NAA thabelo i nga ri thusa? Ee, Bivhili i sumbedza uri thabelo dza vhashumeli vha Mudzimu vha fulufhedzeaho dzo vha vhuyedza vhukuma. (Luka 22:40; Yakobo 5:13) Zwi re zwone ndi uri, thabelo i nga ri thusa vhukuma nga lwa muya, kha maḓipfele, na nga lwa ṋama. Nga nḓila-ḓe?

Kha ri sokou ri ni na ṅwana we a fhiwa mpho. Naa ni ḓo mu funza uri zwo eḓana uri a sokou takalela mpho yeneyo? Kana naa ni ḓo mu gudisa uri u fanela u sumbedza u livhuha? Musi ri tshi bula maḓipfele ashu a ndeme, ri vha ri tshi khou livhisa ṱhogomelo khao u katela na u a khwaṱhisedza. Naa zwo tou ralo na musi ni tshi amba na Mudzimu? Vhukuma zwo tou ralo! Kha ri ṱhogomele dziṅwe tsumbo.

Thabelo dza u livhuha. Musi ri tshi livhuha Khotsi ashu nga zwithu zwavhuḓi zwe a ri itela zwone, ri livhisa ṱhogomelo kha phaṱhutshedzo dzine ra vha nadzo. Nga ṅwambo wa zwenezwo, ri a livhuha, ra ḓipfa ro takala, nahone ri na mavhonele avhuḓi.—Vha-Filipi 4:6.

Tsumbo: Yesu o sumbedza u livhuha nḓila ye Khotsi awe a thetshelesa ngayo na u fhindula thabelo dzawe.—Yohane 11:41.

Thabelo dza u hangwelwa. Musi ri tshi humbela Mudzimu uri a ri hangwele, ri khwaṱhisa luvalo lwashu, ri sumbedza uri ro rembuluwa, na u ṱhogomela uri tshivhi tshe ra tshi ita ndi tshihulwane. Ri dovha ra wana mbofholowo kha muhwalo wa u ḓipfa ri na mulandu.

Tsumbo: Davida o rabela u itela u sumbedza uri o rembuluwa na uri o pfa vhuṱungu.—Psalme ya 51.

Thabelo dza u humbela vhulivhisi na vhuṱali. U humbela Yehova uri a ri livhise kana a ri ṋee vhuṱali vhune ha ṱoḓea u itela u ita phetho dzavhuḓi zwi nga ri thusa uri ri ḓiṱukufhadze zwi tshi bva mbiluni. Zwi nga ri humbudza uri ri na vhushayanungo na u ri thusa uri ri fulufhele Khotsi ashu wa ṱaḓulu.—Mirero 3:5, 6. 

Tsumbo: Salomo o ḓiṱukufhadza musi a tshi humbela vhulivhisi na vhuṱali ha u vhusa Vhaisiraele.—1 Dzikhosi 3:5-12.

Thabelo dza musi ro tsikeledzea. Arali ra amba na Mudzimu musi ro tsikeledzea maḓipfele, ri ḓo pfa mbilu dzashu dzo vhofholowa nahone ri ḓo guda u ḓitika nga Yehova hu si nga riṋe vhaṋe.—Psalme ya 62:8.

Tsumbo: Khosi Asa o rabela musi o sedzana na swina ḽi ofhisaho.—2 Koronika 14:11.

Thabelo dza u humbelela vhaṅwe mutakalo wavhuḓi. Thabelo dzo raloho dzi ri thusa uri ri iledze u vha na tseḓa nahone ri pfele vhaṅwe vhuṱungu nga ho engedzeaho.

Tsumbo: Yesu o rabelela vhatevheli vhawe.—Yohane 17:9-17.

Thabelo dza u renda. Musi ri tshi renda Yehova nga ṅwambo wa mishumo yawe i mangadzaho na pfaneleo dzawe dzavhuḓi, ri ḓo mu ṱhonifha na u mu livhuha nga ho engedzeaho. Thabelo dzo raloho dzi nga kha ḓi ri thusa u sendela tsini na Mudzimu ane a vha Khotsi ashu.

Tsumbo: Davida o renda Mudzimu nga ṅwambo wa tsiko yawe.—Psalme ya 8. 

Musi ni tshi rabela ni dovha na wana iṅwe phaṱhutshedzo ine ya vha “mulalo wa Mudzimu, a fhiraho u ṱalukanya hoṱhe.” (Vha-Filipi 4:7) U wana mulalo kha ḽino shango ḽi re na khakhathi ndi phaṱhutshedzo khulwane vhukuma. Zwi dovha zwa ri vhuyedza nga lwa ṋama. (Mirero 14:30) Naa dzenedzo phaṱhutshedzo dzi sokou wanala nga ṅwambo wa vhuḓidini vhune ra vhu ita fhedzi? Kana hu na tshiṅwe tshithu tsha ndeme tshine tsha ṱoḓea?