OSAPI YO KOÑOÑO | O PONDOLA OKU KUATA UKAMBA LA SUKU
Ove hẽ wa Kũlĩha Kuenda wa Siata Oku Tukula Onduko ya Suku?
Anga hẽ citava oku kuata ukamba lomunu umue okuti kua kũlĩhile onduko yaye? Sio. Ukãi umue ko Bulgaria londuko Irina wa popia siti: “Nda kua kũlĩhĩle onduko ya Suku, ku pondola oku kuata ukamba laye.” Ndomo ca lekisiwa vocipama ca pita, Suku o yongola okuti ove o kuata ukamba laye. Omo liaco, lekuatiso Liembimbiliya, eye wa lisitulula kokuove loku ku sapuila hati: “Ame Yehova, oyo onduko yange.”
Lekuatiso Liembimbiliya Suku o lisitulula kokuove poku ku sapuila hati: “Ame Yehova, oyo onduko yange.”
Anga hẽ ci kuete esilivilo ku Yehova ove oku kũlĩha onduko yaye loku yi tukula? Kũlĩhisa ndoco: Onduko ya Suku yina ya sonehiwa vololetala vikuãla kelimi lio Heveru via kũlĩhiwa hati, Tetragrama, yi moleha Vovisonehua viatete vio Heveru, ci panda 7.000 kolonjanja. Ka kuli onduko yikuavo ya tukuiwa olonjanja vialua Vembimbiliya. Eci ci lekisa okuti, Yehova o yongola okuti tu u kũlĩha loku tukula onduko yaye. *
Ukamba womanu vavali u fetika noke yoku likũlĩha kolonduko. Ove hẽ wa kũlĩha onduko ya Suku?
Vamue va sima okuti, omo Suku o kola kuenda ukuonene wosi, ka ci lekisa esumbilo oku kũlĩha onduko yaye loku yi tukula. Ndeci ka ca sungulukile oku tukula lãvi onduko yekamba liove, haico ka ca sungulukile oku tukula lãvi onduko ya Suku. Yehova o yongola okuti vana vo sole va sumbila onduko yaye kuenda oku yi sandeka. (Osamo 69:30, 31; 96:2, 8) Ivaluka okuti Yesu wa vetiya olondonge viaye oku likutilila ndoco: “A Isietu o kasi kilu. Onduko yove yi sumbiwe.” Tu pondola oku kuatisa koku sumbila onduko ya Suku poku yi sandeka. Poku ci linga ci tu kuatisa oku kuata ukamba laye.
Embimbiliya li lekisa okuti Suku wa kapako vana ‘va tukula, [ale va sokolola, loku teyuila] onduko yaye.’ (Malakiya 3:16) Catiamẽla komanu vaco, Yehova wa likuminya hati: “Ndu vindikiya omo a kũlĩha onduko yange. Eci a mbilikiya ndu tambulula. Ñala laye kotembo yohali. Ndu popela, ndu kemainya.” (Osamo 91:14, 15) Oku kũlĩha loku tukula onduko ya Suku, ci kuete esilivilo koku kuata ukamba uwa laye.
^ tini. 4 Ci sumuisa calua omo okuti Vambimbiliya alua ka mu sangiwa onduko ya Suku, ndaño okuti yi moleha olonjanja vialua Vovisonehua vio Heveru, vi tukuiwa okuti Otestamentu Yale. Ovo va piñala onduko yaco lolondaka viokuti, “Ñala” ale “Suku.” Oco o sange elomboluilo likuavo liatiamẽla kondaka eyi, tanga kamẽla 195-197 velivulu Embimbiliya Li Longisa Nye? lia sandekiwa Lolombangi Via Yehova.
Ove o ka ci Sola
UTALA WONDAVULULI
Ove hẽ wa Siata Oku Sapela la Suku?
Tu pondola oku sapela la Suku poku likutilila, pole tu u yevelela ndati?
