An tinuod nga komunikasyon naeksister kon ikaw ngan an imo anak nagbabalyoay han iyo ginhuhunahuna ngan gin-aabat.

Mas makuri an pakiistorya labi na ha mga tin-edyer. Bangin han gudti pa an imo mga anak, “baga hin may-ada ka permiso makasulod ha backstage [karuyag sidngon ha pribado nga lugar] han ira kinabuhi,” siring han libro nga Breaking the Code. “Yana mas maopay na kon magkaada ka nakareserba nga lingkoran ha audience, ngan bangin diri pa ngani ito an pinakamaopay nga pwesto.” Bisan kon baga hin diri naruruyag makiistorya an imo mga anak, ini an takna diin importante an iyo komunikasyon!

Magpahiuyon kon san-o karuyag makiistorya an imo anak. Himoa ini bisan kon nangangahulogan ini hin pakiistorya ha iya ha katutnga han gab-i.

“Bangin karuyag mo sumiring: ‘Yana karuyag mo makiistorya? Magkaupod kita ha bug-os nga adlaw!’ Kondi mareklamo pa ba kita kon karuyag han aton anak makiistorya ha aton? Diri ba ito an hingyap han ngatanan nga kag-anak?”—Lisa.

“Karuyag ko temprano nga kumaturog, kondi an pinakasinsero nga pag-istorya namon han akon tin-edyer nga mga anak nahitatabo paglabay han katutnga han gab-i.”—Herbert.

PRINSIPYO HAN BIBLIA: “An kada tagsa padayon nga mangalimbasog diri para ha iya kalugaringon nga kaopayan, kondi para ha kaopayan han iba nga tawo.”—1 Corinto 10:24.

Ayaw pagpaulang. Usa nga tatay an nagsiring: “Usahay may iba ako nga ginhuhunahuna samtang nakikiistorya an akon mga anak. Ngan diri ko hira nauuwat—nahibabaroan nira ito!”

Kon ito liwat an imo ginbubuhat, paronga an TV ngan ibutang anay an imo mga gadyet. Igsentro an imo hunahuna ha ginsisiring han imo anak ngan tagda an iya kabaraka sugad nga takos han imo bug-os nga atensyon, bisan kon baga hin gutiay la ito nga butang.

“Kinahanglan ipaabat naton ha aton mga anak nga importante ha aton an ira inaabat. Kay kon diri, bangin diri hira magsumat han ira inaabat o mangaro hin bulig ha iba.”—Maranda.

“Ayaw kasina dayon kon diri husto an ginhuhunahuna han imo anak.”—Anthony.

PRINSIPYO HAN BIBLIA: “Tagi hin atensyon kon paonan-o kamo namamati.”—Lucas 8:18.

Salingabota an diri pormal nga mga higayon. Usahay mas nakikiistorya an kabataan kon diri hira nakaatubang ha ira kag-anak.

“Ginsasalingabot namon kon nagbibiyahe kami. Kon magkasapit kami, nagkakaistorya kami hin maopay kay ha kon magkaatubang kami.”—Nicole.

An pangaon usa liwat nga higayon para hin diri pormal nga pag-uroistorya.

“Kon nangingiklop kami, iginsusumat han kada tagsa ha amon an maraot ngan an maopay nga nahitabo durante hito nga adlaw. Nagbubugkos ini ha amon ngan nagpapasarig nga diri kami nag-uusahan kon may problema kami.”—Robin.

PRINSIPYO HAN BIBLIA: “Magin alisto ha pagpamati [ngan] mahinay ha pagyakan.”—Santiago 1:19.