NOKE YOKU PITA OCILUNGA CIMUE WA LI PULILE ALE ESUNGA LIECI ‘SUKU KA MALELAKO OVITANGI VIOSI’? ALE WA PITILE ALE LOCITANGI CIMUE CA KU VETIYA OKU LI PULA NDOCO: ANGA HẼ SUKU WA ÑAPAKO?

Citava okuti wa li yevele ale ndeci manji Sheila wo ko Estados Unidos. Omo okuti wa kulila vepata limue lia kakatelele ketavo wa popia hati: “Tunde vutila nda vetiyiwa oku sola Suku, momo eye Ululiki wetu. Pole, sia la kuata ukamba laye. Nda simaile okuti eye o ndi lete pole, o ci lingila ocipãla. Sia simĩle okuti Suku o ndi nyãle, pole sia tavelevo okuti eye wa ndi kapako.” Momo lie Sheila a kuatelele atatahãi aco? Eye wa lombolola ndoco: “Epata liange lia pita lovitangi vialua kuenje ca kala ndu okuti Suku ka tu lete oco a tu kuatise.”

Ndeci Sheila a linga, ove o kolela okuti kuli Suku Ukuonene Wosi. Vepuluvi limuamue, pamue o kuata atatahãi nda eye wa ku kapako ale sio. Yovi ulume umue ukuesunga, okuti wa kolelele kunene kuenda kolondunge Viululiki, wa kuatelevo atatahãi amuamue. (Yovi 2:3; 9:4) Eci Yovi a liyaka lovilunga vialua via molẽhele ndu okuti ka vi kuete esulilo, eye wa pula Suku hati: “Ocipala cove wa ci vundisila nye? Nye o nendela ndunyali wove?”—Yovi 13:24.

Nye Embimbiliya li popia? Anga hẽ Suku eye o kuete eko eci ku pita ovilunga? Kuli hẽ uvangi u lekisa okuti Suku wa kapako omanu vosi ale omunu lomunu pokati ketu? Anga hẽ omunu lomunu pokati ketu o pondola oku kolela nda eye wa tu kapako, o tu kuetele ohenda ale o tu kuatisa eci tu liyaka lovitangi?

Vovipama vi kuãimo, tu ka limbuka okuti onjila ndomo tua lulikiwa, yi tu longisa okuti Suku wa kapako omunu lomunu pokati ketu. (Va Roma 1:20) Noke tu kũlĩhĩsa eci Embimbiliya li popia catiamẽla kocisola Suku a tu kuetele. Handi vali, poku amamako oku lilongisa Embimbiliya, loku “kũlĩhisa” ovina a lulika, o ka kolela lutima wosi okuti ‘eye o ku tata.’—1 Yoano 2:3; 1 Petulu 5:7.