Khonani dzavhuḓi dzi nga ri thusa uri ri tshile vhutshilo havhuḓi na vhu takadzaho. Dzi na ṱhuṱhuwedzo yavhuḓi nahone dzi nga ita uri ri tshile vhutshilo ha khwiṋe.—Mirero 27:17.

 Naho zwo ralo, Bivhili i ri vhudza uri ndi zwa ndeme u khetha khonani nga vhuṱali. I ri vhudza nga ha masiandoitwa a u khetha khonani dzi si dzavhuḓi. (Mirero 13:20; 1 Vhakorinta 15:33) Dzenedzo khonani dzi nga ita uri muthu a ite phetho dzi si dzavhuḓi na u tshinya mikwa yawe yavhuḓi.

Kha ino thero ri ḓo haseledza zwi tevhelaho

•  Ndi mini zwine zwa ita uri muthu a vhe khonani yavhuḓi?

•  Ndi dzifhio dziṅwe tsumbo dza khonani dzavhuḓi dzi re Bivhilini?

•  Naa muthu a nga kona u vha khonani ya Mudzimu?

•  Vese dzi re Bivhilini dzi ambaho nga ha vhukonani

 Bivhili i funza uri tsha ndeme kha vhukonani a si uri muthu a vhe a tshi funa zwine ra zwi funa fhedzi. Sa tsumbo, Phisalema 119:63 i ri: “Ndi khonani ya vhoṱhe vhane vha u a ofha na vhoṱhe vhane vha tevhedza ndaela dzau.” Onoyu muṅwali wa Bivhili u khou sumbedza uri u vha khonani na muthu muṅwe na muṅwe ane a ofha Mudzimu na ane a ṱoḓa u tshila a tshi ita zwine Mudzimu a funa.

 Bivhili i dovha ya amba nga ha nḓila ine khonani yavhuḓi ya tea u vha ngayo. Sa tsumbo:

•   “Khonani ya vhukuma i sumbedza lufuno tshifhinga tshoṱhe, ndi ṅwana wa mme au ane wa nga ḓitika ngae musi wa khombo.”—Mirero 17:17.

•   “Hu na khonani dzo dzulaho dzo lugela u vhaisana, fhedzi hu na khonani ine ya nga u tikedza u fhira ṅwana wa mme.”—Mirero 18:24.

 Dzenedzi vese dzi ri gudisa uri khonani yavhuḓi i a fhulufhedzea, i na lufuno, vhuthu na mafunda. Khonani ya vhukuma ndi ine ra nga ḓitika ngayo musi ri na thaidzo. Khonani ya vhukuma i dovha ya vha na tshivhindi tsha u ri tsivhudza arali ri khou ṱoḓa u dzhia phetho i si yavhuḓi.—Mirero 27:6, 9.

 Bivhili i amba nga ha vhathu vhe vha vha dzikhonani hu sa londwi u fhambana ha miṅwaha, vhubvo, sialala kana vhuimo. Kha ri ambe nga ha tsumbo tharu.

•   Ruṱe na Naomi. Ruṱe o vha e mazwale wa Naomi. Naomi a nga vha o vha e muhulwane vhukuma kha Ruṱe, zwiṅwe hafhu Ruṱe na Naomi vho vha vha tshi bva kha vhubvo vhu sa fani. Hu sa londwi zwenezwi zwoṱhe, vho vha khonani dza tsinisa dzine dza funana.—Ruṱe 1:16.

•   Davida na Yonathani. Naho khamusi Yonathani o vha a tshi fhira Davida nga miṅwaha ya 30, Bivhili i amba uri vhukonani ha Davida na Yonathani ‘ho vha ho khwaṱha.’—1 Samuele 18:1.

•   Yesu na vhaapostola vhawe. Vhuimo ha Yesu na ha vhafunziwa vhawe ho vha vhu sa fani ngauri ene o vha e mufunzi na murena wavho. (Yohane 13:13) Fhedzi ho ngo vha dzhia vha sa fanelei u vha khonani dzawe. Nṱhani hazwo, Yesu o vha e na vhushaka ha tsini na vhane vha tevhela zwine a funza. O ri: “Ni khonani dzanga, ngauri ndo ni vhudza zwoṱhe zwe nda zwi pfa kha Khotsi anga.”—Yohane 15:14, 15.

 Ee, zwi a konadzea uri vhathu vha vhe khonani dza Mudzimu. Bivhili i ri: “U vha khonani ya tsini-tsini na o lugaho.” (Mirero 3:32) Nga maṅwe maipfi, Mudzimu u vha khonani ya vhane vha tshila vhutshilo havhuḓi, u fhulufhedzea, u ṱhonifha na vhane vha lwela u tshila nga milayo yawe ya zwo lugaho na zwi so ngo lugaho. Sa tsumbo, Bivhili i amba nga ho livhaho uri Abrahamu munna a fhulufhedzeaho o vha e khonani ya Mudzimu.—2 Koronika 20:7; Yesaya 41:8; Yakobo 2:23.