Anga hẽ wa li pulile ale nda komuenyo kuli lika oku linga olomapalo, oku talavaya, oku kuela, oku tekula epata kuenda oku kuka? (Yovi 14:1, 2) Embimbiliya li lekisa okuti ndaño omanu va loñoloha, va lingile ale epulilo liaco.—Tanga Ukundi 2:11.

Omuenyo u kuete hẽ elomboloko? Tete tu sukila oku kũlĩhisa epulilo liokuti: Pi omuenyo wa fetikila? Noke lioku konomuisa ndomo owoño wetu kuenda olonepa vikuavo vietimba lietu vi talavaya, omanu valua va limbuka okuti, tua lulikiwa Lululiki umue ukualondunge. (Tanga Osamo 139:14.) Eye wa tu lulika locipango cimue! Oku lilongisa ocipango caco, ci tu kuatisa oku kuata elomboloko liasuapo liomuenyo.

Suku wa sumũluisa olohueli viatete kuenda wa ecele kokuavo ocikele cimue cavelapo. Ocipango caye ca kala okuti, ovo va yukisa ongongo, loku yi pongolola okuti yi linge ocumbo celau kuenda omanu va ka kalamo otembo ka yi pui.—Tanga Efetikilo 1:28, 31.

Ocipango ca Suku ka ca tẽlisiwile momo omanu vatete va sinĩla ocihandeleko. Pole, Suku ka ivaleleko ocipango caye. Embimbiliya li tu sapuila okuti Suku wa siata oku talavaya oco a popele afendeli vaye vakuekolelo kuenda oku tẽlisa ocipango caye catiamẽla kongongo! Suku o yongola okuti ove o kuata elomboloko liasuapo lia tiamẽla komuenyo! (Tanga Osamo 37:29.) Lilongisa Vembimbiliya ndomo ove wa kongeliwa vocipango ca Suku.