Genesis 3:1-24
3 Yana an halas+ an pinakaalerto* ha ngatanan nga ihalas nga hayop ha tuna nga ginhimo ni Jehova nga Dios. Salit nagsiring ito ha babaye: “Nagsiring gud ba an Dios nga ayaw kamo pagkaon han bunga han tagsa nga kahoy ha garden?”+
2 An babaye binaton ha halas: “Puydi kami kumaon han bunga han mga kahoy ha garden.+
3 Pero mahitungod han bunga han kahoy nga aada ha butnga han garden, an Dios nagsiring:+ ‘Ayaw kamo pagkaon han bunga hito, ayaw, ayaw kamo pagkapot hito; kay kon buhaton niyo ito, mamamatay kamo.’”
4 An halas nagsiring ha babaye: “Diri gud kamo mamamatay.+
5 Kay maaram an Dios nga ha adlaw mismo nga kumaon kamo han bunga hito, mapupukrat an iyo mga mata ngan magigin pariho kamo ha Dios, mahibabaro kamo han maopay ngan maraot.”+
6 Tungod hito, nakita han babaye nga an bunga han kahoy maopay kaunon ngan nakakadani pagkit-on, oo, makaruruyag kitaon an kahoy. Salit nagkuha hiya hin bunga hito ngan ginkaon ito.+ Katapos, han nakaupod niya an iya bana iya liwat gintagan hiya, ngan kinaon hiya hito.+
7 Ngan napukrat an ira mga mata ngan nasantop nira nga hubo hira. Salit gindurugtong nira an mga dahon han igos ngan igintahob ha palibot han ira pig-i.+
8 Katapos, nabatian nira an tingog ni Jehova nga Dios samtang naglalakat hiya ha garden han mahangin-hangin nga takna han adlaw,* ngan an lalaki ngan an iya asawa nagtago tikang kan Jehova nga Dios didto ha kakahoyan han garden.
9 Ngan gintinawag ni Jehova nga Dios an lalaki ngan nagsiniring ha iya: “Hain ka?”
10 Ha urhi binaton hiya: “Nabatian ko an imo tingog ha garden, pero nahadlok ako kay hubo ako, amo nga nagtago ako.”
11 Tungod hito, Hiya nagsiring: “Hin-o an nagsumat ha imo nga hubo ka?+ Kinaon ka ba han bunga han kahoy nga iginsugo ko nga diri mo kaunon?”+
12 An lalaki binaton: “An babaye nga imo iginhatag basi akon makaupod, hiya an naghatag ha akon han bunga han kahoy, salit kinaon ako.”
13 Tungod hito hi Jehova nga Dios nagsiring ha babaye: “Ano ini nga imo ginbuhat?” An babaye binaton: “Ginlimbongan ako han halas, salit kinaon ako.”+
14 Katapos, hi Jehova nga Dios nagsiring ha halas:+ “Tungod kay ginbuhat mo ini, ikaw la an iginsumpa ha ngatanan nga maanad nga hayop ngan ha ngatanan nga ihalas nga hayop ha tuna. Makamang ka pinaagi han imo tiyan, ngan makaon ka hin tapotapo ha ngatanan nga adlaw han imo kinabuhi.
15 Ngan magbubutang ako hin away*+ butnga nimo+ ngan han babaye+ ngan butnga han imo tulin*+ ngan han iya tulin.*+ Iya dudugmukon* an imo ulo,+ ngan imo sasamaran* an iya tikod.”+
16 Hiya nagsiring ha babaye: “Dudugangan ko hin kasakit an imo pagburod; magigin maul-ol an imo pagpanganak, ngan pagkikinahanglanon mo gud an imo bana, ngan hiya magdudominar ha imo.”
17 Ngan hiya nagsiring kan Adan:* “Tungod kay namati ka ha tingog han imo asawa ngan kinaon han bunga han kahoy nga mahitungod hito ini an akon iginsugo,+ ‘Ayaw pagkaon han bunga hito,’ iginsumpa an tuna tungod ha imo.+ Magsasakit ka basi makakuha hin pagkaon tikang hini ha ngatanan nga adlaw han imo kinabuhi.+
18 Manunubo dida hini an katunokan ngan kabanwaan para ha imo, ngan mga tanom ha tuna an imo kakaunon.
19 Babalhason ngan maniniguro ka ha pagtrabaho basi makakaon hin tinapay* tubtob nga bumalik ka ha tuna, kay ginkuha ka tikang dida.+ Kay tapotapo ka ngan ha tapotapo ka mabalik.”+
20 Katapos hini, ginngaranan ni Adan an iya asawa nga Eva,* kay hiya an magigin iroy han katawohan.*+
21 Ngan naghimo hi Jehova nga Dios hin higlaba nga mga bado tikang ha mga anit para kan Adan ngan ha iya asawa, ngan ira ito iginsul-ot.+
22 Katapos, hi Jehova nga Dios nagsiring: “Kitaa, an tawo nagin pariho ha aton ha paghibaro han maopay ngan han maraot.+ Yana, basi diri niya ig-unat an iya kamot ngan kumuha liwat hin bunga tikang ha kahoy han kinabuhi+ ngan kaunon ito ngan mabuhi ha kadayonan,*—”
23 Tungod hito, ginpagawas hiya ni Jehova nga Dios ha garden han Eden+ basi kultibaron an tuna nga tikang dida hiya ginkuha.+
24 Salit ginpaiwas niya an tawo, ngan nagbutang hiya ha este han garden han Eden hin mga kerubin+ ngan hin nagkakalayo nga espada nga padayon nga nabirik basi bantayan an aragian ngadto ha kahoy han kinabuhi.
Mga footnote
^ O “pinakamaikmat; pinakatuso.”
^ Matin-aw nga nagtutudlok ha mga oras antes matunod an adlaw.
^ O “pupusakon; dudugmukon.”
^ O “pupusakon; tutultugon.”
^ Lit., “binhi.” An Hebreo nga termino mahimo liwat sabton sugad nga plural o kabug-osan.
^ Lit., “binhi.” An Hebreo nga termino mahimo liwat sabton sugad nga plural o kabug-osan.
^ O “kangalas.”
^ Nangangahulogan nga “Tawo; Katawohan.”
^ O “pagkaon.”
^ Nangangahulogan nga “Hiya nga Buhi.”
^ Lit., “ngatanan nga nabubuhi.”
^ O “ha waray kataposan.”
