Ha temprano han dekada han 1930, an Indonesia, Malaysia, ngan an Papua New Guinea na yana, waray pa gud masangyawi han mga Saksi ni Jehova. Paonan-o makakaabot hito nga mga nasud an maopay nga sumat? Basi masangyawan ito nga mga nasud, nagpalit an Australia branch (Australasia branch na yana) hin de-makina ngan de-layag nga lantsa nga 16 ka metros an kahilaba. Ginngaranan ito hin Lightbearer kay gagamiton ito han mga tripulante, nga ngatanan payunir, a basi ipasamwak an espirituwal nga kahayag ngadto ha higrayo nga lugar.​—Mateo 5:14-16.

 Han Pebrero 1935, an pito nga tripulante naglayag tipanorte tikang ha Sydney, ha este nga baybayon han Australia, tipakadto ha Port Moresby, New Guinea. Samtang naglalayag, nangingisda hira ngan naduong ha pipira nga pantalan para magpagasolina, pumalit hin ekstra nga pagkaon, ngan magpaayad han lantsa. Han Abril 10, 1935, naglayag hira tikang ha Cooktown, Queensland. Ginpaandar nira an makina han lantsa samtang naagi hira ha Great Barrier Reef nga delikado gud. Pero nagkaada kakaiba nga tunog an makina salit ira ito ginparong. Mabalik ba hira o magpapadayon paglayag ngadto ha New Guinea? An kapitan nga hi Eric Ewins nagsiring, “diri kita mabalik.” Salit padayon nga naglayag an Lightbearer, ngan talwas nga nakaabot ha Port Moresby han Abril 28, 1935.

Samtang gin-aayad han usa nga mekaniko an makina, an mga tripulante labot la kan Frank Dewar, nagsangyaw han maopay nga sumat ha Port Moresby. Hi Frank, nga an diskripsyon ha iya han usa nira nga kaupod “maduruto nga payunir,” nagsiring, ‘nagdara ako hin damu nga libro ngan nagbaktas hin mga 32 ka kilometro o sobra pa basi sangyawan an mga tawo didto.’ Pagtipabalik niya, iba na nga dalan an iya gin-agian ngan kinahanglan niya tumabok hin gutiay nga salog nga may mga buaya. Pero naghirot gud hiya, salit talwas nga nakabalik hiya ha bungto. Bawi gud an mga pangalimbasog ha ministeryo hito nga mga tripulante. An pipira nga kinarawat hin mga literatura ha Biblia, ha urhi nagin mga Saksi ni Jehova.

 Han naayad na an makina, binaya an Lightbearer ha Port Moresby ngan naglayag tipakadto ha isla han Java ha Dutch East Indies (Indonesia na yana). Katapos dumuong ha pipira nga pantalan para pumalit han ira mga ginkikinahanglan, dinuong hira ha Batavia (Jakarta na yana) han Hulyo 15, 1935.

 Pag-abot nira, an tripulante nga hi Charles Harris binaya ha Lightbearer ngan nagpabilin ha Java, diin padayon nga madasigon nga iginsangyaw niya an maopay nga sumat. b Hiya nagsiring: “Hito nga panahon, an amon buruhaton kaurogan nga pagpinanaltag la hin mga literatura ha Biblia ngan katapos, nabalhin kami ha sunod nga bungto. Nagdadara ako hin mga publikasyon nga Arabic, Chinese, Dutch, English, ngan Indonesian. Damu nga tawo an kinarawat han aton mga publikasyon, salit nakapanaltag ako hito hin 17,000 ha usa ka tuig.”

 Napansin han Dutch nga mga opisyal an kadasig ni Charles. Makausa, may opisyal nga nagpakiana ha usa nga Saksi kon hin-o an nagsasangyaw ha Java, ngan kon pira an mga Saksi nga nagsasangyaw ha East Java, diin nakadto hi Charles. An bugto binaton, “Usa la.” Ginsinggitan hiya han opisyal, “Gin-uuwat mo ba ako? Sigurado nga damu kamo nga nanwawali didto, kay damu na an iyo naipanaltag nga mga literatura.”

 Tikang ha Indonesia, naglayag an Lightbearer ngadto ha Singapore, ngan inabot ito han Agosto 7. Ha kada pagduduong, nagpapatokar an kabugtoan hin nakarekord nga mga lektyur gamit an makusog nga amplifier ngan mga loudspeaker han lantsa. Ini nga pamaagi han pagpasamwak han maopay nga sumat kaurogan na nga nakakakuha han atensyon han damu nga tawo. Ngani, an Singapore Free Press nagreport nga “may daku nga tingog nga nababatian tikang ha dagat . . . kada Mierkoles nga gab-i.” Nagsiring pa ito: “Naiiba gud ito nga lektyur . . . nga iginbubrodkast . . . tikang ha lantsa nga ‘Lightbearer,’ nga nagpapatokar hin [mga] programa han Watch Tower ha Singapore tikang han inabot ito tikang ha Australia.” Nagsiring liwat ito nga report nga “kon maopay an panahon, ito nga mga programa klaro nga mababatian bisan . . . tulo tubtob upat ka kilometro an kahirayo.”

 Samtang nakadto ha Singapore an Lightbearer, binaya hi Frank Dewar tungod ha iya bag-o nga toka. Nahinumdoman niya kon paonan-o hiya binaya: “Nagtikang kami magsangyaw ha Singapore samtang naukoy la gihapon ha lantsa. Han tilarga na an Lightbearer, may ginsiring hi Eric Ewins nga nakalasan gud ako. Hiya nagsiring: ‘Frank, di’ ba nagsiring ka nga karuyag mo magin teritoryo an Siam (Thailand na yana)? Tubtob dinhi ka na la namon maidudul-ong. Puydi ka na lumakat!’ Na-shock gud ako hito ngan haros diri makayakan: ‘Pero diri ako maaram pakadto ha Siam!’” Ginsidngan ni Eric hi Frank nga makakaabot hiya didto kon masakay hiya hin tren ha Kuala Lumpur, nga sakop na yana han Malaysia. Ginsunod ito ni Frank. Sinakay hiya hin tren ha Kuala Lumpur ngan inabot hiya ha Thailand paglabay hin pipira ka bulan. c

 Samtang naglalayag an Lightbearer ha weste nga kadagatan han Malaysia, dinuong ito ha Johore Bahru, Muar, Malacca, Klang, Port Swettenham (Port Klang na yana), ngan Penang. Ha tagsa nga pantalan, nagpapatokar an mga tripulante hin nakarekord nga mga lektyur ha Biblia gamit an loudspeaker han lantsa. “Bisan kon may humugdon nga flying saucer, mas maiinteres la gihapon an mga tawo ha lantsa,” siring ni Jean Deschamp, usa nga Saksi nga nag-aalagad hadto ha Indonesia. Katapos ipatokar an mga rekording, nahaw-as ha lantsa an mga tripulante ngan nananaltag hin mga literatura ha mga interesado.

 Tikang ha Penang, naglayag an mga tripulante tikang ha Strait of Malacca ngadto ha Medan, Sumatra (sakop na yana han Indonesia). Hi Eric Ewins nagsiring: “Makapainteres ngan makalilipay an amon pag-ukoy ha distrito han Medan, ngan damu didto an namati han maopay nga sumat.” An kabugtoan nakapanaltag hin mga 3,000 nga literatura hito nga lugar.

 Samtang an Lightbearer padayon nga naglalayag tipasur, an mga tripulante nagsangyaw ha dagku nga mga pantalan ha este nga bahin han Sumatra. Han Nobyembre 1936, binalik an lantsa ha Singapore, ngan nagpabilin didto hi Eric Ewins. Paglabay hin pipira ka semana, nagpakasal hiya kan Irene Struys, usa nga Saksi nga taga-Singapore. Hira Eric ngan Irene padayon nga nagpayunir ha Sumatra. Syempre, nanginahanglan yana an Lightbearer hin bag-o nga kapitan.

 An nagin bag-o nga kapitan amo hi Norman Senior, nga nabansay ha pagnabigar. Inabot hiya tikang ha Sydney han Enero 1937. Katapos, naglayag an mga tripulante tikang ha Singapore ngadto ha Borneo ngan Celebes (Sulawesi na yana), diin nagsangyaw hira ha damu nga lugar ngan nakaabot pa ngani ha mga lugar nga 480 ka kilometro an kahirayo.

 Han dinuong an Lightbearer ha pantalan han Samarinda ha Borneo, gindid-an han mayor nga opisyal han pantalan an mga tripulante nga magsangyaw ha mga tawo didto. Pero han iginsaysay ha iya ni Norman an aton pagsangyaw nga buruhaton, nakigkooperar hiya ngan kumuha pa ngani hin pipira nga literatura.

 Ha usa pa nga higayon, gin-imbitar hi Norman han usa nga ministro nga magpahayag ha ira singbahan. Pero imbes nga magpahayag, nagpatokar hi Norman hin lima nga rekording han mga lektyur ha Biblia gamit an ponograpo, ngan naruyagan ito han ministro. Kinuha pa ngani hiya hin mga literatura basi ipanhatag ha iya mga sangkay. Pero hiya la an ministro nga nainteres han maopay nga sumat. An iba nga lider han relihiyon waray gud malipay ha buruhaton han mga Saksi ni Jehova. Ngani, nasina hira ha madasigon nga pagsangyaw han mga tripulante ngan ira pa ngani ginsulsolan an mga awtoridad nga diri paduongon an Lightbearer ha iba nga mga pantalan.

 Han Disyembre 1937, tungod hito nga pagsulsol han mga lider han relihiyon, an Lightbearer naglayag tipabalik ha Australia. Dinuong la anay ito ha Sydney Harbor basi an mga tripulante umatender hin usa nga kombensyon han mga Saksi ni Jehova han Abril 1938. Sobra tulo ka tuig na an naglabay tikang han binaya an Lightbearer ha Sydney. Iginbaligya an lantsa ha temprano han dekada han 1940, waray la pag-iha tikang han igindiri an buruhaton han mga Saksi ha Australia. “Daku gud an naibulig han lantsa,” siring ni Brother Ewins. Nagsiring pa hiya nga an iya eksperyensya ha pag-alagad sakay han Lightbearer usa han “pinakamalipayon nga mga tuig” han iya kinabuhi.

 Iginsabwag han mga tripulante han Lightbearer an binhi han Ginhadian ha haluag nga rehiyon nga may damu nga populasyon. Ngan bisan pa han pagkontra, hinay-hinay nga namunga an ira mga pangalimbasog. (Lucas 8:11, 15) Ngani, an mga lugar nga ginsangyawan hito nga mga payunir may-ada na yana sobra 40,000 nga magwarali. Daku gud an naibulig hini nga maisugon nga kabugtoan ngan an ira lantsa nga Lightbearer nga angayan gud ha ngaran hito!