Handurawa an usa nga amay nga nag-iistorya ha iya syete anyos nga anak. Hiya nagsiring: “Hadton una nga panahon ginlarang han Dios an tuna ngan an ngatanan nga aada hito, pati na an adlaw, bulan, ngan mga bitoon.” Naghunahuna anay an bata ngan nagpakiana, “Tay, hin-o an naghimo han Dios?”

“Waray naghimo han Dios,” an baton han tatay. “Waray tinikangan ngan waray kataposan an iya pag-eksister.” Igo na adto nga baton, nalipay na an bata. Kondi samtang nagtutubo, ginhuhunahuna la gihapon niya ito nga pakiana. Diri niya masabtan kon paonan-o an usa waray tinikangan. Bisan an uniberso may tinikangan. Salit naghunahuna na liwat hiya, ‘Diin tikang an Dios?’

Ano an baton han Biblia? Aw, puropariho la han baton han tatay nga gin-unabi kanina. Hi Moises nagsurat: “Ginoo, . . . han waray kahihimo an mga bukid, ngan imo ginbuhat an tuna ngan an kalibotan, ngan tikang han waray kataposan ngadto ha waray kataposan, ikaw Dios.” (Salmo 90:1, 2) Ha pariho nga paagi, hi propeta Isaias nagsiring: “Waray ka ba mahibaro? Waray ka ba pakabati? An Dios ha kadayonan, hi Jehova an Magburuhat han mga kataposan han tuna.” (Isaias 40:28) An surat ni Judas nasiring liwat nga an Dios naeksister “ha ngatanan nga naglabay nga panahon.”—Judas 25.

Iginpapakita han mga teksto nga gin-unabi nga an Dios “an Hadi ha kadayonan,” ngan ito an pagkahulagway ha iya ni apostol Pablo. (1 Timoteo 1:17) Nangangahulogan ini nga naeksister na gud an Dios mationan-o man kahirayo naton balikon an naglabay. Ngan padayon hiya nga maeksister ha tidaraon. (Pahayag 1:8) Tungod hito, an iya waray tinikangan ngan waray kataposan nga pag-eksister usa nga importante nga kalidad han Makagarahum-ha-ngatanan.

Kay ano nga nakukurian kita pagsabot hini nga ideya? Tungod kay limitado la an kahilawig han aton kinabuhi, salit an aton konsepto ha panahon iba gud ha panhunahuna ni Jehova, ngan tungod kay waray kataposan an iya pagka-Dios, an usa ka yukot ka tuig sugad la hin usa ka adlaw para ha iya. (2 Pedro 3:8) Ha pag-ilustrar: Masasabtan ba han apan nga nabubuhi la hin mga 50 ka adlaw an kahilawig han aton kinabuhi nga 70 o 80 ka tuig? Diri gud! Pero nasiring an Biblia nga pariho la kita hin apan kon itanding ha Harangdon nga Maglalarang. Bisan an aton abilidad ha paghunahuna hirayo gud kon itanding han iya panhunahuna. (Isaias 40:22; 55:8, 9) Salit diri kita angay mahipausa nga may mga aspekto han pagka-Dios ni Jehova nga diri naaabot han aton panhunahuna.

Bisan kon diri naton bug-os nga masabtan an pagin waray kataposan han pagka-Dios ni Jehova, nakikita naton nga lohikal ito. Kon may naglarang han Dios, ito amo an magigin Maglalarang. Kondi sugad han siring han Biblia, hi Jehova an “naghimo han ngatanan nga butang.” (Pahayag 4:11) Dugang pa, maaram kita nga may panahon hadto nga waray pa an uniberso. (Genesis 1:1, 2) Diin ito tikang? Kinahanglan naeksister na an naglarang hito. Naeksister na liwat hiya antes pa man han intelihente nga mga linarang, sugad han iya bugtong nga Anak ngan han mga anghel. (Job 38:4, 7; Colosas 1:15) Matin-aw, may panahon nga nag-usahan la an Dios. Waray ha iya naglarang; waray nag-eksister nga mahimo maglarang ha iya.

An pag-eksister naton ngan han bug-os nga uniberso pamatuod nga may-ada waray kataposan nga Dios. Naeksister na gud pirme an Usa nga nag-oorganisar han aton haluag nga uniberso, ngan an Usa nga naghimo han mga balaud nga nagkukontrol hito. Hiya gud la an makakaghatag hin kinabuhi ha ngatanan.—Job 33:4.