 1.000 kolongombe, 500 kovimbulu* kuenda wa kuatelevo apika valua kuenje eye wa kuata ukuasi walua okuti, omanu vosi vo Kutundilo ci sule.
4 Omãla vaye valume omunu lomunu wa kuatele ocituwa coku linga ocipito cimue konjo yaye muẽle veteke lio sokiyiwila. Ovo va enda oku laleka vamanjavo vatatu vakãi oco va lie loku nyuĩla kumosi.
5 Eci oloneke viovipito vi pua, Yovi wa enda oku tuma oku va vilikiya oco a va yelise kovaso a Suku. Kuenje eye wa enda oku pasoka selo komẽle loku va lumbilako omunu lomunu ocilumba coku pia elisi.+ Momo Yovi wa enda oku popia hati: “Pamue omãla vange va linga ekandu kuenda va siñala Suku vovitima viavo.” Eci oco Yovi a enda oku linga olonjanja viosi.+
6 Kueya eteke eci omãla va Suku yocili*+ va iñila loku talama kovaso a Yehova+ kuenda Satana+ wa iñilavo pokati kavo.+
7 Kuenje Yehova wa pula Satana hati: “Pi o tundilila?” Satana wa kumbulula Yehova hati: “Nundilila koku ñuala ñuala kilu lieve loku endelamo.”+
8 Yehova wa sapuila Satana hati: “Ove hẽ wa limbuka* ukuenje wange Yovi? Ka kuli omunu wa lisoka laye kilu lieve. Eye wa suñama kuenda ukuesunga,*+ wa sumbila Suku kuenda o yuvula eci cĩvi.”
9 Kuenje Satana wa kumbulula Yehova hati: “Nda Yovi ka kuatele lacimue anga hẽ nda wa sumbila Suku?+
10 Kua kapele hẽ ocimbaka cimue coku u teyuila,+ loku teyuila onjo yaye kuenda ovina viosi eye a kuete? Ove wa sumũlũisa upange wovaka aye+ kuenda oviunda viaye via lisanduila vofeka.
11 Pole, olõla eka liove, upa ovina viosi eye a kuete kuenje o mola okuti eye o ka ku siñala kovaso yove.”
12 Kuenje Yehova wa sapuila Satana hati: “Tala! Ovina viosi eye a kuete vi kasi peka liove. Pole, ku ko lambe!” Omo liaco, Satana wa tunda kovaso a Yehova.+
13 Kuenje eteke limue, eci omãla valume kuenda omãla vakãi va Yovi va kala oku lia loku nyua ovinyu konjo ya huvavo,+
14 omunga yimue yeya ku Yovi kuenje ya popia yiti: “Eci olongombe via kala oku senda kuenda ovimbulu via kala oku lia konele yavio,
15 va Savea veya kuenje va vi ambata kuenda va ponda apika losipata. Ame lika nda puluka oco ndu ku ci sapuile.”
16 Osimbu a kala oku vangula, ukuavo weya kuenda wa popia hati: “Kovailu kua loka ondalu ya tunda ku Suku* kuenda ya timĩha olomeme kumue langombo kuenje ya va lia! Ame lika nda puluka oco ndu ku ci sapuile.”
17 Osimbu a kala oku vangula, ukuavo weya kuenje wa popia hati: “Va Kaldea+ va sokiya ovimunga vitatu, va ñuala olongamelo kuenda va vi ambata kuenje va ponda apika losipata. Ame lika nda puluka oco ndu ku ci sapuile.”
18 Osimbu a kala oku vangula, kueya vali ukuavo kuenda wa popia hati: “Omãla vove valume lomãla vove vakãi va kala oku lia loku nyua ovinyu konjo ya huvavo.
19 Vocipikipiki kueya ofela yimue yinene ya tunda vekalasoko ya veta kavindi akuãla yonjo kuenje oyo ya kupukila kamalẽhe, yu va fa. Ame lika nda puluka oco ndu ku ci sapuile.”
20 Yovi wa votoka, wa tola uwalo waye kuenda wa teta esinga liutue waye; kuenje wa wila posi kuenda wa kekama,
21 loku popia hati:
“Lepõlõla nda tunda vimo lia ina yange,Kuenda lepõlõla ndi tiukila.+
Yehova wa eca+ kuenda Yehova wa tambula.
Onduko ya Yehova yamameko oku sivayiwa.”
22 Kovina viosi evi, Yovi ka lingile ekandu ale oku lundila Suku okuti, wa linga cimue cĩvi.
Atosi Pombuelo
^ Citava okuti, yi lomboloka “Ocikuata Cesuvu.”
^ Ale “wa pua etondelo.”
^ Lit., “olomange viovimbulu.”
^ Kelimi lio Heveru yi tiamisiwila komãla va Suku ovangelo.
^ Lit., “wa kapa utima wove.”
^ Ale “wa pua etondelo.”
^ Ale pamue, “Ociliakulo.”
