آگے رہائشی عمارت (‏ڈی)‏ کے تہ خانے پر کام ہو رہا ہے اور پیچھے جھیل کے کنارے رہائشی عمارت (‏سی)‏ کی دیواریں بن رہی ہیں۔‏

کارکُن بنے بنائے غسل خانوں کو جوڑ رہے ہیں۔ دیواریں کھڑی کرنے کے بعد اِن میں پائپ، نلکے اور بجلی کی تاریں لگائی جائیں گی۔ غسل خانوں کو اُس وقت مکمل کِیا جائے گا جب اِنہیں عمارت میں لگایا جائے گا۔‏

پلمبر تہ خانے میں کام کر رہے ہیں۔ تعمیراتی پراجیکٹ کے دوران اِس تہ خانے کو 500 لوگوں کے لیے کھانے کے کمرے کے طور پر اِستعمال کِیا جائے گا جبکہ عمارت کے دوسرے حصوں میں تقریباً 300 لوگوں کے لیے کھانے کا اِنتظام ہوگا۔ جب تعمیر مکمل ہونے والی ہوگی تو کھانے کے اِن عارضی کمروں کو ختم کر دیا جائے گا اور اِس عمارت کو گاڑیوں کی ورکشاپ بنا دیا جائے گا۔‏

کارکُن چھت پر مصنوعی مٹی ڈال رہے ہیں جس پر بعد میں گھاس اُگائی جائے گی۔ اِس طرح عمارت میں درجۂ حرارت مناسب رہے گا، طوفانی بارشوں کی صورت میں پانی کا بہاؤ کم ہو جائے گا اور بارش کا پانی آلودگی سے پاک ہو جائے گا۔‏

اِس جگہ تین عمارتیں بنائی جائیں گی جن کا فرش کُل ملا کر 42 ہزار مربع میٹر (‏4 لاکھ 50 ہزار مربع فٹ)‏ ہوگا۔ تصویر میں ٹھیکے‌دار ستونوں کے لیے سریے ڈال رہے ہیں۔‏

کارکُن چھت پر تارکول بچھا رہے ہیں۔ اُنہوں نے حفاظتی رسیاں باندھ رکھی ہیں تاکہ وہ گِرنے سے محفوظ رہیں۔‏

اےسی اور ہیٹر کے پائپوں کی فٹنگ کی جا رہی ہے۔ واروِک میں کام کرنے والے یہوواہ کے گواہوں میں سے تقریباً 35 فیصد عورتیں ہیں۔‏

یہ جگہ فروری 2014ء میں خریدی گئی اور اِسے گودام اور صنعتی مرکز کے طور پر اِستعمال کِیا جا رہا ہے۔ اِس کا اندرونی رقبہ 20 ہزار مربع میٹر (‏2 لاکھ 20 ہزار مربع فٹ)‏ ہے۔ تصویر میں پیچھے جو سفید بکس نظر آ رہے ہیں، وہ تیارشُدہ غسل خانے ہیں۔‏

اِس عمارت میں مرکزی دفتر کے عملے کے تقریباً 200 لوگ رہیں گے۔ کمروں کا رقبہ 30 سے 55 مربع میٹر (‏350 سے 600 مربع فٹ)‏ ہوگا اور اِن میں چھوٹا سا باورچی خانہ، غسل خانہ اور چھوٹی سی بالکونی ہوگی۔‏

سائٹ کو تعمیر کے لیے تیار کِیا جا رہا ہے۔ تصویر میں پیچھے کرشر نظر آ رہا ہے۔ کھدائی کے دوران نکلنے والے پتھروں کو کرشر کے ذریعے توڑ کر بجری تیار کی جا رہی ہے جسے بعد میں تعمیر کے لیے اِستعمال کِیا جائے گا۔ جب تک تعمیراتی پراجیکٹ مکمل ہوگا، تقریباً 2 لاکھ 60 ہزار مکعب میٹر مٹی نکالی جا چکی ہوگی۔ ہر دن اوسطاً 23 ٹرک تعمیراتی سائٹ سے مٹی لے جاتے ہیں۔‏

چھت پر گھاس لگائی جا رہی ہے۔‏

یہ تصویر ایک بڑی کرین سے لی گئی جو دفتروں کی عمارت کی جگہ کھڑی ہے۔ نیچے بائیں کونے میں جو عمارت نظر آ رہی ہے، وہ مکمل شُدہ عوامی پارکنگ ہے۔ یہ عمارت ہر دن کارکنوں کی گاڑیوں سے بھری ہوتی ہے۔ یہوواہ کے کچھ گواہ 12 گھنٹے گاڑی چلا کر آتے ہیں تاکہ تین یا چار دن تک رضاکاروں کے طور پر کام کر سکیں۔‏

کھانے کا عارضی کمرا تقریباً تیار ہے۔ ٹی وی سکرین اور سپیکر لگائے جا رہے ہیں تاکہ صبح کی عبادت اور دوسرے مذہبی پروگرام جو موجودہ برانچ میں منعقد ہوتے ہیں، دیکھے جا سکیں۔‏

پہلی منزل کا فرش ڈالا جا رہا ہے۔ ایک کارکُن وائبریٹر کے ذریعے کنکریٹ میں موجود خلاؤں کو ختم کر رہا ہے تاکہ کنکریٹ اچھی طرح سے بیٹھ جائے۔‏

فرش اور دیواروں میں ایسے پائپ لگائے جا رہے ہیں جن میں بجلی کی تاریں ڈالی جائیں گی۔‏

پہلی منزل کے فرش کا کام ختم ہونے والا ہے۔ اِس پر تقریباً 540 مکعب میٹر کنکریٹ اِستعمال ہوا ہے۔ اِس تعمیراتی پراجیکٹ میں اِتنا کنکریٹ ابھی تک ایک وقت میں کہیں اَور نہیں ڈالا گیا۔ یہ کنکریٹ سائٹ پر ہی تیار کِیا گیا اور اِسے آٹھ ٹرکوں اور دو پمپوں کے ذریعے ساڑھے پانچ گھنٹے میں ڈالا گیا۔ بیچ میں جو مینار نظر آ رہا ہے، اُس میں سیڑھیاں ہیں۔‏

چھت پر منڈیر لگائی جا رہی ہے۔ تصویر میں پیچھے رہائشی عمارت (‏اے)‏ کے تہ خانے پر کام ہو رہا ہے۔‏

تیارشُدہ غسل خانہ کرین کے ذریعے تیسری منزل پر پہنچایا جا رہا ہے۔ اِس تعمیراتی پراجیکٹ میں بہت سی چیزوں کو پہلے سے تیار کر کے سائٹ پر پہنچایا گیا تاکہ سائٹ پر زیادہ رش نہ ہو اور کام بھی جلدی ہو جائے۔‏

ٹھیکے‌دار کنکریٹ کے تختے لگا رہے ہیں۔ کنکریٹ کی تیاری کے وقت اِس میں رنگ ملایا گیا تھا اِس لیے اِن تختوں پر رنگ کرنے کی ضرورت نہیں۔ یہ تختے جلدی لگ جاتے ہیں جس کی وجہ سے کافی وقت بچ جاتا ہے۔‏

تصویر میں آگے رہائشی عمارت (‏ڈی)‏ پر کام ہو رہا ہے اور اِس کے پیچھے رہائشی عمارت (‏سی)‏ تقریباً مکمل ہو چکی ہے۔‏