VHASWA
9: U Ḓiḓivha
ZWINE ZWA AMBA ZWONE
U ḓiḓivha a zwi sokou amba u ḓivha dzina ḽaṋu na mbonalo. Zwi katela nḓila ine na tshila ngayo, zwine na tenda na nḓila ine na vha ngayo.
NDI NGANI ZWI ZWA NDEME
Musi ni tshi ḓiḓivha zwavhuḓi, ni ḓo kona u imelela zwine na tenda zwone ni si tende u langiwa nga thanga dzaṋu.
Adrian o amba uri: “Vhathu vhanzhi vha tou nga mipopi ine ra i vhona mavhengeleni yo ambadzwa zwiambaro. Yeneyo mipopi i tou nangelwa zwiambaro zwine ya vha yo zwi ambara.”
Courtney o amba uri: “Ndo guda u imelela zwo lugaho naho zwi songo leluwa. Ndi kona u vhona uri khonani dzanga dza vhukuma ndi dzifhio nga nḓila ine vha ḓi fara ngayo na nḓila ine nda ḓifara ngayo musi ndi navho.”
ZWINE BIVHILI YA AMBA: “Ni songo edzisa vhathu vha ḽino shango, shandulani nḓila ine na humbula ngayo.”—Vharoma 12:2.
ZWINE NA NGA ITA
Arali na ḓivha zwine na kona na zwine ni si zwi kone u katela zwine na tenda zwone, ni ḓo kona u ḓivha uri ni muthu wa hani na uri ni ṱoḓa u vha muthu wa hani. Ni nga thoma nga u ḓivhudzisa mbudziso dzi tevhelaho.
Zwine Nda Zwi Kona: Ndi vhutsila vhufhio vhune nda vha naho? Ndi mini zwine nda zwi konesa? (Sa tsumbo: Naa ndi a fara tshifhinga? Naa ndi a kona u ḓifara? Naa ndi mushumi wa biko? Naa ndi na mafunda?) Ndi zwifhio zwithu zwavhuḓi zwine nda ita?
ZWINE ZWA NGA THUSA: Naa zwi a ni konḓela u humbula nga ha zwithu zwavhuḓi zwe na zwi ita kana u zwi amba? Vhudzisani mubebi kana khonani uri ndi mini zwine na zwi konesa na uri ndi ngani vha tshi ralo.
ZWINE BIVHILI YA AMBA: “Muthu nga a ṱolisise mishumo yawe, ndi hone a tshi ḓo takalela zwe a shuma, a sa ḓivhambedzi na muṅwe muthu.”—Vhagalata 6:4.
Zwine Ndi Si Zwi Kone: Ndi mini zwine nda tea u shumela khazwo? Ndi lini hune zwa ndelutshela u ita zwithu zwo khakheaho? Ndi ngafhi hune nda tea u khwinisa zwi tshi ḓa kha u ḓifara?
ZWINE BIVHILI YA AMBA: “Arali ra ri, ‘A ri na tshivhi,’ ri khou ḓifhura.”—1 Yohane 1:8.
Zwine Nda Tenda: Ndi ḓifara hani nahone ndi ngani? Naa ndi a tenda kha Mudzimu? Ndi mini zwo itaho uri ndi tende uri Mudzimu u hone? Ndi mini zwine nda vhona zwi sa pfali zwi tshi khou itwa kha muṅwe muthu nahone ndi ngani? Ndi tenda uri vhumatshelo vhu ḓo vha hani?
ZWINE BIVHILI YA AMBA: “Vhukoni ha u humbula vhu ḓo dzula vhu tshi u linda, ṱhalukanyo i ḓo u tsireledza.”—Mirero 2:11.
You May Also Like
PHINDULO DZA MBUDZISO DZA 10 DZINE VHASWA VHA DZI VHUDZISA
Ndi Nṋe Nnyi?
U ḓivha vhumuthu haṋu, nungo dzaṋu, vhushayanungo haṋu na zwipikwa zwaṋu zwi ḓo ni thusa uri ni dzhie tsheo dza vhuṱali musi ni fhasi ha mutsiko.
