Diri pa la kamo maiha nga nagdi-date, pero nagkakaada ka mga pagruhaduha. Dapat ba niyo ipadayon an iyo relasyon o tapuson ito? Ini nga artikulo gindisenyo basi makabulig ha imo nga magdesisyon.

Hini nga artikulo

•  Pag-atubang ha mga pagruhaduha

•  Paghimo hin desisyon

•  Kon magdesisyon ka nga makig-break

 Katapos makig-date hin pipira ka panahon, bangin madiskobrehan han batan-on nga lalaki ngan babaye nga mas damu an ira diri ginkakaparihoan kay han ira ginhunahuna han siyahan. Pananglitan:

•   An usa nag-i-enjoy ha beach; an usa naman mahilig mag-hiking.

•   An usa makiistoryahon; an usa naman hilumon la.

•   An usa kasagaran na nga diri tangkod; an usa naman pirme tangkod.

 Pansina nga iba-iba an tagsa hito nga mga sitwasyon. An siyahan mahitungod ha pagkaada magkaiba nga hilig; an ikaduha mahitungod ha pagkaada magkaiba nga kinaiya; an ikatulo mahitungod ha pagkaada magkaiba nga prinsipyo.

 Hunahunaa ini: Hain hito nga tulo an imo nakita nga pinakamakuri atubangon kon magin mag-asawa kamo nga duha? Hain hito, kon may-ada man, an kaya niyo nga duha magpahiuyon?

 An bana ngan asawa puydi magkaada magkaiba nga hilig o kinaiya, pero magin malipayon la gihapon sugad nga mag-asawa. Kon huhunahunaon, an pagin compatible diri nagpapasabot hin pagin magkapariho. Ha pipira nga kahimtang, an bana ngan asawa nahibabaro nga magin interesado ha mga butang nga hilig han ira padis o nagpapahimulos pa ngani ha kinaiya han kada tagsa. a

 Ha luyo nga bahin, importante nga ikaw ngan an imo magigin asawa pariho an prinsipyo—parte man ito ha relihiyon, moral, ngan kon ano an tama ngan sayop. Kon diri, dapat mo ito hunahunaon sugad nga tigaman nga bangin kinahanglan mo tapuson an iyo relasyon.

 Pananglitan, pansina kon an mag-asawa diri magkapariho an relihiyon. An libro nga Fighting for Your Marriage nasiring: “Pauroutro nga iginpapakita han mga pagsaliksik nga an mag-asawa nga diri pariho an relihiyon mas daku gud an posibilidad nga magdiborsyo.”

 Prinsipyo ha Biblia: “Ayaw kamo pag-ungay ngan pakig-usa han mga diri magtinuohon, kay diri ini mahihimo.”—2 Corinto 6:14, An Maupay nga Sumat.

 An Biblia nasiring nga adton mag-aasawa “magkakaada kasakit ngan kasubo.” (1 Corinto 7:28, The New English Bible) Salit ayaw kahipausa kon nakakaeksperyensya ka hin pipira hito samtang nagdi-date kamo.

 An talagudti nga diri pagkauyon diri pirme nagpapasabot nga diri magigin malampuson an iyo relasyon. An pakiana, Masusulbad ba niyo ito ha mamurayawon nga paagi? Kinahanglan gud niyo ito nga skill kon mag-asawa na kamo.

 Prinsipyo ha Biblia: “Magin buotan kamo ha usa kag usa, malumo nga napaid, hura nga nagpapasaylo ha usa kag usa.”—Efeso 4:32.

 Ha luyo nga bahin, an pauroutro o seryoso nga diri pagkasinabtanay mahimo magpasabot nga kamo nga duha diri gud compatible. Kon ito an kahimtang, mas maopay nga mahibaroan niyo ito yana samtang diri pa kamo mag-asawa!

 An punto: Kon nagruruhaduha ka ha imo uyab tungod han seryoso nga mga hinungdan o kon nagruruhaduha ka pa ngani kon andam ka na mag-asawa, ayaw ito igbalewaray!

 Prinsipyo ha Biblia: “An maaramon nga tawo nakakakita han peligro ngan natago, pero an mga waray eksperyensya nagpapadayon la ngan nag-aantos han mga resulta.”—Proberbios 22:3.

 Mahimo magin masakit an pakig-break. Pero kon ikaw o kamo nga duha may nagpapadayon ngan seryoso nga pagruhaduha ha iyo relasyon, bangin mas maopay nga tapuson na la ito.

 Paonan-o mo ito hihimoon? Labot la kon may-ada ka maopay hinduro nga rason, diri gud maopay nga makig-break pinaagi hin pag-text o pagtawag. Lugod, pagpili hin angayan nga panahon ngan lugar basi pag-istoryahan niyo nga magkaupod inin seryoso nga butang.

 Prinsipyo ha Biblia: “Magyakan kamo han kamatuoran ha usa kag usa.”—Zacarias 8:16.

 An pag-break ba nagpapasabot nga pakyas ka? Diri man. Hinumdumi, an pakig-date dapat makabulig ha imo ha pagdesisyon—kon papakasalan mo an imo uyab o diri. Bisan kon tapos na an iyo relasyon, may mahibabaroan ka la gihapon nga mag-opay nga leksyon tikang hito.

 Pakianhi an imo kalugaringon: ‘Ano an akon nahibaroan parte ha akon kalugaringon tikang hini nga relasyon? Ini ba nga eksperyensya nakabulig ha akon nga makita kon ano an kinahanglan ko pauswagon? Ano an diri ko na bubuhaton kon makig-date ako utro?’