Nda o yongola oku kũlĩha ciwa omunu umue, o sukila oku lilongisa ovina a linga kuenda ovitangi a liyaka lavio. Cimuamue haico okuti, nda tu yongola oku kũlĩha ciwa Suku, tu sukila oku lilongisa ovina a siata oku linga. Osimbu o likolisilako oku ci linga, o ka komõha poku limbuka ovina vialua eye a linga ale, oco vi tu kuatise cilo kuenda kovaso yoloneke.

Yehova Suku eye ululiki wa velapo kuenda “ovituwa viaye ka vi muiwa vi limbukiwa tunde koku lulikiwa kuoluali, momo vi muiwila kovina via lulikiwa.” (Va Roma 1:20) “Eye wa sovola osi lunene waye, haeye wa seveta oluali lolondunge viaye, kuenje wa yala ilu luloño waye.” (Yeremiya 10:12) Oviluvo vi komohĩsa, vi sitululavo ocisola Suku a tu kuetele.

Kũlĩhĩsa ndomo Yehova a panga omuenyo lonjila yimue yi komohĩsa, poku lulika omunu ‘lesetãhalo liaye.’ (Efetikilo 1:27) Eci ci lomboloka okuti wa tu lulika lonjila yi tu kuatisa oku setukula ovituwa viaye. Eye wa tu lulika lepondolo lioku kuata elomboloko liovihandeleko kuenda olonumbi viaye. Osimbu tu likolisilako oku kapako olonumbi viaco, tu kuata esanju kuenda ocimãho komuenyo. Handi vali, eye wa tu lulika lepondolo lioku kuata ukamba laye.

Ovina Suku a lulika vongongo, vi situlula ovisimĩlo a tu kuetele. Upostolo Paulu wa popia okuti Suku, “ka liwekelepo oku [tu ĩha] uvangi omo wa linga ovina viwa poku [tu ĩha] ombela ya tunda kilu, apako vovovo alio, loku yukisa ovitima [vietu] lokulia kuenda esanju.” (Ovilinga 14:17) Suku o tu ĩha ovina vialua tu sukila oco tu kale lomuenyo loku yeva esanju. Ovina viaco vi situlula eci a tu yonguilile.

Yehova wa lulika ongongo oco omanu va kailemo otembo ka yi pui. Embimbiliya hati: “Ilu lia Yehova,  ongongo puãi wa yeca komãla vomanu” kuenda eye “ka yi sowilile ekalasoko, te yoku tungamo.” (Osamo 115:16; Isaya 45:18) Helie o tungamo kuenda vokuenda kuoloneke viñami? “Olondingesunga vi piñala ofeka, vi tungamo oloneke ka vi pui.”—Osamo 37:29.

Yehova wa lulika Adama la Heva kuenda wa va kapa vocumbo celau palo posi, ‘ha va ci limi loku ci tata.’ (Efetikilo 2:8, 15) Suku wa va ĩha ocikele cimue ci komohĩsa poku va sapuila hati: “Liciti, siati, yukisi oluali, lu yuli.” (Efetikilo 1:28) Adama la Heva va kuatele elavoko lioku kala otembo ka yi pui palo posi. Pole, ovo va nõlapo oku sinĩla Suku kuenda va pumba epuluvi lioku kala pokati ‘kolondingesunga vi piñala ofeka.’ Ndomo tu ka ci kũlĩhĩsa, ovilinga viaco ka via pongoluile ocipango ca Yehova catiamẽla kokuetu ale kongongo. Catete, tu kũlĩhĩsi ovina Suku a linga ale.

Embimbiliya lia kũlĩhĩwavo okuti Ondaka ya Suku. Momo lie Yehova a tu ĩhila Embimbiliya? Eye wa ci lingila oco tu lilongise ovina viatiamẽla kokuaye. (Olosapo 2:1-5) Ocili okuti, Embimbiliya ka li tambulula apulilo osi a tiamẽla ku Suku kuenda ka kuli elivulu likuavo li pondola oku eca elomboluilo liaco. (Ukundi 3:11) Pole, ovina viosi vi sangiwa Vembimbiliya, vi tu kuatisa oku kũlĩha Suku. Lekuatiso Liembimbiliya tu kũlĩha ndomo eye a siata oku tata omanu. Tu pondola oku limbuka ovituwa eye a sole levi ka sole. (Osamo 15:1-5) Tu lilongisa ovisimĩlo viaye viatiamẽla kefendelo, kovituwa kuenda kovokuasi. Embimbiliya li tu lomboluila ovituwa via Yehova via situluiwa kolondaka Viomõlaye, Yesu Kristu.—Yoano 14:9.

Esunga likuavo lieci Yehova a tu ĩhila Embimbiliya lieli okuti, tu pondola oku lilongisa ndomo tu kuata esanju kuenda ocimãho komuenyo. Lekuatiso Liembimbiliya, Yehova o tu sapuila ndomo tu kuata esanju vepata, oku sanjukila ovina tu kuete kuenda oku yuvula oku sakalala. Ndomo ca lomboluiwa vo revista yilo, Vembimbiliya mu sangiwa atambululo kapulilo a velapo ndeci: Momo lie tu talela ohali? Nye ci ka pita kovaso yoloneke? Li lombololavo eci Suku a ka linga oco ocipango caye ci tẽlisiwe.

Embimbiliya elivulu limue lia litepa volonjila vikuavo. Olio lia sonehiwa leci ci soka 40 kalume vokuenda kueci ci soka 1.600 kanyamo, pole li kuete lika osapi yimosi momo Suku eye Usovoli walio. (2 Timoteo 3:16) Ca litepa lalivulu akuavo osimbu ceci okuti, olio lia siata oku teyuiwa ciwa vokuenda kuotembo, ndomo ci limbukiwila koviña Viembimbiliya via sonehiwa osimbu. Handi vali, olio li kasi oku amamako ndaño lalikolisilo va siata oku linga oco ka li ka pongoluiwe, ka li ka sandekiwa kuenda oku tangiwa. Pole, koloneke vilo, Embimbiliya olio elivulu lia siata oku sandekiwa calua kuenda oku pongoluiwa. Omo okuti Embimbiliya li kasi oku amamako toke cilo, ci situlula okuti “ondaka ya Suku yetu yi tumãla ño-o hũ.”—Isaya 40:8.

Ocina cikuavo Suku a linga, eliangiliyo li likasi lioku sokiya okuti ocipango caye catiamẽla kokuetu ci tẽlisiwa. Ndomo ca tukuiwa ale, Suku wa yonguile okuti omanu va kala otembo ka yi pui palo posi. Omo liaco, eci Adama la Heva va nõlapo oku sinĩla Suku kuenda oku linga ekandu, ovo kumue locitumbulukila cavo va pumba epuluvi lioku kuata omuenyo ko pui. “Ndeci ekandu lia iñila voluali omo liomunu umosi kuenda oku fa omo liekandu kuenje oku fa kua li sanduila komanu vosi momo vosi va linga ekandu.” (Va Roma 5:12) Omo liekandu Adama a linga, ocipango ca Suku ka ca tẽlisiwile. Nye Yehova a linga?

Ovilinga via Yehova vi likuata lovituwa viaye. Eye wa pisa Adama la Heva omo liekandu va linga pole omo liocisola, wa linga eliangiliyo lioku popela ocitumbulukila cavo. Yehova luloño waye, wa nõla ndomo ocitangi caco ci potoluiwa kuenda wa situlula onjila a nõlapo. (Efetikilo 3:15) Ovo va laikele lika oku yovuiwa kekandu kuenda  kolofa lekuatiso lia Yesu Kristu, Omõla a Suku. Nye ca kongela vovina viaco?

Oco omanu va yovuiwe kekandu Adama a linga, Yehova wa tuma Yesu palo posi oco a longise ovituwa ovo va sukila oku kuata kuenda wa “eca omuenyo waye ndocisembi coku yovola omanu valua.” * (Mateo 20:28; Yoano 14:6) Catava okuti Yesu eca ocisembi momo wa lipuile ndeci Adama a lipuile. Pole, ca litepa la Adama ceci okuti, Yesu wa amamako oku pokola toke kolofa. Omo okuti Yesu ka sesamelele oku fa, Yehova wo pindula kuenje wa tiukila kilu. Yesu wa linga eci Adama ka lingile okuti, oku eca komanu vakuepokolo elavoko lioku kala otembo ka yi pui. “Ndeci valua va lingisua vakuakandu omo liesino liomunu umosi, cimuamue haico, omo liepokolo liomunu umosi valua va tendiwa ndavakuesunga.” (Va Roma 5:19) Lekuatiso liocisembi ca Yesu, Suku o ka tẽlisa ohuminyo yaye oco omanu va kale otembo ka yi pui palo posi.

Tu pondola oku lilongisa ovina vialua viatiamẽla ku Yehova, konjila a kuama poku potolola ovitangi vieyilila kesino lia Adama. Tua limbuka okuti lacimue ci pondola oku tateka Yehova oku tẽlisa ovina a fetika; kuenda ondaka yaye yi ka ‘tẽlisiwa.’ (Isaya 55:11) Tua lilongisavo ndomo Yehova a lekisa ocisola caye kokuetu. “Ocisola ca Suku ca situluiwa ndoco kokuetu okuti, Suku wa tuma Omõlaye wongunga voluali okuti tu kuata omuenyo mekonda liaye. Ocisola ka ci lomboloka okuti, etu tua sola Suku, puãi Suku eye wa tu sola kuenda wa tuma Omõlaye ndocilumba coku tuvika akandu etu.”—1 Yoano 4:9, 10.

Suku “ka likalele oku eca Omõlaye kokuetu vosi” kuenda tu pondola oku kolela okuti Suku o ‘ka tu ĩha ovina viosi’ a likuminya. (Va Roma 8:32) Nye Suku a likuminya okuti oco a ka tu lingila? Tanga.