TANTE persone le sa che Gesù l’è stà picà su nte un pal de tortura intrà due ladroni. (Mat. 27:35-38) Dopo, la Bìblia la dise che el so corpo l’è stà parecià par el sepoltamento e che l’è stà metesto in un sepolcro. Ma tanti no i ze de acordo con quel che la Bìblia la dise sora questo. — Mar. 15:42-46.

Arquanti studiosi dei Vangeli no i crede che una persona che la era morta picada nte un pal la era sepoltada. Ariel Sabar el ga spiegà nte una revista parché che arquante persone le pensa cossita. * Lu el ga dito: “Picar le persone rugne nela croce l’era una maniera de farle sofrir. Arquanti studiosi i pensa che i romani no i assaria una persona cossita la fusse metesta nte un sepolcro.” (Noantri ghemo fato la tradussion.) I romani i volea mostrar davanti de tuti che quele persone che le era picade su le era pròpio rugne. Par quela che i assea i so corpi picadi nel pal par le bèstie magnarli. E quel che le bèstie no le magnesse l’era metesto nte un buso insieme con altri corpi.

La archeologia la ga prove che arquanti giudei i ze stati picadi nte un pal e i ga bio un sepolcro. Par esémpio, nel ano de 1968, i ze stati catadi arquanti ossi de un omo che l’è stà morto cossita nei giorni de Gesù. Questi ossi i ze stadi catadi darente de Gerusalen rento una cassa de ossi, nte un sepolcro che l’era de un fameia de giudei. Lì ghen’era un osso de calcagno, inciodà nte un toco de legno con un ciodo de fero de 11,5 sentìmetri. Sabar el ga scrito: “Questo osso de calcagno l’era de un omo che el gavea nome Yehochanan. Quel che lori i ga catà ga giutà a provar che i ga metesto Gesù nte un sepolcro come dise i Vangeli. El osso del calcagno de questo omo el ga mostrà che i romani i assea che un omo che l’era stà morto nela croce el fusse metesto nte un sepolcro.”

Par via de questo osso de calcagno, le persone le ze drio dir tante robe sora la maniera che Gesù l’è stà picà su nel pal. Ma el pi importante l’è che questo osso de calcagno el prova che una persona che la era picada nte un pal la podaria esser metesta nte un sepolcro. Quel che i studiosi i ga catà prova che Gesù l’è stà metesto nte un sepolcro, come la Bìblia la dise.

El pi importante l’è che Geovà el gavea parlà che Gesù el saria metesto nte un sepolcro intrà i siori. E come savemo, nissun pol intrigar Geovà de far quel che lu el dise. — Isa. 53:9; 55:11.