Hegaa mala baalati Xoossaa ufayssenna gishshawu, Yihoowa Markkati yeletaa gallassaa bonchchokkona. Qassi Geeshsha Maxaafay yeleta gallassaa bonchchoppite gaana xayikkonne, he baalaara gayttida ayfettiyaabata qoranaadaaninne Xoossay hegeeta waati xeelliyaakko akeekanaadan nuna maaddees. Hegeetuppe oyddatanne etaara gayttidaagan Geeshsha Maxaafay yootiyo maarata beˈa.

1.   Yeleta gallassaa bonchchiyoogee Yihoowayyo goynnenna asappe yiis. He gallassaa bonchchiyoogee, issi uri yelettido gallassan “izaawa iita ayyaanatinne iitabay qohana danddayiyo” gishshawu, “A laggeti aara deˈiyoogeenne eti ayyo loˈˈobaa amottiyoogee A naagana danddayees” giyo ammanuwaappe denddidaba gidiyoogaa Fank end Wagnalz Istandard Dikshineeri ov Fokloor, Mitolojii, end Lejend, giyo maxaafay yootees. Ze Lor ov Berzdeys giyo maxaafay “xoolinttiyaa payduwaa saynisiyaara” gayttidaban “sinttanaabaa yootanawu” yeleta gallassaa xaafiyoogee beni wode “keehi koshshiyoogaa” yootees. He maxaafay gujjidi, “woga ammanuwan, amottiyoobaa poliyo dumma wolqqay yeleta gallassaa muqaaddatussi deˈiyoogaa” yootees.

    SHin kaayiyoogaa, murunniyoogaa, iita ayyaana oosuwaa woy ‘hegeeta malatiya’ aybanne oottennaadan Geeshsha Maxaafay yootees. (Zaarettido Wogaa 18:14; Galaatiyaa 5:19-21) Xoossay beni Baabiloona katamaa bolli pirddido issi gaasoy kaayo qommo gidida xoolinttiyaa paydiyoogaa. (Isiyaasa 47:11-15) Yihoowa Markkati woga ubbaa dendduwaa pilggokkona; gidoppe attin, Geeshsha Maxaafay hegaadan qonccissidi yootiyoobaa nuuni xaasayi xeellokko.

2.   Beni wode Kiristtaaneti yeleta gallassaa bonchchibookkona. Ze World Buk Insaykilopiidiya giyo maxaafay, “Ooni yelettido gallassanne bonchchiyoogaa eti eeqawu goynniya asaa wogadan xeellidosona” yaagees. Kiitettidaageetinne Yesuusi tamaarissido harati Kiristtaaneti ubbay kaallana bessiyaabaa oottidoogaa Geeshsha Maxaafay qonccissees.—2 Tasalonqqe 3:6.

3.   Kiristtaaneti hassayana koshshiyo mexi issi gallassay yeletaaba gidennan hayquwaaba—Yesuusa hayquwaa. (Luqaasa 22:17-20) Hegan garamettana bessenna; ayssi giikko, Geeshsha Maxaafay ‘yelettiyo gallassaappe hayqqiyo gallassay loˈˈo’ yaagees. (Eranchchaa 7:1) Yesuusi saˈan deˈido deˈuwaa wurssettan Xoossaa sinttan loˈˈo sunttaa demmido gishshawu, I yelettido gallassaappe hayqqido gallassay loˈˈo.—Ibraawe 1:4.

4.   Geeshsha Maxaafay yeleta gallassaa bonchchida Xoossaa ashkkaraabaa yootenna. Xoossawu goynnenna naaˈˈu asatu yeleta gallassaa bonchchuwaabay xaafettido gishshawu, hegee dogettidi attidaba gidenna. Gidoppe attin, he naaˈˈu hanotatikka nashetti odettibookkona.—Doomettaabaa 40:20-22; Marqqoosa 6:21-29.

 Yihoowa Markkati loˈˈo aawatunne aayetu ubbaagaadan, bantta naatussi imota immiyoogaaninne etaara ufayssiya wodiyaa aattiyoogan eta siiqiyoogaa bessoosona. Eti ba naatussi loˈˈobaa kehatettan immiya Xoossaa milatanawu baaxetoosona. (Maatiyoosa 7:11) Kaallidi deˈiyaageeti yootidobay bessiyoogaadan Yihoowa Markkatu naati yuuˈettidabadan qoppokkona:

•   “Issi uri naagibeenna wodiyan imoti ayyo imettiyoogee keehi ufayssees.”—Tami, layttay 12.

•   “Ta yelettido gallassan imoti tawu imettana xayikkonne, ta aawaynne aayyiyaa hara wodiyan tawu immiyoobaa shammoosona. Ta qoppennan imettiyaaba gidiyo gishshawu hegaa dosays.”—Grigori, layttay 11.

•   “Tammu daqiiqan, amarida keekkiyaa miiddi mazamuriyaa yexxidi allaxxana giidi qoppeetii? Allaxxiyoogee tumu ay malakko intte nu soo yiidi beˈana koshshees!”—Erik, layttay 6.