Vhathu vhanzhi shangoni ḽoṱhe a vha na vhudzulo na zwiḽiwa. Vhaṅwe vha ṱoḓa fhulufhelo ḽa uri tshifhingani tshi ḓaho zwithu zwi ḓo vha khwine. Musi ri tshi thusa vhathu vho raloho, Mudzimu u ḓo ri fhaṱutshedza.

“Ane a sumbedza vhuthu kha mushai u hadzima Yehova, u ḓo mu lifhela zwe a ita.”—MIRERO 19:17.

Yesu o amba nga ha tshifanyiso tsha muthu we a rwiwa nga mavemu vha mu sia o dzidzivhala. (Luka 10:29-37) Onoyo munna we a vha o huvhala, o mbo ḓi thusiwa nga muṅwe munna we a vha a sa mu ḓivhi. O mu thusa naho vho vha vhe vha lushaka lu sa fani.

Onoyo munna a re na vhuthu, o mu onga, a mu badelela uri a lafhiwe, a dovha a mu khuthadza.

Ri guda mini kha tshenetshi tshifanyiso? Yesu o vha a tshi khou sumbedza uri ri tea u thusa vhane vha ṱoḓa thuso nga nḓila naho i ifhio ine ra nga kona. (Mirero 14:31) Maṅwalo Makhethwa a funza uri Mudzimu u ḓo fhelisa tshengelo yoṱhe na u tambula. Fhedzi ri nga ḓivhudzisa uri Mudzimu u ḓo zwi ita hani nahone lini? Tshipiḓa tshi tevhelaho tshi ḓo amba nga ha nḓila ine Musiki washu a ḓo ni fhaṱutshedza ngayo tshifhingani tshi ḓaho.