Tunde kosimbu omanu va siata oku sokolola ndomo omuenyo nda wa kala nda tua amaileko oku kala amalẽhe loku kuata uhayele otembo ka yi pui. Pole, ka ci tẽliwa momo tu fa. Olondaka vi sangiwa kefetikilo liocipama vina via popiwa la Yovi, okuti tunde eci via sonehiwa pa pita ale olohulukãi vitatu kanyamo, vi kasi oku tẽlisiwa toke cilo.

Kolonepa viosi violuali, omanu va kuete onjongole ya piãla yoku kala otembo ka yi pui. Embimbiliya li tu sapuila okuti Suku wa kapa vovitima vietu onjongole yoku kala otembo ka yi pui kuenda oku kuata elomboloko liaco. (Ukundi 3:11) Ove hẽ o sima okuti ca sunguluka ku Suku umue ukuacisola oku kapa vutima wetu onjongole yimue okuti ka yi tẽlisiwa? Nda wa tambulula hati sio, etambululo liove lia sunguluka. Ondaka ya Suku yi tukula olofa okuti unyãli kuenda ya likuminya okuti unyali waco “o ka imuha.”​—1 Va Korindo 15:26.

Ocili okuti, olofa unyali. Lomue ukualondunge o sanjukila olofa. Nda tu kasi kohele yimue, tu lisalamisa ale tu tila. Eci tu vela, tu sanda olonjila vioku sakuiwa oco tu kuate uhayele. Tua siata oku yuvula ovina viosi vi pondola oku koka olofa.

Anga hẽ kuli esunga lioku tava okuti unyali waco wosiahũlu eteke lime o ka imũha? Kuli. Yehova Suku, Ululiki, ka lulikile omanu oco va kaile ño okatembo kamue kuenje va fa. Olofa ka via tiamelele kocipango catete ca Suku. Eye wa yonguile okuti omanu va kala voluali otembo ka yi pui, kuenda o ka tẽlisa ocipango caye.​—Isaya 55:11.

Olofa vi ka sulila ndati? Vokuenda kuanyamo omanu va siata oku sanda olonjila viñi viñi vioku malako olofa, pole ka va kasi oku ci tela. Toke cilo, alikolisilo aco a kasi oku amamako. Olonoño via siata oku panga olovasina kuenda ovihemba vi sakula ovovei amue. Ovo va siata oku kũlĩhĩsa ndomo atimba oviendalomuenyo alulikiwa. Omo liaco, kovitumalo vimue omanu va siata oku kala otembo yalua komuneyo okuti kanyamo apita ci sule. Pole, olofa handi vi kasi ocipãla loku yuliwa. Ndomo Embimbiliya lia popia, “vosi va tiukila koneketela.”​—Ukundi 3:20.

Esapulo liwa lieli okuti, ka tu sukila oku kolela kalikolisilo omanu oku malako ocitangi colofa cina ci kasi tunde kosimbu. Yehova Suku wa linga ale eliangiliyo lioku tu yovola kolofa. Veliangiliyo liaco Yesu Kristu, eye omunu watete.