AN Biblia nasiring nga an pipira nga lugar ha Tuna nga Iginsaad mga kagurangan ngan ‘hura’ hin kakahoyan. (1 Hadi 10:27; Jos. 17:15, 18) Pero may mga nagruruhaduha kon tinuod ba ito tungod kay kadak-an nga bahin han Israel yana waray na kakahoyan.

An libro nga Life in Biblical Israel nagsaysay nga “mas haluag gud an mga kagurangan ha Israel hadto kay ha yana.” An mga kabukiran napuputos hin mga kakahoyan sugad han Aleppo pine (Pinus halepensis), evergreen oak (Quercus calliprinos), ngan terebinth (Pistacia palaestina). Damu liwat an sikomoro (Ficus sycomorus) ha Sepela, usa nga lugar nga nag-uupod han kabungtoran ha ubos han kabukiran tubtob ha Baybayon han Mediteranyo.

An libro nga Plants of the Bible nagsiring nga an pipira nga lugar ha Israel yana waray na gud kakahoyan. Ano an hinungdan hini? Iginsaysay han libro nga hinay-hinay ini nga nahitabo, ito nagsiring: “Padayon nga gindaot han mga tawo an mga tanom basi pahaluagon an ira urumhan ngan panabsaban, ngan basi makakuha hin materyales para ha konstruksyon ngan magkaada mga sungo.”