An Surat ni Santiago 3:1-18
3 Mga kabugtoan ko, diri damu ha iyo an sadang magin mga magturutdo kay maaram kita nga makarawat kita hin mas mabug-at* nga paghukom.+
2 Kay kita ngatanan nahipapakdol* hin damu ka beses.+ Kon may bisan hin-o nga diri nahipapakdol ha pulong, perpekto hiya nga tawo, nga nakakarenda liwat han iya bug-os nga lawas.
3 Kon ginbubutangan naton hin mga renda an mga baba han mga kabayo basi sumugot ito ha aton, napapasunod liwat naton an bug-os nga lawas hito.
4 Kitaa liwat an mga barko: Bisan kon dagku gud ito ngan ginpapadalagan han makusog nga hangin, ginmamaniobra ito pinaagi hin gutiay hinduro nga timon ngadto ha bisan diin nga karuyag kadtoan han timonil.
5 Sugad man, an dila usa nga gutiay nga parte han lawas, pero naghihimo ito hin dagku nga mga paghambog. Kitaa kon ano kaguti nga kalayo an ginkikinahanglan basi makapalarab hin haluag nga kagurangan!
6 An dila usa liwat nga kalayo.+ An dila nagrirepresentar hin kalibotan han pagkadiri-matadong dida ha mga parte han aton lawas, kay ginhuhugawan hito an bug-os nga lawas+ ngan ginsusunog an bug-os nga pagkinabuhi,* ngan ginsusunog ito pinaagi han Gehenna.*
7 Kay an tagsa nga klase han ihalas nga hayop ngan tamsi ngan reptilya* ngan linarang ha dagat ginpapaanad ngan napapaanad han mga tawo.
8 Pero waray tawo nga makakapaanad han dila. Diri ito nakukontrol ngan nakakadaot ito, puno hin makamaratay nga hilo.+
9 Pinaagi hito gindadayaw naton hi Jehova,* an Amay, pero pinaagi liwat hito ginpapanhimaraot naton an mga tawo nga ineksister “nga pariho ha Dios.”+
10 Tikang ha usa nga baba nagawas an pagbendisyon ngan panhimaraot.
Mga kabugtoan ko, diri husto nga an mga butang mahinugad hini.+
11 An tab-ang* nga tubig ngan an mapait nga tubig diri nagawas ha usa la nga burabod, diri ba?
12 Mga kabugtoan ko, an kahoy nga igos diri makakapamunga hin mga olibo, o an tanom nga ubas diri makakapamunga hin mga igos, diri ba?+ Diri man an maasin nga tubig makakahatag hin tab-ang nga tubig.
13 Hin-o ha iyo an maaramon ngan masinabuton? Ipakita niya ito pinaagi han iya maopay nga panggawi, pinaagi han mga buhat nga ginhimo nga may pagkamalumo nga resulta han kinaadman.
14 Pero kon ha iyo kasingkasing may duro nga pangabugho+ ngan hilig ha pakiglantugi,*+ ayaw paghinambog+ ngan pagbinuwa kontra han kamatuoran.
15 Diri ito an kinaadman nga nagtitikang ha kahitas-an; lugod tunan-on ito,+ hayupnon, kanan demonyo.
16 Kay kon diin may pangabugho ngan hilig ha pakiglantugi,* magkakaada liwat kasamok ngan ngatanan nga magraot nga buhat.+
17 Pero an kinaadman nga tikang ha kahitas-an, una ha ngatanan putli,+ katapos mamurayawon,+ makatadunganon,+ andam ha pagsugot, puno hin kalooy ngan mag-opay nga mga bunga,+ waray ginpapaurog,+ diri hipokrito.+
18 Dugang pa, an bunga han katadongan igintatanom ha murayaw nga mga kahimtang+ para ha* mga nakikigmurayaw.+
Mga footnote
^ O “mas istrikto.”
^ O “nakakasayop.”
^ Lit,. “an kaliding han katawo (gintikangan).”
^ O “nagkakamang nga linarang.”
^ Lit., “matam-is.”
^ O posible nga “hakog nga ambisyon.”
^ O posible nga “hakog nga ambisyon.”
^ O posible nga “pinaagi han.”
