Ombanjaile yipi o sanjukila oku tambula? Vosi yetu tu sanjukila oku tambula ombanjaile ya umue wa vetiyiwa locisola okuti ka yeci omo lioku kisikiwa. Oku eca lutima wosi ci kuete esilivilo kokuetu. Pole, ci kuete esilivilo lia velapo ku Suku. Kũlĩhĩsa olondaka upostolo Paulu a soneha vukanda 2 Va Korindo 9:7.

Momo lie upostolo Paulu a sonehẽla olondaka evi? Eye wa yonguile oku vetiya Akristão va Korindo oco va kuatise va manjavo va kala ko Yudea. Anga hẽ wa seteka oku kisika va Korindo oku eca olombanjaile? Sio, eye wa soneha ndoco: “Omunu omunu a ece ndeci a panga kutima waye; ha locikukuiko pamue omo a kisikiwa, momo Suku o sole u eca lesanju.” Omo liaco, tu sukila oku kapako olondaka evi.

‘Omunu a ece ndeci a panga vutima waye.’ Paulu wa limbuka okuti Ukristão wocili eca momo wa nõlapo oku ci linga “lutima wosi.” Ukristão wocili o sokolola lutate ovina vamanjaye ketavo vasukila. Onoño yimue ya popia hati kelimi liatete, ondaka “ndeci omunu a panga,” yi lomboloka “onjongole yoku linga cimue.” Ukristão o kũlĩhĩsa ovina vamanji va sukila kuenda o sokolola ndomo a vakuatisa.—1 Yoano 3:17.

“Ha locikukuiko pamue omo a kisikiwa.” Paulu wa tukula ovituwa vivali Akristão vocili va sukila oku yuvula ndeci: Oku eca locikukũi, kuenda oku kisikiwa. Kelimi lio Helasi ondaka “ocikukũi” yi lomboloka “ekambo lioku lisiõsiõla.” Elivulu limue lia lombolola ndoco: Omunu ukuacikukũi kaci “lutima wosi, momo weca lesumuo, ca piãla enene nda weca olombongo.” Omunu o kisikiwa eca omo a vetiyiwa oku ci linga. Helie pokati ketu o sanjukila oku tambula ombanjaile komunu umue okuti o yeca locikukũi ale wa kisikiwa oku ci linga?

“Suku o sole u eca lesanju.” Paulu wa lekisa okuti, Ukristão o yongola oku eca ombanjaile, o sukila oku ci linga lesanju. Ocili okuti, esanju li tunda koku eca lutima wa sunguluka. (Ovilinga 20:35) Esanju li tunda koku eca li limbukiwa la vakuetu. Ondaka “esanju” yi situlula ovina vivali, ovisimĩlo viutima kuenda esanju omunu a lekisa poku eca. Omunu eca lesanju o vetiya utima wetu. Eye o vetiyavo utima wa Suku. Embimbiliya li popia okuti, “Suku o sole u eca lesanju.”

Olondaka via Suku via sonehiwa lupostolo Paulu, vi kuatisa Akristão oku kuata ocituwa co ku eca lesanju. Citava okuti tu eca otembo yetu, ongusu yetu ale ovina vikuavo tu kuete, momo tu yongola oku lingila ovina viwa vakuetu ca piãla enene vana va sukila ekuatiso. Olombanjaile viaco ka vi tu sanjuisa lika etu, pole, vi sanjuisavo Suku, momo ‘o sole vana va eca lesanju.’