Kon Kay Ano nga Nasingba Hira

“HAROS upat ka pilo na an kadamu yana han mga Presbiteryano ha Republika han Korea kay han ha Amerika.” Posible nga nahipausa hito nga mga pulong ha Newsweek nga magasin an damu nga mga parabasa, tungod kay kadam-an nga mga tawo an naghuhunahuna han Korea sugad nga usa nga nasud diin damu an Confuciano o Budhista. Yana, makikita han usa nga bisita an damu nga “Kristiano” nga mga singbahan didto, kasagaran nga nakikilala tungod han mga krus nga pinalibotan hin masilaw nga pula nga mga bombilya. Ha mga Domingo, komon na an pakakita hin mga grupo han duha o tulo ka tawo nga may-ada mga Biblia ngan tikadto ha singbahan. Sumala ha usa nga surbey han 1998, haros 30 porsyento han mga Koreano an nasingba ha Katoliko o ha Protestante nga singbahan, mas damu pa kay han nasiring nga mga Budhista hira.

Yana nga mga panahon, talagsahon an pakakita hin sugad kahitaas nga porsyento han mga tawo ha bisan diin nga regular nga nasingba. Ha gihapon, nahitatabo ito diri la ha Korea kondi ha iba liwat nga mga nasud ha Asia, sugad man ha Aprika ngan Latin Amerika. Kay ano nga damu pa gihapon an nag-aangkon nga natoo hira ha Dios bisan kon baga hin kaylap na hinduro an kawaray-interes ngan kawaray-pagtagad ha relihiyon? Kay ano nga nasingba hira?

Usa nga surbey han Gallup an nagsumat nga sobra ha katunga han mga magsiringba ha Korea an namimiling hin kamurayawan han hunahuna; mga ikatulo ka bahin an naglalaom hin waray-kataposan nga kinabuhi katapos han kamatayon; ngan 1 ha kada 10 an naglalaom hin kahimsog, karikohan, ngan kalamposan.

Damu nga mga tawo ha Tsina an nasingba tungod kay naglalaom nga makakabiling hira hin magpupuno han nagin resulta nga espirituwal nga kakulangan samtang hinayhinay nga ginwawara han mga tumong nga iginbasar ha kapitalismo an ideolohiya han Komunista. Kada tuig, minilyon nga Biblia an iniimprinta ngan ipinapanaltag ha Tsina, ngan an mga tawo baga hin nagbabasa hito nga may pariho nga kadasig ha ira pagbasa han gutiay nga pula nga libro ni Mao.

An iba nga mga Katoliko ha Brazil, labi na adton aada ha mas bata nga henerasyon, diri kontento ha saad nga kalipayan ha tiarabot nga kinabuhi​—⁠karuyag nira an katumanan han saad nga kalipayan ha kinabuhi yana. An  Tudo nga magasin han mga sumat nasiring: “Kon teolohiya han kagawasan an nagpagios han mga tawo ha dekada ’70, an teolohiya han kauswagan an nag-aaghat ha mga tawo yana.” Usa nga surbey ha Britanya an naghangyo ha mga magsiringba didto nga unabihon an usa nga ira naruyagan mahitungod han ira singbahan. Pagtarotarampo an nangunguna nga baton han kadam-an.

Ipinapakita hini ngatanan nga bisan kon damu han mga tawo an natoo pa gihapon ha Dios, kadam-an an mas interesado mahitungod han ira mapapahimulosan yana kay han mahitungod ha tidaraon​—⁠o mahitungod pa ngani ha Dios mismo. Ano ha hunahuna mo an husto nga hinungdan ha pagtoo ha Dios? Ano an isisiring han Biblia mahitungod hini? Mabibilngan mo an baton ha sunod nga artikulo.