INABAT ka na ba hin kasubo ngan kamingaw?— Naghunahuna ka na ba kon may-ada nahigugma ha imo?— Naghuhunahuna hito an iba nga kabataan. Kondi an Dios nagsasaad: “Ako diri mahingangalimot ha imo.” (Isaias 49:15) Diri ba makalilipay hunahunaon ito?— Oo, hi Jehova nahigugma gud ha aton!

An usa nga parasurat han Biblia nagsiring: “Kon an akon amay ngan an akon iroy magpasibaya ha akon, dida hini kukuhaon ako ni Jehova.” (Salmo 27:10) Nakakaliaw gud ha aton nga mahibaroan ito, diri ba?— Oo, hi Jehova nagsusumat ha aton: “Diri ka mahadlok, kay ako upod ha imo. . . . Ako mabulig ha imo.”​—Isaias 41:10.

Kondi, usahay, tinutugotan ni Jehova hi Satanas nga maghimo hin mga problema para ha aton. Tinutugotan pa ngani ni Jehova hi Satanas nga sarihan an Iya mga surugoon. Usa ka beses, ginpaantos gud han Yawa hi Jesus salit hi Jesus nagsinggit ha daku nga tingog ngadto kan Jehova: “Dios ko, Dios ko, kay ano nga imo ako ginpapabay-an?” (Mateo 27:46) Bisan kon hi Jesus nag-antos, maaram pa gihapon hiya nga hi Jehova nahigugma ha iya. (Juan 10:17) Kondi maaram liwat hi Jesus nga tinutugotan han Dios hi Satanas nga sarihan an Iya mga surugoon ngan paantuson hira. Isasaysay ha lain nga kapitulo kon kay ano nga tinutugotan han Dios hi Satanas nga buhaton ini.

Kon kabataan pa kita, nahahadlok kita usahay. Pananglitan, nawara ka na ba?— Nahadlok ka ba?— Damu nga kabataan an mahahadlok. An Bantogan nga Magturutdo makausa nga nag-istorya mahitungod han usa nga nawara. Kondi diri bata an nawara. Usa nga karnero.

Ha pipira nga paagi pariho ka han usa nga karnero. Paonan-o? Aw, an mga karnero diri daku hinduro o makusog. Ngan nagkikinahanglan hira hin usa nga magmamangno ha ira ngan magpapanalipod ha ira. An tawo  nga nagmamangno han mga karnero tinatawag nga magbarantay.

Ha iya istorya gin-unabi ni Jesus an mahitungod han usa nga magbarantay nga may-ada usa ka gatos nga karnero. Kondi nawara an usa han mga karnero. Bangin karuyag hito makita an luyo nga dapit han bungtod. Kondi waray pag-iha, hirayo na ha iba ito nga karnero. Mahahanduraw mo ba an inabat hito nga karnero han ginkita hito an palibot ngan nakita nga nag-uusahan hiya?—

Ano an bubuhaton han magbarantay han hinbaroan niya nga nawawara an usa nga karnero? Masiring ba hiya nga sayop ito han karnero salit diri hiya sadang mabaraka hito? O babayaan ba niya an 99 nga karnero ha talwas nga lugar ngan bibilngon an usa la nga nawara? Takos ba an usa la nga karnero hiton daku nga pangalimbasog?— Kon ikaw an nawara nga karnero, karuyag mo ba nga bilngon ka han magbarantay?—

Hinigugma gud han magbarantay an ngatanan nga iya mga karnero, bisan an usa nga nawara. Salit iya ginbiling an usa nga nawawara. Hunahunaa an daku nga kalipay han nawara nga karnero han nakita hito an magbarantay nga tiarabot! Ngan siring ni Jesus nga an magbarantay nalipay gud nga hin-agian niya an iya karnero. Nalipay hiya hito labaw kay ha 99 nga  karnero nga waray mawara. Hin-o an pariho han magbarantay ha istorya ni Jesus? Hin-o an nahigugma ha aton sugad la han paghigugma han magbarantay ha iya karnero?— Siring ni Jesus nga an iya Amay nga aadto ha langit. Ngan an iya Amay amo hi Jehova.

Hi Jehova nga Dios amo an Daku nga Magbarantay han iya katawohan. Hinigugma niya an ngatanan nga nag-aalagad ha iya, upod na an gudtiay nga kabataan sugad ha imo. Diri niya karuyag nga madaot o mabungkag an bisan hin-o ha aton. Nakakaliaw gud hibaroan nga sugad hito kadaku an gugma han Dios ha aton!​—Mateo 18:12-14.

Natoo ka gud ba kan Jehova nga Dios?— Totoo ba hiya nga persona ha imo?— Totoo nga diri naton nakikita hi Jehova, tungod kay Espiritu hiya. May-ada hiya lawas nga diri-nakikita han aton mga mata. Kondi totoo hiya nga persona, ngan nakikita niya kita. Maaram hiya kon nagkikinahanglan kita hin bulig. Ngan makakaistorya naton hiya ha pag-ampo, sugad la han aton pakiistorya ha iba nga tawo dinhi ha tuna. Karuyag ni Jehova nga buhaton naton ini.

 Salit kon nasusubo ka o nag-uusahan, ano an sadang mo buhaton?— Pakiistorya kan Jehova. Magin duok ha iya, ngan hiya magliliaw ngan mabulig ha imo. Hinumdumi nga hi Jehova nahigugma ha imo, bisan kon inaabat mo nga nag-uusahan ka. Kuhaon naton an aton Biblia. Dinhi ha Salmo 23 ginsusumatan kita, tikang ha bersikulo 1: “Hi Jehova amo an akon Magbarantay; diri magkukulang ha akon. Iya ako ginpapahigda ha mga hilaw nga sabsaban; iya ako gintutugwayan ha ligid han mga maglinaw nga tubig.”

Tigamni an igindugang han parasurat, ha bersikulo 4: “Bisan ako maglakat ha patag han lambong han kamatayon. Diri ako mahahadlok han bisan ano nga maraot; kay ikaw upod nakon; an imo baston ngan an imo tungkod, nakakaliaw ha akon.” Sugad hito an inaabat han mga tawo kon hi Jehova an ira Dios. Naliliaw hira kon may-ada hira problema. Sugad ba hito an inaabat mo?—

Sugad han mahigugmaon nga magbarantay nga nagmamangno ha iya panon han kakarnerohan, ha sugad man nga paagi nagmamangno hi Jehova ha iya katawohan. Iya ipinapakita ha ira an husto nga dalan, ngan malipayon hira nga nasunod ha iya. Bisan kon masamok an ira palibot, diri hira kinahanglan mahadlok. Ginagamit han magbarantay han kakarnerohan an iya baston o an iya tungkod basi panalipdan an mga karnero tikang ha mga hayop nga bangin magdaot ha ira. An Biblia nagsusumat kon paonan-o ginpanalipdan han batan-on nga magbarantay nga hi David an iya mga karnero tikang ha leon ngan oso. (1 Samuel 17:34-36) Ngan  maaram an katawohan han Dios nga hi Jehova magpapanalipod liwat ha ira. Inaabat nira nga talwas hira tungod kay kaupod nira an Dios.

Hi Jehova nahigugma gud ha iya mga karnero, ngan mahigugmaon nga iya ginmamangnoan hira. An Biblia nasiring: “Sugad hin magbarantay han mga karnero, [iya tutugwayan an iya mga karnero], iya pagtitirukon an mga nati nga karnero dida ha iya butkon.”—Isaias 40:11.

Diri ka ba nalilipay nga nahibaro ka nga sugad hito hi Jehova?— Karuyag mo ba magin usa han iya mga karnero?— An mga karnero namamati ha tingog han ira magbarantay. Nagpapabilin hira nga duok ha iya. Namamati ka ba kan Jehova?— Nagpapabilin ka ba nga duok ha iya?— Niyan diri ka gud angay nga mahadlok. Hi Jehova maupod ha imo.