Han Mierkoles han aga, Septyembre 5, 2012, iginpahibaro ha pamilya han Bethel ha United States ngan Canada nga usa nga bag-o nga membro an igindugang ha Nagmamando nga Lawas han mga Saksi ni Jehova. Han Septyembre 1, 2012, hi Mark Sanderson nagtikang mag-alagad sugad nga membro han Nagmamando nga Lawas.

Hi Brother Sanderson ginpadaku han iya Kristiano nga mga kag-anak ha San Diego, California, U.S.A., ngan nabawtismohan han Pebrero 9, 1975. Nagtikang hiya magpayunir han Septyembre 1, 1983 ha Saskatchewan, Canada. Han Disyembre 1990 naggradwar hiya ha ikapito nga klase han Ministerial Training School (yana tinatawag nga Bible School for Single Brothers) ha United States. Hi Brother Sanderson igintoka sugad nga espesyal payunir ha isla han Newfoundland, Canada, han Abril 1991. Katapos mag-alagad sugad nga kasaliwan nga paramangno han sirkito, gin-imbitar hiya nga magin membro han pamilya han Bethel ha Canada han Pebrero 1997. Han Nobyembre 2000, iginbalhin hiya ha sanga nga opisina ha United States, ngan nagtrabaho hiya ha Hospital Information Services ngan ha urhi ha Service Department.

Han Septyembre 2008, hi Brother Sanderson ineskwela ha School for Branch Committee Members ngan katapos igintoka sugad nga membro han Komite han Sanga ha Pilipinas. Han Septyembre 2010, gin-imbitar hiya nga bumalik ha United States, diin nag-alagad hiya sugad nga kabulig ha Service Committee han Nagmamando nga Lawas.