NGUDO 5
Ndi Ngani Mudzimu O Sika Ḽifhasi?
1. Ndi ngani Mudzimu o sika ḽifhasi?
Yehova o ṋea vhathu ḽifhasi. Ndi haya hashu. Adamu na Eva a vho ngo sikwa uri vha tshile ṱaḓulu, Mudzimu o vha o no ḓi sika vharuṅwa uri vha tshile ṱaḓulu. (Yobo 38:4, 7) Mudzimu o vhea Adamu munna wa u thoma tsimuni yo nakaho ine ya vhidzwa Edeni. (Genesi 2:15-17) Yehova o vha a tshi ṱoḓa uri Adamu na vhana vhe a vha a tshi ḓo vha navho vha ḓiphiṋe nga vhutshilo vhu sa fheli kha ḽifhasi.—Vhalani Phisalema 37:29; 115:16.
U thomani, ho vha hu tsimu ya Edeni fhedzi ye ya vha i pharadiso. Vhavhingani vha u thoma vho vha vha tshi tea u ḓadza ḽifhasi nga vhana vhavho. Nga u ya ha tshifhinga, vho vha vha tshi tea u ḓadza ḽifhasi ḽoṱhe vha i ita uri ḽi vhe pharadiso. (Genesi 1:28) Ḽifhasi ḽi nga si vhuye ḽa fheliswa. Ḽi ḓo dzula ḽi haya ha vhathu.—Vhalani Phisalema 104:5.
Ṱalelani vidio ine ya ri, Ndi Ngani Mudzimu O Sika Ḽifhasi?
2. Ndi ngani ḽifhasi ḽi si pharadiso zwino?
Adamu na Eva a vho ngo thetshelesa Yehova Mudzimu, zwa ita uri a vha pandele tsimuni ya Edeni. Pharadiso a yo ngo tsha vha hone, a hu na muthu we a kona u ita uri i dovhe i vhe hone. Bivhili i ri: “Ḽifhasi ḽo kumedzwa zwanḓani zwa vhavhi.”—Yobo 9:24.—Vhalani Genesi 3:23, 24.
Naa Yehova a nga si tsha ita uri ḽifhasi ḽi vhe pharadiso? U ḓo zwi ita! Ndi Ramaanḓaoṱhe. A nga si kundwe. (Yesaya 45:18) U ḓo ita uri vhathu vha tshile nga nḓila ye a vha a tshi ṱoḓa uri vha tshile ngayo.—Vhalani Phisalema 37:11, 34.
3. Pharadiso i ḓo dovha ya vha hone hani?
Pharadiso i ḓo dovha ya vha hone kha ḽifhasi musi Yesu a tshi vhusa sa Khosi yo vhewaho nga Mudzimu. Kha nndwa ine ya vhidzwa Haramagedo, Yesu u ḓo ranga phanḓa vharuṅwa vha Mudzimu, a fhelisa vhathu vhoṱhe vhane vha hanedza Mudzimu. Nga murahu ha zwenezwo, Yesu u ḓo valela Saṱhane lwa miṅwaha ya 1 000. Vhathu vha Mudzimu a vha nga fheliswi ngauri Yesu u ḓo vha livhisa na u vha tsireledza. Vha ḓo ḓiphiṋa nga vhutshilo vhu sa fheli Pharadisoni kha ḽifhasi.—Vhalani Nzumbululo 20:1-3; 21:3, 4.
4. Tshengelo i ḓo fhela lini?
Mudzimu u ḓo fhelisa lini vhuvhi kha ḽifhasi? Yesu o ṋea “tshiga” tshine tsha ḓo sumbedza uri vhufhelo vhu tsini. Zwine zwa khou itea zwino zwi vhea vhutshilo ha vhathu khomboni na u sumbedza uri zwino ri khou tshila tshifhingani tsha “vhufhelo ha shango.”—Vhalani Mateo 24:3, 7-14, 21, 22.
Musi Yesu a tshi khou vhusa ḽifhasi lwa miṅwaha ya 1 000 e ngei ṱaḓulu, u ḓo fhelisa tshengelo yoṱhe. (Yesaya 9:6, 7; 11:9) Yesu u ḓo vha Khosi, a dovha a vha Tshifhe Muhulu, a phumula zwivhi zwa vhane vha funa Mudzimu. Mudzimu u ḓo shumisa Yesu u itela u fhelisa malwadze, vhulala na lufu.—Vhalani Yesaya 25:8; 33:24.
5. Ndi vhafhio vhane vha ḓo tshila Pharadisoni tshifhingani tshi ḓaho?
Holoni ya Ṱhanzi dza Yehova, ni ḓo vhona vhathu vhane vha funa Mudzimu, vhane vha ṱoḓa u guda nḓila ya u mu takadza
Vhathu vhane vha thetshelesa Mudzimu vha ḓo tshila Pharadisoni. (1 Yohane 2:17) Yesu o ruma vhatevheli vhawe uri vha ṱoḓe vhathu vhane vha ḓiṱukufhadza na u vha funza nḓila ine vha nga ṱanganedzea ngayo kha Mudzimu. Ṋamusi, Yehova u khou lugiselela vhathu vha dzimilioni uri vha tshile Pharadisoni fhano kha ḽifhasi tshifhingani tshi ḓaho. (Tsefanya 2:3) Holoni dza Ṱhanzi dza Yehova, vhathu vha guda u vha vhanna na vhokhotsi vhavhuḓi na u vha vhafumakadzi na vhomme vhavhuḓi. Vhana na vhabebi vha gwadamela Mudzimu vhoṱhe na u guda nḓila ine vha nga vhuyelwa ngayo nga mafhungo maḓifha.—Vhalani Mika 4:1-4.
