Niireke Muhaana Ororomela Etiini Voohimya sa Mweettelo?

Sylvia, yoowo onivara muteko hospitaali, onihimya so: “Miyo keetta Universidade ni atthu anceene yaihimya okhala maKristau. Nnaamwi vari siiso, awo yaaniiyerya iprova ni olya mirette soohapala. Tthiri ,etiini khiyaarina efaita mookumini mwaya”.

Lionel, onihimya so: “Axipatthani aka a omutekoni annootha ni otelefonari ahimyaka wira anoowereiwa, masi ahiwereiwaka tthiri. Awo ahaana etiini, masi khanivarihela muteko; onilikanasa ni etthu mutthu onooniherya awe paahi”.

Etiini kherina owerya vanceene voohimya sa mweettelo wa okumi wa anamunceene. Anamunceene olelo-va ‘anoneya ntoko atthu òwamini’, masi awo kharina “wamini”. (2 Timótheyo 3:5) Ahooleli aya a etiini khanivaha ntakiheryo nooloka; wala waavaha atthareli aya malakiheryo a Biibiliya wira akhalaneke mweettelo wooloka. Ti maana aya anamunceene anikupali aya wira Muluku khonithokorerya mwa moota aneettiha aya okumi aya.

EXEENI BIIBILIYA ONIIXUTTIHA AWE?

Biibiliya onnooniherya wira Muluku ookhalana muupuwelelo ni onnithokorerya mweettelo ahu vanci. Okathi anaIsarayeli a khalai yahaamwiiwelenle aya Muluku “yahinviruxa omathalani”. (Esalimo 78:40) Masi, ohaavo ohakalala wuulupale ‘wirimu’ vaavo mutthu onirukunuxa awe veekeekhai mweettelo awe woohiloka. (Luka 15:7) Vaavo mutthu onipacerya awe osiveliwa ni mikhalelo sooloka sa Tiithi ahu a wiirimu, omphenta wawe Muluku onirowa wunnuwa, omwiirihaka ophenta itthu Muluku oniphenta awe ni onyokha iye Muluku oninyokha awe.​—Amosi 5:15.

ANAMOONA A YEHOVA ARI SAI MMWAHA OLA?

Ejornaale The Deseret News of Salt Lake City, Utah, E.U.A, enihimya so: Anamoona a Yehova “annikumiherya imusi soowuuraana vanceene ni waakumiherya atthu anaakhaliherya akhwaaya ni oororomeleya”. Nave-tho ejornaale eyo yaahivikaniha ehimyaka wira: “Atthu a etiini eyo annikupali malamulo maalupale a mweettelo wooloka. Awosa annikupali wira ompaha soona, ohapaliwa, ovarihela muteko moohiloka mirette soohapala, juku, onamuttompe ni orupihana alopwanaru aahiiso athiyanaru, ori mweettelo woohiloka onihonona ompatthani ni Muluku”.

Moota xeeni wiixutta voohimya sa mikhalelo sa Muluku waakhalihenrya aya Anamoona? Sylvia oromoliwe wanipacerya, onihimya so: “Wiiya eri etthu yoolema hospitaali. Nto ti vookhweya mutthu opaka eyo. Masi wiiwexexa moota Yehova * onoonela awe wiiya, wookikhaliherya opaka etthu yooloka. Miyo kinnihakalala ni okhalana yowuupuxerya ya murima yooloka”. Silvia onnikupali wira weettela sookupali sa etiini awe wookhaliherya okumi awe.

[Enoota]

[Elatarato epaaxina 6]

[Eponto yuulupale ya epaaxina 6]

Niireke ahooleli a itiini aakhaliherya ipwittipwitthi saya weettela malamulo maalupale a Muluku a mweettelo wooloka?