An baraan nga espiritu amo an gahum han Dios, an iya aktibo nga pwersa. (Micas 3:8; Lucas 1:35) Ginsusugo han Dios an iya espiritu pinaagi ha pagpadara ha iya gahum ha bisan diin basi matuman an iya kaburut-on.​—Salmo 104:30; 139:7.

 Ha Biblia, an pulong nga “espiritu” iginhubad tikang ha Hebreo nga pulong nga ruʹach ngan ha Griego nga pulong nga pneuʹma. Kasagaran na nga ito nga mga pulong nagtutudlok ha aktibo nga pwersa, o ha baraan nga espiritu han Dios. (Genesis 1:2) Pero ha Biblia ginagamit liwat ini nga mga pulong ha iba pa nga kahulogan:

•   Gininhawa.​—Habakuk 2:19; Pahayag 13:15.

•   Hangin.​—Genesis 8:1; Juan 3:8.

•   Pwersa han kinabuhi ha buhi nga mga linarang.​—Job 34:14, 15.

•   Disposisyon han usa nga tawo.​—Numeros 14:24.

•   Espiritu nga mga persona, upod na an Dios ngan an mga anghel.​—1 Hadi 22:21; Juan 4:24.

 An kahulogan han tagsa hini sugad hin nagpapakita nga may-ada pwersa nga diri nakikita han tawo pero nakikita an mga epekto hito. Ha pariho nga paagi, an espiritu han Dios “pariho hin hangin, diri nakikita, waray pisikal nga lawas, ngan gamhanan.”​—An Expository Dictionary of New Testament Words, ni W. E. Vine.

 Gintatawag liwat han Biblia an baraan nga espiritu han Dios sugad nga iya “mga kamot” o “mga tudlo.” (Salmo 8:3; 19:1; Lucas 11:20; ikompara an Mateo 12:28.) Sugad la nga ginagamit han eksperto nga parahimo an iya mga kamot ngan tudlo ha pagtrabaho, ginagamit liwat han Dios an iya espiritu ha paghimo ngan pagpahinabo han masunod:

•   Uniberso.​—Salmo 33:6; Isaias 66:1, 2.

•   Biblia.​—2 Pedro 1:20, 21.

•   Mga milagro nga ginbuhat han iya mga surugoon ha kadaan nga panahon ngan an ira madasigon nga pagsangyaw nga buruhaton.​—Lucas 4:18; Buhat 1:8; 1 Corinto 12:4-11.

•   Mag-opay nga kalidad nga ginpapakita han mga tawo nga nasugot ha iya.​—Galacia 5:22, 23.

An baraan nga espiritu diri usa nga persona

 Ha pagtawag ha espiritu han Dios sugad nga iya “mga kamot,” “mga tudlo,” o “gininhawa,” iginpapakita han Biblia nga an baraan nga espiritu diri usa nga persona. (Exodo 15:8, 10) An mga kamot han eksperto nga parahimo diri makakaglugaring pagtrabaho kon bulag ito ha iya hunahuna ngan lawas; ha pariho nga paagi, an baraan nga espiritu han Dios magios la kon iya ito sugoon. (Lucas 11:13) Ha Biblia, iginpapariho liwat an baraan nga espiritu ha tubig ngan ha mga butang sugad han pagtoo ngan kahibaro. Ini ngatanan nagpapakita nga an baraan nga espiritu diri usa nga persona.​—Isaias 44:3; Buhat 6:5; 2 Corinto 6:6.

 Ginngaranan han Biblia hi Jehova nga Dios ngan an iya Anak, hi Jesu-Kristo; pero waray kita mababasa nga ginngaranan hito an baraan nga espiritu. (Isaias 42:8; Lucas 1:31) Han hi Esteban, nga usa nga Kristiano nga martir, ginpakita hin milagroso nga bisyon mahitungod ha langit, duha la nga persona an iya nakita, diri tulo. An Biblia nasiring: “Hiya, nga puno han baraan nga espiritu, nagtinutok ha langit ngan nakakita han himaya han Dios ngan kan Jesus nga natindog ha too han Dios.” (Buhat 7:55) An baraan nga espiritu an gahum han Dios nga nagpahinabo hito, salit nakita ni Esteban an bisyon.

 Sayop: An “Espiritu Santo,” o baraan nga espiritu, usa nga persona ngan bahin han Trinidad, sumala ha 1 Juan 5:7, 8 ha King James nga Biblia.

 Tinuod: Ha King James nga Biblia upod ha mababasa ha 1 Juan 5:7, 8 an mga pulong nga “ha langit, an Amay, an Pulong, ngan an Espiritu Santo: ngan ini nga tulo uusa la. Ngan may-ada tulo nga nagtitestigo ha tuna.” Pero nadiskobrehan han mga parasaliksik nga ito nga mga pulong waray igsurat ni apostol Juan salit diri ito angay ig-upod ha Biblia. Hi Propesor Bruce M. Metzger nagsurat: “Sigurado nga ini mga pulong igindugang la ngan diri angay ig-upod ha Bag-o nga Tugon.”​—A Textual Commentary on the Greek New Testament.

 Sayop: Ha Biblia gin-uunabi an baraan nga espiritu nga sugad hin persona, ngan nagpapamatuod ini nga usa ito nga persona.

 Tinuod: Usahay ginhuhulagway han Kasuratan an baraan nga espiritu nga sugad hin persona. Pananglitan, gin-unabi ni Jesus an baraan nga espiritu sugad nga “parabulig” (paraclete) nga maghahatag hin ebidensya, maggigiya, magyayakan, mamamati, magsusumat, maghihimaya, ngan makarawat. (Juan 16:7-15) Pero diri ito nagpapamatuod nga an baraan nga espiritu usa nga persona. Ha Biblia, ginhuhulagway liwat an kinaadman, kamatayon, ngan sala, nga sugad hin mga persona. (Proberbios 1:20; Roma 5:17, 21) Pananglitan, nasiring ito nga an kinaadman may “mga buhat” ngan “anak,” ngan an sala ginhuhulagway sugad nga nagsusulay, nagpapatay, ngan nag-aaghat hin kaipa.​—Mateo 11:19; Lucas 7:35; Roma 7:8, 11.

 Sayop: An pagbawtismo ha ngaran han baraan nga espiritu nagpapamatuod nga usa ito nga persona.

 Tinuod: Ha Biblia, an “ngaran” usahay nagsisimbolo hin gahum o awtoridad. (Deuteronomio 18:5, 19-22; Esther 8:10) Puropariho ito ha mga pulong nga “ha ngaran han balaud,” nga diri man nagpapasabot nga an balaud usa nga persona. Ginkikilala han tawo nga nabawtismohan “ha ngaran han” baraan nga espiritu an gahum ngan an papel han baraan nga espiritu basi matuman an kaburut-on han Dios.​—Mateo 28:19.

 Sayop: Natoo an mga apostol ni Jesus ngan an iba pa nga mga disipulo han siyahan nga siglo nga an baraan nga espiritu usa nga persona.

 Tinuod: Waray hito magsiring an Biblia o an kasaysayan. An Encyclopædia Britannica nagsiring: “An ideya nga an Baraan nga Espiritu usa nga baraan nga Persona . . . nagtikang ha Konsilyo han Constantinople han ad 381.” Nahitabo ini sobra 250 ka tuig an naglabay katapos mamatay an ultimo nga apostol.