Sea cucumber dzi dzula fhasi-fhasi lwanzheni na kha dzi coral reef. Lukanda lwadzo lu na maguluguḓa nahone lu a ṱhavha. Lu a kona u shanduka zwi tshi ya nga zwiimo, lu nga vha lutete kana lwa oma u fana na bulannga nga u ṱavhanya. Honohu u shanduka-shanduka hu ita uri tshenetshi tshipuka tshi kone u petea uri tshi kone u dzhena fhethu huṱuku na u oma tsha tou tee uri zwivhanda zwi si kone u tshi kokodza. Tshenetshi tshipuka tshi kona u ita zwenezwi nga nṱhani ha lukanda lwatsho.

 Humbulani nga ha hezwi: Lukanda lwa tshenetshi tshipuka lu a kona u vha lutete, lwa khwaṱha, kana lwa oma. Uri lu kone u shanduka, misipha yatsho i a ṱangana kana u fhambana i tshi shumisa phurotheini dzi itaho uri lu ome kana lu vhe lutete.

 Phurotheini dzi omisaho dzi ita uri misipha yatsho i ṱangane uri lukanda lu ome. Phurotheini dzi itaho uri lu vhe lutete dzi ita uri misipha yatsho i fhambane uri lukanda lu vhe lutete. Lukanda lwatsho lu nga vha lutete lune lwa vhonala u nga lu khou ṋoka.

 Vhorasaintsi vha khou lingedza u ita zwithu zwine zwa kona u shanduka u itela u tendelana na zwiimo u fana na lukanda wa sea cucumber. Tshiṅwe tshipikwa tshavho ndi u ita mutshini une wa ḓo shumiswa musi hu tshi itwa muaro wa vhuluvhi. U tea u kona u oma musi wo vhewa ho teaho na u vha mutete musi zwi tshi ṱoḓea. Arali wonoyu mutshini wa kona u shanduka nga yeneyi nḓila, zwi ḓo ita uri muaro u tshimbile zwavhuḓi.

 Inwi ni zwi vhona hani? Naa lukanda lu akhamadzaho lwa sea cucumber lwo sokou bvelela kana lwo tou sikwa?