Bivhili i ṱalutshedza zwine na tea u zwi ita uri ni kone u i pfesesa. Hu sa londwi vhubvo haṋu, mulaedza wa Mudzimu u re Bivhilini ‘a ni kundwi u u pfa, a u kule.’—Doiteronomio 30:11.

Zwine zwa ḓo ni thusa u pfesesa Bivhili

1.   Ivhani na mavhonele avhuḓi. Ni tea u dzhia Bivhili sa Ipfi ḽa Mudzimu. Ḓiṱukufhadzeni ngauri Mudzimu u lwa na vhane vha ḓihudza. (1 Vhathesalonika 2:13; Yakobo 4:6) Naho zwo ralo, ni songo tenda zwiṅwe na zwiṅwe zwine na zwi pfa kana zwine na zwi vhala ni songo thoma na ita ṱhoḓisiso, Mudzimu u ṱoḓa ni tshi shumisa “maanḓa aṋu a u humbula.”—Vharoma 12:1, 2.

2.   Humbelani vhuṱali. Kha Mirero 3:5, Bivhili i ri: “U songo ḓi-tika nga u ri: Ndi a ṱalukanya.” Nṱhani hazwo, ‘dzulani ni tshi humbela Mudzimu’ vhuṱali ha u pfesesa Bivhili.—Yakobo 1:5.

3.   Gudani tshifhinga tshoṱhe. Ni ḓo vhuyelwa zwihulu arali ni tshi guda Bivhili tshifhinga tshoṱhe.—Yoshua 1:8.

4.   Gudani thero nga thero. U guda thero nga thero ndi nḓila i vhuyedzaho ya u guda zwine Bivhili ya zwi funza. Thomani nga “marangaphanḓa a pfunzo” nahone nga murahu ni “fhirele phanḓa kha o fanelaho vho aluwaho (vho vhibvaho).” (Vhaheberu 6:1, 2, Bivhili Khethwa) Ni ḓo guda u vhambedza maṅwalo na uri zwiṅwe zwipiḓa zwa Bivhili zwi ṱalusa zwiṅwe, u katela na zwine zwa “konḓa u zwi pfesesa.”—2 Petro 3:16.

5.   Humbelani vhaṅwe uri vha ni thuse. Bivhili i ri ṱuṱuwedza uri ri tendele vhaṅwe vhathu vhane vha pfesesa Bivhili vha tshi ri thusa. (Mishumo 8:30, 31) Ṱhanzi dza Yehova dzi gudisa vhathu Bivhili nga mahala. U fana na Vhakriste vha u thoma, vha shumisa Maṅwalo u itela u thusa vhaṅwe u pfesesa zwine Bivhili ya zwi funza zwa vhukuma.—Mishumo 17:2, 3.

Zwithu zwi sa ṱoḓei

1.   U funzea. Vhaapostola vha Yesu vha 12 vho vha vha tshi pfesesa Maṅwalo nahone vho a gudisa vhaṅwe, naho vhaṅwe vho vha vha tshi vha dzhia ‘vha songo funzea nahone vhe vhathu vho ḓoweleaho.’—Mishumo 4:13.

2.   Tshelede. A zwi ṱoḓei uri ni badele tshelede u itela u guda zwine Bivhili ya zwi funza. Yesu o vhudza vhafunziwa vhawe uri: “No ṋewa nga mahala, ṋeani nga mahala.”—Mateo 10:8.