Tana Yelidaageeti Taani Aybinkka Allaxxennaadan Diggiyoy Aybissee?
Ha hanotaa qoppa:
Neeni ne laggetuura allaxxiyoosaa baana koyadasa, shin yelidaageeti neeni yaa baanaadan eeno gaanaakko erabaakka. Kaallidi deˈiyaagaappe awugaa dooruutee?
1. OYCHCHENNAN COˈˈU GAADA BIYOOGAA
Neeni hegaa doorana danddayiyo gaasuwaa: Neeni ne sheniyaadan deˈiyoogaa ne laggeta bessanawu koyiyoogaa. Neeni nena yelidaageetuppe aaruwan eriyaabadan qoppiyoogaa woy eti yootiyoobaa bonchchennaagaa.—Leemiso 14:18.
Hegee aybi hananaadan oottii? Ne laggeti maalaalettana danddayoosona, shin eti neeni cimmayaagaa gidiyoogaakka akeekana. Neeni nena yelidaageeta cimmiyaaba gidikko ne laggetakka cimmiyoogee attenna. Yelidaageeti hegaa erikko, keehi azzanananne nenan ammanettennan aggana danddayoosona!—Leemiso 12:15.
2. OYCHCHENNAANINNE BEENNAN AGGIYOOGAA
Neeni hagaa doorana danddayiyo gaasuwaa: Neeni he shoobiyaabaa qoppada yan oosettiyaabay ne kaalliyo maaraara maayettennaagaa woy shoobbidaageetuppe issoti issoti neeyyo loˈˈo lagge gidokkona gaada kuuyiyoogaa. (1 Qoronttoosa 15:33; Piliphphisiyuusa 4:8) Hara baggaara, neeni baanawu koyana danddayaasa shin nena yelidaageeta oychchanawu yayyadasa.
Hegee aybi hananaadan oottii? Yaa biyoogee iita gidiyoogaa akeekada beennan aggikko, ne laggetuyyo zaariyo wode yayyakka. SHin neeni yaa beennay nena yelidaageeta oychchanawu yayyido gishshataassa gidikko, allaxxennay ne xalla ga qoppada son uttada boorasana danddayaasa.
3. OYCHCHADA ETI GIYOOBAA SIYIYOOGAA
Neeni hagaa doorana danddayiyo gaasuwaa: Nena yelidaageetu maataa akeekada etawu azazettiyoogaa. (Qolasiyaasa 3:20) Neeni nena yelidaageeta siiqiyo gishshawu, qosettada biyoogan eti azzananaadan koyennaagaa. (Leemiso 10:1) Neeni ne qofaa etawu yootiyo injjiyaakka demmana danddayiyo gishshataassa.
Hegee aybi hananaadan oottii? Nena yelidaageeti neeni eta siiqiyoogaanne bonchchiyoogaa akeekana. Qassi ne oyshay bessiyaagaa gidiyoogaa eti akeekikko, neeyyo eeno gaana danddayoosona.
Yelidaageeti Akkay Gaana Danddayiyo Gaasuwaa
Haattay mittennaadan ashshiyaageetudan, nena yelidaageetikka nena qohanabaa haahuwan akeekana danddayoosona
Issi gaasuwaa ha leemisuwan qonccissana danddayettees: Danddayettiyaaba gidikko, haattay mittennaadan ashshiyaageeti deˈiyoosan abbaa doonan haattaa wadhdhanawu doorana danddayaasa. Ayssi giikko, neeni haattaa wadhdhiyo wode, nena qohana danddayiyaabay aybakko loytta erennan aggana danddayaasa. SHin haattay mittennaadan ashshiyaageeti qohiyaabaa haahuwan akeekana danddayoosona. Hegaadankka, nena yelidaageetuyyo daro eraynne eti deˈuwan akeekidobay deˈiyo gishshawu, neeni akeekabeenna qohiyaabaa eti erana danddayoosona. Haattay mittennaadan ashshiyaageetudan, nena yelidaageetu halchchoykka ne ufayttennaadan oottanaassa gidennan, neeni ufayttennaadan oottiyaabaappe haakkanaadan maaddanaassa.
Hara gaasoy qassi hagaa: Nena yelidaageeti nena daafabaappe naaganawu keehippe koyoosona. Eti danddayettikko paqqadanaadan woy ixxanaadan oottiyay siiquwaa. Neeni issibaa oottanawu eta oychchiyo wode, hegee kaalettiyoobaa eti eeno gaanaappe kase qoppoosona. Hegee nena qohennaagaa eti ammaniyo wode eeno goosona.
Yelidaageeti Eeno Gaanaadan Waatana Danddayay?
Neeni oottana danddayiyoobaa
Tumaa haasaya: Nena hagaadan oychcha: ‘Taani baana koyiyoy tumuppe aybissee? Ta baana koyiyoy allaxxiyoogan ufayttana koyiyo gishshataasseeyye ta laggetuppe dummatanawu koyenna gishshataassee? Woy taani dosiyo uri yan deˈanaagaa qoppido gishshataassee?’ Yaatada nena yelidaageetussi tumaa yoota. Etikka issi wode yelaga; yaatiyo gishshawu ne hanotaa loytti eroosona. Hegaa gishshawu, neeni yaa baanawu tumuppe koyidoy aybissakko akeekana danddayoosona. Neeni tumaa yooto gishshawu eti nena nashshana, qassi eti aadhdhida eratettan yootiyoobay nena goˈˈana. (Leemiso 7:1, 2) Hara baggaara, neeni tumaa yootana xayikko eti nena ammanokkona, qassi neeni oychchidobaa eeno geennan aggana danddayoosona.
Wodiyaa: Nena yelidaageeti oosuwaappe soo yiidosaara woykko eta qofay haraban ohettidaashin oyshaa toloppa. Eti woppu giyo saatiyan oychcha. SHin baana wode keehi matiichchin oychchada eti eeno gaanaadan iisettoppa. Nena yelidaageeti dirbban kuuyana koyokkona. Kasetada oychchiyoogee eti qoppanawu wodiyaa demmanaadan maaddees.
Qonccissa: Muumman yootoppa. Neeni oottanawu koyiyoobaa qonccissada yoota. Yelidaageeti, “Yan ooni daanee?” “Gastta uri deˈanee?” woy “Aappun saatiyan simmuutee?” giidi nena oychchiyo wode, “Taani erikke” gaada zaarikko hegan ufayttokkona.
Xeelaa: Nena yelidaageeta morkkedan xeelloppa. Eta tumuppe nenaara hasheti oottiyaageetudan xeella. Neeni nena yelidaageeta ne miyyedan xeellikko etaara palamettakka, ubba eti ne giyoobaa maayettana danddayoosona.
Nena yelidaageeti kuuyiyoobaa maayiyoogaaninne hegaa azazettiyoogan wozannaama gidiyoogaa bessa. Neeni hegaadan oottikko, eti nena nashshana. Haroode, neeni oychchiyoobaa eeno gaanaadan oottiyaabaa qoppana danddayoosona.
