Genesi 9:1-29
9 Mudzimu a fhaṱutshedza Noaxe na vharwa vhawe a ri: “Bebani ni vhe vhanzhi ni ḓadze ḽifhasi.+
2 Zwivhumbiwa zwoṱhe zwi tshilaho zwa kha ḽifhasi zwi ḓo bvela phanḓa zwi tshi ni ofha na zwiṋoni zwoṱhe na zwikokovhi zwoṱhe na khovhe dzoṱhe. Zwo kumedzelwa zwanḓani zwaṋu.*+
3 Zwipuka zwoṱhe zwi kokovhaho zwi tshilaho zwi ḓo vha zwiḽiwa zwaṋu.+ Samusi ndo ni ṋea zwimela zwidala, zwoṱhe ndi ni ṋea zwone uri ni zwi ḽe.+
4 Fhedzi a no ngo tea u ḽa ṋama ine ya kha ḓi vha na malofha+ khayo ngauri malofha ndi vhutshilo.
5 Ndi ḓo lifhedza ane a shulula malofha aṋu ane a vha vhutshilo haṋu. Ndi ḓo dovha nda lifhedza zwivhumbiwa zwoṱhe zwi tshilaho; ndi ḓo lifhedza ane a shulula malofha a wahawe.+
6 Ane a shulula malofha a muthu na awe a ḓo shululwa+ ngauri Mudzimu o sika muthu a tshi ḓifanyisa.+
7 Bebani ni ande ni vhe vhanzhi ni ḓale kha ḽifhasi.”+
8 Mudzimu a amba na Noaxe na vharwa vhawe a ri:
9 “Zwino ndi vhofha mulanga wanga na inwi+ na vhana vhaṋu
10 na zwivhumbiwa zwoṱhe zwi tshilaho zwi re na inwi, zwiṋoni, zwipuka, zwivhumbiwa zwoṱhe zwi tshilaho zwi re na inwi na zwoṱhe zwe zwa bva gungwani, zwivhumbiwa zwoṱhe zwi tshilaho kha ḽifhasi.+
11 Ndi vhofha mulanga na inwi: A thi tsha ḓo fhelisa zwoṱhe zwi tshilaho nga maḓi mahulu, a thi tsha ḓo tshinyadza ḽifhasi nga maḓi mahulu.”+
12 Mudzimu a dovha a ri: “Hetshi ndi tshiga tsha mulanga une nda khou u vhofha vhukati hanga na inwi na zwoṱhe zwi tshilaho zwi re na inwi na kha mirafho yoṱhe ya tshifhingani tshi ḓaho.
13 Ndi ḓo vhea musengavhadzimu wanga makoleni, u ḓo vha tshiga tsha mulanga vhukati hanga na ḽifhasi.
14 Musi ndi tshi ḓisa makole kha ḽifhasi, musengavhadzimu u ḓo vhonala kha makole.
15 Ngauralo, ndi ḓo humbula mulanga we nda u vhofha na inwi na zwoṱhe zwi tshilaho zwa mifuda yoṱhe; a hu tsha ḓo dovha ha vha na muḓalo une wa ḓo fhelisa zwipuka na vhathu.+
16 Hu ḓo vhonala musengavhadzimu makoleni, ndi ḓo u vhona nda humbula mulanga wa lini na lini we nṋe Mudzimu nda u vhofha na zwoṱhe zwi tshilaho zwa mifuda yoṱhe i re kha ḽifhasi.”
17 Mudzimu a dovha a amba na Noaxe a ri: “Hetshi ndi tshiga tsha mulanga we nda u vhofha na zwoṱhe zwi tshilaho zwi re kha ḽifhasi.”+
18 Vharwa vha Noaxe vhe vha bva gungwani ndi Semu, Hamu na Yafete.+ Nga murahu Hamu a beba Kanana.+
19 Vhenevho vhararu vho vha vhe vharwa vha Noaxe, vhathu vhoṱhe vha re kha ḽifhasi vha bva khavho.+
20 Noaxe a vha mulimi, a lima tsimu ya minḓirivhe.
21 A nwa waini a kambiwa, a ḓifukula musi e denndeni ḽawe.
22 Nga murahu Hamu khotsi a Kanana a vhona khotsi awe e fhedzi, a vhudza vhakomana vhawe vhavhili vha re nnḓa.
23 Semu na Yafete vha dzhia nguvho vha i kapea kha mahaḓa avho, vha tshimbila nga tsha murahu. Vha fukedza khotsi avho we a vha e fhedzi, musi vho lavhelesa thungo, vha si vhonele khotsi avho we a vha e fhedzi.
24 Noaxe a kambuluwa a pfa zwe murwa wawe muṱuku a zwi ita,
25 a ri:
“Kanana+ o semiwa.
Nga a vhe mulanda wa vhalanda vha vhakomana vhawe.”+
26 A dovha a ri:
“Nga hu rendwe Yehova, Mudzimu wa Semu,Kanana nga a vhe mulanda wawe.+
27 Mudzimu nga a ṋee Yafete shango ḽihulu,Nga a dzule madenndeni a Semu.
Kanana na ene nga a vhe mulanda wau.”
28 Noaxe a tshila miṅwe miṅwaha ya 350 nga murahu ha Maḓi Mahulu.+
29 Ngauralo, Noaxe o tshila miṅwaha ya 950, a fa.
Ṱhaluso dzi re magumoni a siaṱari
^ Kana “kumedzelwa uri ni zwi lange.”
