Yihoowa Markkati xannaˈanawu dumma dumma Geeshsha Maxaafaa birshshettata goˈettoosona. Gidikkokka, Ooratta Alamiyaa Geeshsha Maxaafaa Birshshettay deˈiyo qaalatun A goˈettiyoogaa dosoos. Ayssi giikko, he birshshettay Xoossaa sunttaa goˈettees, koyro qofaa laammibeenna, qassi qoncce.

•   Xoossaa sunttaa goˈettees. Geeshsha Maxaafaa attamissida issoti issoti A xaafissidaagaa bonchchennan aggidosona. Leemisuwawu, issi Geeshsha Maxaafaa birshshettan, hegaa giigissiyoogan amaridabaa ootti maaddida 70ppe dariya asaa sunttay xaafettiis. SHin A xaafissida, Xoossaa Yihoowa sunttay he Geeshsha Maxaafan mule baawa!

   Hara baggaara, Geeshsha Maxaafay beni xaafettiyo wode Xoossaa sunttay deˈiyo shaˈan qoodettiya soho ubban Ooratta Alamiyaa Birshshettan zaarettidi xaafettiis, shin hegaa birshshida konttee erettenna.

•   Koyro qofay laamettibeenna. Geeshsha Maxaafaa koyro qofaa laammibeenna birshshettati ubbata gidokkona. Leemisuwawu, issi birshshettay Maatiyoosa 7:13 hagaadan gees: “Unˈˈo penggiyaara gelite; ayssi giikko, siˈooliya penggee aaho; yaa efiya ogeekka wayssenna.” Gidoppe attin, koyro xaafettida Geeshsha Maxaafay he sohuwan “bashshaa” geesippe attin “siˈooliyaa” geenna. Geella birshshiyaageeti “siˈooliyaa” giya qaalaa goˈettidoy, iitati siˈooliyaa taman merinawu xuugettoosona giidi ammaniyo gishshataassa gidana. SHin he qofay Geeshsha Maxaafaara maayenna. Yaatiyo gishshawu, Ooratta Alamiyaa Birshshettay, “Unˈˈo penggiyaara gelite; ayssi giikko, bashshawu efiya penggee aaho; ogeekka woggaa” yaagidi suure yootees.

•   Qoncce. Loˈˈo birshshettay qofaa laammennaagaa xalla gidennan, akeekanawu metenna, qoncce gidana bessees. Issi leemisuwaa beˈa. Kiitettida PHawuloosi Roome 12:11n, sittan birshshiyo wode “ayyaanan penttiyoogaa” giya qaalaa goˈettiis. Ha wodiyan asay hegaa loytti akeekenna gishshawu, Ooratta Alamiyaa Birshshettan akeekanawu metenna ogiyan birshshettiis. He xiqisee Kiristtaaneti “ayyaanan suullana” koshshees geetettiis.

 Ooratta Alamiyaa Birshshettay Xoossaa sunttaa goˈettiyoogaa, koyro qofaa laammennaagaanne qoncce gidiyoogaa xalla gidennan, miishsha qanxxisennan asawu imettiyoogankka dummatees. Hegaappe denddidaagan, shammanawu danddayenna asaykka, Geeshsha Maxaafaa ba qaalan nabbabana danddayees.