Ha sulod hin yinukot ka tuig, waray maaram han baton hito. Hito nga panahon, minilyon an namatay tungod han mga sakit ngan epidemya. Ha urhi, nahibaroan han mga syentista an kamatuoran. Nadiskobrehan nira nga an kaurogan nga hinungdan han sakit amo an mga kagaw​—mga mikrobyo, sugad han bakterya o virus. An paghibaro hito nga kamatuoran nakabulig nga malikyan ngan matambal an damu nga sakit, salit binilyon an nagkaada mas hilawig ngan mas mahimsog nga kinabuhi.

Kumusta man an iba pa nga importante nga pakiana? Ano daw la an magigin epekto ha imo han pakabiling han tinuod nga baton han masunod nga mga pakiana?

• Hin-o an Dios?

• Hin-o hi Jesu-Kristo?

• Ano an Ginhadian han Dios?

• Ano an aton kabubuwason?

Minilyon an nakabiling han baton hito nga mga pakiana ngan nagin mas maopay an ira kinabuhi. Mahimo ka liwat magpahimulos han mga baton hito.

Bangin makapakiana ka, ‘Paonan-o posible mahibaroan an kamatuoran mahitungod ha bisan ano nga butang?’ Kon huhunahunaon, an paghibaro ha kamatuoran baga hin nagtitikakuri la. Kay ano?

Damu nga tawo an diri natapod nga isusumat ha ira han mga gobyerno, kompanya, o media an kamatuoran. Nakukurian hira paghibaro kon kamatuoran ba an iginsusumat ha ira o kon opinyon la, diri bug-os nga impormasyon, o buwa pa ngani. Tungod kay komon an pagin diri tangkod ngan sayop nga mga impormasyon, diri nagkakauruyon an mga tawo kon paonan-o sasabuton an kamatuoran ngan kon ano gud an kamatuoran.

Bisan pa hito, posible mabilngan an tinuod nga baton ha importante nga mga pakiana ha kinabuhi. Paonan-o? Pinaagi han pagbuhat han imo normal nga ginhihimo kon namimiling hin baton ha diri sugad kaimportante nga pakiana.

Adlaw-adlaw, namimiling ka hin kamatuoran. Kitaon naton an kahimtang ni Jessica. “Grabe gud an allergy ha mani han akon anak,” siring niya, “bisan an gutiay la hinduro nga mani mahimo na makamatay ha iya.” Ginsisiguro ni Jessica nga diri makakadaot ha iya anak an iya papaliton nga pagkaon. “Una, ginbabasa ko hin maopay an impormasyon basi mahibaroan an mga ingredient hito. Sunod, nagsasaliksik ako ngan ginkukontak pa ngani an kompanya nga naghimo hito basi masiguro nga waray naihalo bisan gutiay la nga mani. Namimiling liwat ako hin iba nga matataporan nga impormasyon basi masiguro nga ginsusunod nira an talwas nga pamaagi ha pag-andam hin pagkaon.”

An imo adlaw-adlaw nga pagpamiling hin kamatuoran bangin diri sugad kakuti han ginbubuhat ni Jessica, pero pariho ha iya, puydi mo gamiton an masunod nga pamaagi basi mabaton an imo mga pakiana:

• Hibaroi an impormasyon.

• Dugang nga magsaliksik.

• Siguroha nga matataporan an gintikangan han impormasyon.

Ini nga mga paagi mabulig liwat ha imo basi mabilngan an tinuod nga baton ha importante nga mga pakiana ha kinabuhi. Paonan-o?

Han nagbibiling hi Jessica han kamatuoran ha Biblia, gin-gamit niya an pariho nga pamaagi ha pagsaliksik may kalabotan ha allergy han iya anak. Nagsiring hiya, “An pagbasa hin maopay ngan maduruto nga pagsaliksik, nakabulig ha akon nga mabilngan an kamatuoran ha Biblia.” Pariho kan Jessica, minilyon an nahibaro ha ginsisiring han Biblia mahitungod hini nga mga pakiana:

• Kay ano nga aanhi kita?

• Ano an nahitatabo kon namamatay an tawo?

• Kay ano nga nag-aantos kita?

• Ano an ginhihimo han Dios basi mawara an pag-antos?

• Paonan-o magigin malipayon an aton pamilya?

Mabibilngan mo an tinuod nga baton hini nga mga pakiana pinaagi ha pagbasa han Biblia ngan dugang nga pagsaliksik ha www.ps8318.com/war.