MGA siglo pa antes sumulod an Israel ha Kanaan, iginsaad na ni Jehova ito nga nasud ha katulinan ni Abraham. Hito nga panahon, hirani na pagtag-iyahon han mga Israelita an Tuna nga Iginsaad ha panguna ni Josue.

Ginhukman han Dios an mga taga-Kanaan nga takos bungkagon. Ira ginpuno an tuna hin kalaw-ayan ngan hin duro nga pamatay. Tungod hito, an mga syudad han Kanaan nga ginsakop han mga Israelita sadang gud bungkagon.

Kondi, antes sumulod ha Kanaan, nagsugo hi Josue hin duha nga espiya ngan nag-ukoy ha syudad han Jeriko ha balay ni Rahab. Samtang nalungon ha iya balay, ginpanalipdan ni Rahab an mga espiya bisan kon maaram hiya nga Israelita hira. May pagtoo hiya ha Dios han mga Israelita, tungod kay hinbatian na niya an mga pagtalwas nga ginhimo ni Jehova ha Iya katawohan. Ginpasaad ni Rahab an mga espiya nga hiya ngan an iya pamilya diri patayon.

Ha urhi, han sinulod an mga Israelita ha Kanaan ngan kinadto kontra ha Jeriko, milagroso nga ginpahinabo ni Jehova nga marumpag an pader han Jeriko. Sinulong an kasundalohan ni Josue ngan ginbungkag an syudad, kondi gintipigan nira nga buhi hi Rahab ngan an iya pamilya. Ha sunod-sunod nga araway nga inabot hin unom ka tuig, nasakop ni Josue an daku nga bahin han Tuna nga Iginsaad. Katapos, ginbahin-bahin ito ha mga tribo ni Israel.

Han hirani na mamatay hi Josue, iya ginpatawag an mga Israelita. Ginpahinumdom niya hira han mga ginbuhat ni Jehova ha ira kaapoy-apoyan ngan ginsagda nga mag-alagad ha Iya. Kondi, han mamatay hi Josue ngan an katigurangan, ginbayaan han mga Israelita hi Jehova ngan nag-alagad hin palso nga mga dios. Ha sulod hin mga 300 ka tuig, an nasud waray magpadayon ha pagsunod han mga balaud ni Jehova. Hito nga panahon, gintugotan ni Jehova nga talumpiguson an Israel han ira mga kaaway, sugad han mga Pilisteohanon. Kondi han nangaro hin bulig an mga Israelita kan Jehova, nagtoka hiya hin mga hukom​—12 ngatanan​—ha pagtalwas ha ira.

An peryodo han mga Hukom nga nakarekord ha libro han Hukom nagtikang kan Otniel ngan nagtapos kan Samson, an pinakamakusog nga tawo nga nabuhi. An importante nga kamatuoran nga pauroutro nga iginpapakita han makapainteres nga asoy ha libro han Biblia nga Hukom amo ini: An pagkamasinugtanon kan Jehova nagriresulta ha mga bendisyon, an pagtalapas ha karaotan.

​—Iginbasar ha Josue; Hukom; Lebitiko 18:24, 25.