Hai. Vhurabeli a vhu fani. Bivhili i na tsumbo nnzhi dza vhurabeli vhune ha si takadze Mudzimu. Honoho vhurabeli vhu ita zwithu zwivhili zwine zwa si takadze Mudzimu.

Tsha u thoma: Vhu gwadamela midzimu ya mazwifhi

 Bivhili i amba uri u gwadamela midzimu ya mazwifhi ndi “mahandana,” ndi “zwithu zwi si na mushumo” na “zwi sa vhuyedzi tshithu.” (Yeremia 10:3-5; 16:19, 20) Yehova a Mudzimu o vhudza lushaka lwa Isiraele a ri: “U songo gwadamela miṅwe midzimu nga nnḓa ha nṋe.” (Ekisoda 20:3, 23; 23:24) Yehova o ‘sinyutshela Vhaisiraele’ musi vha tshi gwadamela miṅwe midzimu.​—Numeri 25:3; Levitiko 20:2; Vhahaṱuli 2:13, 14.

 Mudzimu u kha ḓi ḓipfa nga nḓila i fanaho nga ha vhathu vhane vha gwadamela “zwine zwa vhidzwa midzimu.” (1 Vhakorinta 8:5, 6; Vhagalata 4:8) U vhudza vhane vha ṱoḓa u mu gwadamela uri vha litshe u konana na vhathu vhane vha vha kha vhurabeli ha mazwifhi. O ri: “Ibvani vhukati havho, ni ḓifhambanye navho.” (2 Vhakorinta 6:14-17) Arali vhurabeli hoṱhe vhu tshi fana nahone vhu tshi takadza Mudzimu, ndi ngani Mudzimu a tshi ri vhudza zwenezwi zwithu?

Tsha vhuvhili: Vhu gwadamela Mudzimu wa ngoho nga nḓila ine a si i ṱanganedze

 Nga zwiṅwe zwifhinga, Vhaisiraele vho gwadamela Yehova nga nḓila ine vhathu vha vhurabeli ha mazwifhi vha gwadamela ngayo midzimu yavho, fhedzi Yehova ho ngo ṱanganedza nḓila ye vha mu gwadamela ngayo. (Ekisoda 32:8; Dotoronomio 12:2-4) Musi Yesu e kha ḽifhasi, o kaidza vharangaphanḓa vha vhurereli nga nṱhani ha nḓila ye vha vha vha tshi gwadamela ngayo Mudzimu. Vho vha vhe na muhoyo, vha tshi ḓiita u nga vha gwadamela Mudzimu ngeno vha tshi “nyadza mafhungo a ndeme a Mulayo a ngaho u haṱula nga nḓila yo teaho, u khathutshela na u fhulufhedzea.”​—Mateo 23:23.

 Nga hu fanaho ṋamusi, vhurabeli vhune ha takadza Mudzimu ndi vhune ha tevhedza ngoho. Yeneyo ngoho i wanala Bivhilini. (Yohane 4:24; 17:17; 2 Timotheo 3:16, 17) Vhurabeli vhune ha funza zwithu zwi sa tshimbidzani na zwine Bivhili ya zwi funza vhu sendedza vhathu kule na Mudzimu. Vhunzhi ha pfunzo dzine vhathu vha humbula u nga dzi bva Bivhilini, dzi vha dzi tshi khou bva kha vhathu vhane vha gwadamela midzimu ya mazwifhi. Dzenedzo pfunzo dzi katela pfunzo ya Vhuraruthihi, uri muya wa muthu a u fi na uri vhathu vha ḓo tambudzwa heleni lwa tshoṱhe. Vhurabeli vhune ha funza dzenedzo pfunzo ndi “mahandana” kana a vhu vhuyedzi tshithu ngauri vhu ita uri vhathu vha tevhedze masialala a vhurabeli nṱhani ha u tevhedza milayo ya Mudzimu.​—Marko 7:7, 8.

 Mudzimu u nengiswa nga vhurabeli vhu re na muhoyo. (Tito 1:16) U itela u thusa vhathu uri vha sendele tsini na Mudzimu, vhurabeli vhu tea u funza zwithu zwine zwa kwama nḓila ine vhathu vha tshila ngayo ḓuvha ḽiṅwe na ḽiṅwe, hu si pfunzo dzine dza tshimbidzana na mikhuvha kana masialala a vhurabeli. Sa tsumbo, Bivhili i ri: “Ane a humbula uri u gwadamela Mudzimu, fhedzi a sa koni u langa lulimi lwawe, u khou ḓifhura, vhurabeli hawe ndi ha mahandana. Vhurabeli ho kunaho na vhu si na tshika phanḓa ha Mudzimu ane a vha Khotsi ashu, ndi hovhu: u ṱhogomela zwisiwana na tshilikadzi vhuṱunguni havho na u dzula u si na tshika ya ḽino shango.”​—Yakobo 1:26, 27.