DAAFABAY GAKKIYO WODE, ‘XOOSSAY AWU BIIDEE?’ GAADA OYCHCHA ERAY? WOY QASSI NE DEˈUWAN GAKKIDA KEEHI AZZANTTIYAABAY NEENI XOOSSAY NEESSI QOPPIYAAKKONNE SIRANAADAN OOTTIDEE?

Amarkkan deˈiya sheˈiliigaadan neeyyookka siyettennan aggenna. Haymaanootiyaa mintti kaalliya keettan diccida A hagaadan gaasu: “Xoossay nuna Medhdhidaagaa gidiyo gishshawu, taani naatettaappe doommada A siiqays. SHin, taani akko shiiqidabadan taassi mule siyetti erenna. I tana haahuwaappe xeelliyaabadan qoppays. Xoossay tana ixxees gaada qoppa erennaba gidikkonne, I tana siiqees gaadakka qoppa erikke.” SHeˈila aybissi siradee? A hagaadan gaasu: “Daafabay bolli bollan nu soo asaa gakkiis; qassi Xoossay nuna mule maaddennaba milatiis.”

SHeˈiliigaadan, Ubbaa Danddayiya Xoossay deˈiyoogaa neeni ammanennan waaya aggana. Gidoppe attin, I tumuppe neessi qoppiyaakkonne neeni sirennan aggakka. Medhdhidaagawu wolqqaynne aadhdhida eratettay deˈiyoogaa ammanida xillo bitanee Iyyoobikka hegaadan siriis. (Iyyooba 2:3; 9:4) Iyyoobi woppu gaanawu naagiyoobi baynnan, daafabay bolli bollan A gakki simmin, I Xoossaa hagaadan oychchiis: “Neeni aibissi ne som77uwaa taappe genttai? Qassi tana aibissi ne morkkedan qoodai?”—Iyyooba 13:24.

Geeshsha Maxaafay woygii? Daafabay gakkiyo wode Xoossan gaasoyana koshshii? Xoossay asa ubbaassinne nuussi huuphiyan huuphiyan qoppiyoogaa bessiya naqaashi deˈii? I nuna loytti xeelliyaakkonne, nubaa akeekiyaakkonne, nuussi qarettiyaakkonne, woy nu metuwan nuna maaddiyaakkonne erana danddayiya uri nu giddon deˈii?

Xoossay nuussi qoppiyoogaa xeelliyaagan meretaappe nuuni ay tamaaranaakko kaalliya huuphe yohotun pilggana. (Roome 1:20) Qassi Xoossay nuussi qoppiyoogaa xeelliyaagan Geeshsha Maxaafay qonccissiyoobaa nuuni akeekana. I medhdhidobaa baggaaranne A Qaalaa baggaara neeni loyttada ‘A eriyo’ wode, ‘I neeyyo qoppiyoogaa’ neeni kaseegaappe aaruwan ammanettana.—1 Yohaannisa 2:3; 1 PHeexiroosa 5:7