Kada Disyembre, nagsasarang ha bug-os nga kalibotan an retrato o hulagway ni Jesus sugad nga minasus-an. Aada hiya ha pasabsaban, usa nga daku nga kahon nga ginbubutangan han dagami nga ipakaraon ha mga hayop. Kondi sadang ba naton hinumdumon hi Jesus sugad nga usa la nga minasus-an?— * Pag-istoryahan naton an mas importante nga paagi ha paghinumdom ha iya. May mahibabaroan kita ha nahitabo han usa ka gab-i ha usa nga grupo han magbarantay hin karnero nga nakadto ha kapatagan hirani ha Betlehem.

Usa nga anghel an tigda nga nagpakita ha mga magbarantay hin karnero. Hiya nagsiring ha ira: “Natawo yana . . . an iyo Paratalwas, an Kristo nga Ginoo.” An anghel nagsiring liwat nga makikita nira hi Jesus nga “ginputos hin lampin ngan nahigda ha sabsaban.” Waray pag-iha, damu nga iba pa nga anghel an nagtikang ‘pagdayaw ha Dios.’

Ano an imo aabaton kon makabati ka hin mga anghel nga nagdadayaw ha Dios?— Nalipay an mga magbarantay hin karnero! Hira nagsiring: “Kadto dayon kita ha Betlehem, ngan kitaon naton ini nga hitabo.” Didto naabtan nira hira ‘Maria ngan Jose, pati an minasus-an nga nahigda ha sabsaban.’

May mga umabot liwat ha Betlehem diin nakadto hira Maria ngan Jose. Han magsumat an mga magbarantay hin karnero kon ano an nahitabo, hira nahipausa. Nalilipay ka ba mahibaro hinin urusahon nga mga panhitabo?— Ngatanan kita nga nahigugma ha Dios nalilipay. Yana, aton kitaon kon kay ano nga an katawo ni Jesus hinungdan hin daku nga kalipay. Basi mahimo ito, balikon naton an panahon antes mag-asawa hi Maria.

Usa ka adlaw, ginbisita hi Maria han anghel nga hi Gabriel. Nagsaad hiya nga magbuburod hi Maria hin minasus-an nga ‘magigin harangdon ngan tatawagon nga Anak han Gihitaasi.’ ‘Magmamando hiya sugad  nga Hadi,’ siring ni Gabriel, “ngan waray kataposan an iya Ginhadian.”

Karuyag ni Maria hibaroan kon paonan-o ito mahitatabo tungod kay usa hiya nga birhen. Salit hi Gabriel nagsiring ha iya: “An gahum han Gihitaasi malandong ha imo,” ngan an “matatawo tatawagon nga baraan ngan Anak han Dios.” Tikang ha langit iginbalhin han Dios an kinabuhi han iya Anak ngadto ha tagoangkan ni Maria basi didto magtubo sugad nga minasus-an—usa gud ito nga daku nga milagro!

Nakakita ka na ba hin mga retrato o mga displey han tulo nga “hadi” nga binisita han minasus-an nga hi Jesus kaupod han mga magbarantay hin karnero?— Kon Pasko, makikita ito ha bisan diin. Kondi sayop ito. Ito nga mga “hadi” mga astrologo, mga tawo nga nagbubuhat han mga butang nga ginkukondenar han Dios. Kitaon naton an nahitabo han umabot hira. An Biblia nasiring: “Pagsulod nira ha balay, nakita nira an bata ngan an iya nanay nga hi Maria.” Salit hito nga panahon, hi Jesus diri na minasus-an nga nakadto ha pasabsaban; usa na hiya nga bata nga nag-uukoy ha usa nga balay kaupod nira Jose ngan Maria!

Paonan-o nabilngan hi Jesus han mga astrologo?— Gintugwayan hira hin usa nga “bitoon,” diri ngadto ha Betlehem, kondi siyahan kan Hadi Herodes ha Jerusalem. An Biblia nasiring nga karuyag ni Herodes mabilngan hi Jesus basi patayon ito. Yana, hunahunaa ini. Hin-o an nagpahinabo nga magkaada “bitoon” nga maggigiya ha mga astrologo ngadto kan Herodes?— Diri an tinuod nga Dios, hi Jehova, kondi an iya kaaway, hi Satanas nga Yawa!

Yana, nangangalimbasog hi Satanas nga hunahunaon naton hi Jesus sugad nga usa la gihapon nga minasus-an nga waray mahihimo. Kondi hi anghel Gabriel nagsiring kan Maria: ‘Magmamando hiya sugad nga Hadi, ngan waray kataposan an iya Ginhadian.’ Yana hi Jesus nagmamando sugad nga Hadi ha langit, ngan ha diri maiha iya pupoohon an mga kaaway han Dios. Ito an sadang gud naton mahinumdoman mahitungod kan Jesus, ngan kinahanglan naton ito isumat ha iba.